Ua paari to ˈu papa Nardo Leron i roto i te veve, i te oire no Pagsanjan i Philipino. Mea piri roa teie vahi i te mau toparaa pape tuiroo e mataitaihia nei e rave rahi ratere. No te mau ohipa piˈo a te faatereraa, te mutoi e i ta ˈna vahi raveraa ohipa, riro mai nei o ˈna ei taata ino.

 Ua rohi to ˈu mau metua no te faaamu ta raua e vaˈu tamarii. E nehenehe raua e mairi i te fare ehia maororaa no te faaapu i nia i te mouˈa. E rave rahi taime, na maua to ˈu taeae Rodelio e haapao ia maua iho, e e mea pinepine maua i te pohe poia. I to maua apîraa, mea iti roa te taime no te hauti. I te hituraa o te matahiti, pauroa matou e rave i te ohipa i roto i te faaapu. E amo i te pute opaa teimaha na nia i te mouˈa. Noa ˈtu te teimaha o te pute e faaitoito ïa matou i te huti.

 Mea faaoromai matou te ino o to matou papa. Mea mauiui roa ˈtu â râ ia taparahi o ˈna i to matou mama! Ua tamata matou i te tapea ia ˈna, eita râ e ū ia matou. Ua faaoti maua Rodelio e taparahi haapohe ia ˈna ia paari anaˈe maua. Auê to ˈu hinaaro i te hoê papa î i te here!

 Ua faarue au i te fare i te ahuru ma maharaa o to ˈu matahiti, no to ˈu riri rahi i te ino o to ˈu papa. Ua faaea overe atura vau e haamata aˈera i te rave i te raau taero. I te tahi taime, e haamataitai au i te toparaa pape i te mau ratere na nia i te poti.

 Tau matahiti i muri mai, ua haere au i te fare tuatoru no Manille. No ta ˈu râ ohipa i Pagsanjan i te hopea hepetoma, mea iti ïa to ˈu taime e toe ra no ta ˈu haapiiraa. No te haamoe i te fifi o to ˈu oraraa, ua puhipuhi au i te marijuana. Aita râ i navai, tamata ˈtura vau i te raau taero puai atu â, tae roa ˈtu i te peu taotoraa tia ore. No te veve, te ohipa tia ore e te mauiui ta ˈu i faaruru, ua faahapa vau i te faatereraa. Ua ui au i te Atua: “No te aha pai tera huru oraraa?”. Aita râ hoê haapaoraa i pahono i ta ˈu uiraa. Rahi atu â ïa vau i te rave i te raau taero no te haamoe i tera mau fifi.

 I 1972, ua faatupu te mau piahi i te taahiraa no te patoi i te faatereraa i Philipino. Tei roto atoa vau. I mua i te uˈanaraa o te patoiraa, rave rahi tei hurihia i te fare tapearaa. E tau avae i muri iho, ua haamanahia te ture a te nuu ati aˈe ia Philipino.

 Ia ore au ia haruhia e te feia mana no to ˈu faaôraa i roto i tera taahiraa, ua faaea vau i te haere i te fare haapiiraa. E ua ora faahou mai au ei taata overe. No te hoo mai i ta ˈu raau taero, ua haamata vau i te eiâ e tae roa ˈtu i te rave i te ohipa taiata na muri te feia moni e te ratere. Mea faufaa ore hoi no ˈu te ora.

 I tera area taime, ua haapii to ˈu mama e to ˈu taeae i te Bibilia e te mau Ite no Iehova. Ua riri to ˈu papa e ua tānina i ta raua mau papai Bibilia. Ua tamau noa râ raua i te haapii e ua bapetizohia ei Ite no Iehova.

 I te hoê mahana, ua paraparau te hoê Ite no Iehova i to ˈu papa no nia i te parau fafau a te Bibilia o te hoê oraraa maitai aˈe, maoti ïa te hoê faatereraa tano ati aˈe te ao nei. (Salamo 72:12-14) Ua putapû roa to ˈu papa i faaoti roa ˈi o ˈna i te haapii. Ua itehia ia ˈna te parau fafau a te Atua no nia i te hoê faatereraa tano e te hopoia a te hoê tane faaipoipo e metua tane. (Ephesia 5:28; 6:4) Tau taime i muri iho, ua riro mai o ˈna e te utuafare taatoa ei Ite no Iehova. Aita râ vau i ite noa ˈˈe te ohipa i tupu, no to ˈu faaatearaa mai ia ˈu i te utuafare.

