UA AMO te feia tariˈa turi i to ratou rima i nia e ua hautiuti aˈera i te reira no te popou i teie parau faaite faahiahia mau: “E oaoa outou i te ite e te hurihia ra te tahi mau buka Bibilia o te mau Papai Hebera [Faufaa tahito]. E ua oti te haruharuraa [video] o te buka Genese!”

Ua horoahia teie parau faaite i roto i te oreroraa parau hopea o te mau tairururaa i mairi aˈenei a te mau Ite no Iehova na roto i te reo apǎraa rima Marite.

I 2005, ua haamata te mau Ite no Iehova i te huri i te Huriraa o te ao apî o te mau Papai moˈa na roto i te reo apǎraa rima Marite, ma te haamata e te buka Mataio. I 2010, ua faaotihia na 27 buka o tei parauhia te Faufaa apî na roto i te reo apǎraa rima Marite.

Hau atu â, ua huri te mau Ite no Iehova i te tahi mau tuhaa o te Bibilia na roto e pae reo apǎraa rima.

No te aha teie rahiraa ohipa? Ua taa i te mau Ite no Iehova e ua niuhia te mau api neneihia i nia i te hoê reo paraparauhia ta te rahiraa o te feia tariˈa turi i ore i faaroo aˈenei. E nehenehe te huriraa tano o te Bibilia, te papu e te hee noa e tauturu i te feia tariˈa turi ia taa i te Bibilia e ia faatupu i te taairaa piri e te Atua. Eaha to ratou huru a fanaˈo ai i teie huriraa Bibilia?

Ua faataa te hoê tamaroa tariˈa turi: “A matara mai ai te buka Mataio a tau matahiti i teie nei, mai te mea ra e ua haapapu mai te Atua ra o Iehova i to ˈna here no ˈu. E ua papu roa ˈtu â vau i te reira a matara mai ai te buka Genese. Te imi ra Iehova i te ravea ia nehenehe au e haapii o vai o ˈna.”

Ua faaite te hoê vahine tariˈa turi i to ˈna huru aau mai teie: “Mea papu e mea ohie ia taa i te mau apǎraa rima! Ua au roa vau i te Bibilia. Ua taa ia ˈu e te hinaaro ra Iehova ia taio vau i ta ˈna Parau hoê irava i muri i te tahi, oia atoa i te huru tupuraa, ia taa ˈtu â ia ˈu i to ˈna huru. Mea papu maitai te apǎraa rima. Ua haaputapû te reira i to ˈu aau e ua tia ˈtura ia ˈu ia pure ia Iehova ma te faaite atu â i to ˈu mau manaˈo hohonu.”