Te ora nei Odval i Mongolie. Aita o ˈna i papu maitai ehia matahiti to ˈna. Te manaˈo nei râ o ˈna e ua fanauhia oia i 1921. Mea apî roa Odval a haapao ai o ˈna i te mau animara a to ˈna mau metua e ua haere oia i te haapiiraa hoê noa matahiti. Aita râ i maoro aˈenei, maoti te hoê buka rairai e te û rau, ua tia ia ˈna ia ite o vai te Atua. Ua haapii atoa mai o ˈna eaha te a muri aˈe oaoa e tiai ra i te feia e faaroo ia ˈNa. Ua putapû roa to ˈna aau i te reira.

Ua piahia teie buka rairai i 2011 e te mau Ite no Iehova. E piti huru buka rairai. E hohoˈa nehenehe mau to roto i na buka rairai e piti, hoê noa râ taa-ê-raa: mea iti aˈe te tatararaa i roto hoê.

Fatata roa te buka rairai mea rahi aˈe te tatararaa, oia hoi Faaroo i te Atua no te ora e a muri noa ˈtu, i te hurihia na roto e 583 reo. Area te tahi atu, Faaroo i te Atua, ua hurihia ïa na roto e 483 reo. A faaau na i te reira i te “Déclaration universelle des droits de l’homme” a te mau Nunaa Amui tei hurihia na roto e 413 reo i Atopa 2013. Hau atu â, ia taio-amui-hia na buka rairai e piti, fatata e 80 mirioni tei operehia.

I Beresilia, ua farii te hoê vahine paari ma te oaoa i te buka rairai Faaroo i te Atua e ua parau: “Mea oaoa ia ite e te vai ra te taata o te haapao ra i te feia mai ia ˈu. Aita vau i farii aˈenei i ta outou mau vea no te mea aita ta ˈu e nehenehe e taio. Te hinaaro nei râ vau i teie buka rairai.”

Ua parau Brigitte, te hoê vahine e ora ra i Farani e o tei ore i ite i te taio e i te papai: “E hiˈo vau i te mau hohoˈa o te buka rairai i te mau mahana atoa.”

Te papai ra te hoê Ite no Iehova no Afirika Apatoa: “Teie te buka rairai maitai aˈe no te faaite i te parau mau i te taata reo Tinito. Ua parahi au e te tahi mau taata tuite tuatoru, e taata maramarama roa ïa, oia atoa e te feia o te fifi ra i te taio. Maoti te buka rairai Faaroo i te Atua no te ora e a muri noa ˈtu, ua tia ia ˈu ia faaite oioi i te mau haapiiraa tumu Bibilia. I roto noa afa hora, ua haamauhia te niu o te hoê haapiiraa Bibilia.”

Ua haapii e piti Ite no Iehova i Heremani i te Bibilia i na hoa faaipoipo aravihi. Ua maere roa te tane i te buka rairai e ua parau: “No te aha aita ˈi orua i horoa aˈena mai i teie buka rairai? Ua tauturu mai te reira ia ˈu ia taa ma te ohie i te mau tupuraa e te mau faahitiraa i roto i te Bibilia.”

Ua parau te hoê vahine tariˈa turi i Auteralia: “E rave rahi matahiti, ua ora vau e te mau paretenia i roto i te hoê fare monahi. Aita ˈtu taata tei piri roa ˈˈe i te mau tia o te ekalesia i ia ˈu. Aita hoê aˈe râ o ratou tei haapii mai eaha te Basileia o te Atua. Ua tauturu mai te mau hohoˈa i roto i teie buka rairai ia taa eaha mau na te auraa o te Mataio 6:10.”

Te papai ra te amaa a te mau Ite no Iehova i Kanada: “I muri iho i te iteraa i te buka rairai Faaroo i te Atua na roto i te reo Krio, ua parau te taata e rave rahi no Sierra Leone mai o te ora ra i ǒ nei e te ohipa puai nei te mau Ite no Iehova no te faaite i te poroi Bibilia. Ua parau vetahi, ‘Te haapao nei outou i te tahi atu, e ere mai te taata e rave rahi.’”