 I 1978, ua haere au i Auteralia. E noa ˈtu te oraraa maitai aˈe i tera fenua, aita iho â te hau i topa i roto i to ˈu feruriraa. Tamau noa vau i te inu-hua-raa i te ava e i te rave i te raau taero. Tau avae i muri iho, farerei atura vau i te mau Ite no Iehova. Ua au roa vau i ta ratou i faaite mai i roto i te Bibilia no te hoê oraraa hau i nia i te fenua nei. Tera râ, aita vau e afaro ra i tera feia.

 I muri mai, ua hoi au i Philipino no te hoê taime poto noa. Ua parau mai nei to ˈu fetii utuafare ia ˈu e, ua riro mai to matou papa ei taata maitai roa. No to ˈu râ inoino, aita vau e hinaaro e farerei ia ˈna.

 Ua faataa mai to ˈu teina ia ˈu ta te Bibilia e parau ra no nia i te oraraa fifi e te mauiui. Ua maere roa vau noa ˈtu to ˈna apî, e pahonoraa ta ˈna i ta ˈu mau uiraa atoa. Hou ra vau e vaiiho mai ia ratou, ua horoa mai to ˈu papa i te puta: E nehenehe oe e ora e a muri noa ˈtu i roto i te paradaiso i nia i te fenua nei. a A parau mai ai: “A faaea na! E faaite mai tera puta te mea ta oe e imi ra!” Ua faaitoito mai o ˈna ia ˈu ia farerei i te mau Ite no Iehova ia hoˈi au i Auteralia.

 Ua faaroo vau te parau a to ˈu papa e ua itehia mai ia ˈu te hoê Piha a te Basileia i pihai iho i to ˈu fare, i Brisbane. Ua farii au i te hoê haapiiraa Bibilia. I roto i te Daniela 7 e te Isaia 9, ua tohuhia e na te Faatereraa o te Atua e faatere ma te tano i te fenua a muri aˈe e e ora ïa tatou i roto i te paradaiso. Ua hinaaro vau ia farii mai te Atua ia ˈu. E titauhia râ ia taui i to ˈu huru, ia faaea i te rave i te raau taero, te inu-hua-raa i te ava, e ia haapae roa i te oraraa taiata. A puai noa ˈtu ai to ˈu tiaturiraa ia Iehova, pure noa â vau ia ˈna no te tauturu mai ia ˈu ia rave i teie mau tauiraa.

 Ma te tutava i te haapii i te Bibilia, ua taa ia ˈu e nehenehe te hoê taata e taui to ˈna huru ma te ahu mai i te “huru taata apî.” (Kolosa 3:9, 10) Ua papu ïa ia ˈu te parau o ta ˈu i faaroo no nia i te tauiraa o te huru o to ˈu papa. Hinaaro atura vau e faatupu i te hau e o ˈna. O ta ˈu ïa i rave. Ua faaore roa vau to ˈu riri ia ˈna mai to ˈu nainairaa mai.

 I to ˈu apîraa, ua pee hanoa vau ia vetahi ê noa ˈtu e haerea ino to ratou. Parau mau roa ta te Bibilia e faahiti ra no nia i te amuimuiraa ino, ohipa ino to muri mai. (Korinetia 1, 15:33) E hoa mau râ ta ˈu i ite mai i rotopu i te mau Ite no Iehova. Ua tauturu mai ratou ia ˈu ia riro ei taata maitai. I ô atoa vau i te haamatauraa i ta ˈu vahine faaipoipo o Loretta. Te haapii ra maua ia vetahi ê e nafea te Bibilia e nehenehe e tauturu ia ratou.

 Maoti te Bibilia, ua riro mai to ˈu papa ei tane faaipoipo î i te here e ei kerisetiano mărû e te haehaa. I to ˈu bapetizoraa ei Ite no Iehova i 1987, a tahi roa to ˈu papa i tauahi mai ai ia ˈu.

 Hau e 35 matahiti te maoro to papa raua mama tamau-noa-raa i te faaite ia vetahi ê te tiaturiraa ta te Bibilia e horoa mai. Ua riro mai papa ei taata itoito e te haapao maitai. Mea au roa na ˈna e tauturu i te taata. Ua haapii au i te faatura e i te here ia ˈna. Faahiahia roa vau i to ˈu papa! Ua pohe o ˈna i 2016 e te manaˈo noa râ vau ia ˈna, e te mau tauiraa o to maua huru a faaohipa ˈi i te mau haapiiraa Bibilia. Ua ore roa to ˈu riri e te mauruuru nei au i te iteraa i to ˈu Metua i te raˈi o Iehova. Ua fafau mai o ˈia i te faaore i te mau mauiui atoa i roto i te mau utuafare.