Ua matau-maitai-hia te mau Ite no Iehova no ta ratou ohipa pororaa i tera e tera fare. Te ite-atoa-hia nei ratou te tia ra i muri mai i te tahi mau vairaa papai afaifai anaanatae mau i te mau vahi taata.

Aita i maoro aˈenei te faaohipa-rahi-raahia teie huru pororaa. I te avaˈe Novema 2011, ua haamata te hoê pǔpǔ Ite no Iehova i te oire no New York i te faaite i te poroi Bibilia i te taata ma te faaohipa i te mau iri e vairaa papai afaifai. No te mea ua manuïa roa teie huru pororaa, ua parare oioi te reira i roto i te tahi atu mau oire.

I te avaˈe Mati 2015, ua haponohia 165 390 vairaa papai afaifai i te mau amuiraa a te mau Ite no Iehova i te ao nei. E tausani iri vairaa papai e vahi faaiteiteraa tei noaa atoa mai.

O te pororaa i tera e tera fare te ravea matamua roa ta te mau Ite no Iehova e faaohipa nei ia ite te taata atoa i te parau mau Bibilia. Mea manuïa maitai atoa râ te mau vairaa papai afaifai. Teie te tahi mau hiˈoraa.

I Peru, ua haafatata ˈtu te hoê taata o Raul te iˈoa i te tahi vairaa papai afaifai e ua parau atu i na Ite no Iehova: “Ihea roa hoi outou? A toru matahiti i teie nei to ˈu imi-noa-raa i te mau Ite no Iehova! I to ˈu iteraa ˈtu i ta outou vairaa papai afaifai, ua haamauruuru vau i te Atua.”

Mea pinepine te mau Ite no Iehova i te poro i te vahi e faaea ˈi o ˈna. Tera râ, aita o Raul i mau na i te fare. Ua faataa ˈtu o ˈna e ua haapii oia i te Bibilia e te mau Ite no Iehova na mua ˈˈe, e te hinaaro ra oia e haapii faahou. Ua ravehia te tahi mau faanahoraa no ˈna.

I Bulgarie, ua rave te hoê tane e to ˈna apiti mea apî raua i te buka Te ravea e itehia ˈi te oaoa i te utuafare i te hoê vairaa papai afaifai. I te hebedoma i muri iho, ua haere faahou raua i reira no te rave e piti atu â buka: Ta ˈu Buka Aamu Bibilia e Écoute le grand Enseignant. Ua ui atu te Ite no Iehova i reira ehia tamarii ta raua. Ua pahono atu raua: “Aita e tamarii ta mâua. Ia roaa râ ta mâua tamarii, e hinaaro mâua e haapii atu no nia i te Atua. Teie mau buka iho â ta mâua e hinaaro mau.”

I Ukraine, ua tapiri atu te hoê tane e ahu faehau to ˈna i e piti vahine Ite no Iehova i pihai iho i te hoê vairaa papai afaifai. Ua parau atu o ˈna: “Ěi, a parau mai na afea o Aramagedo e tae mai ai.” Ua haa na teie faehau i roto i te mau aroraa i tupu aˈenei i Ukraine. Ua haapapu te mau tupuraa na te ao nei ia ˈna e fatata Aramagedo e ua uiui atoa o ˈna no te aha te Atua i ore ai i haa oioi mai. Ua rave na Ite no Iehova i te Bibilia no te faataa ˈtu no te aha te Atua i ore â ˈi i haa ˈtura i roto i te mau ohipa a te taata e fatata râ oia i te haamou i te feia ino atoa. Ua rave o ˈna i te mau vea Te Pare Tiairaa e A ara mai na! e te buka Y a-t-il un Créateur qui se soucie de vous?

I Makedonia, ua parau atu te hoê tane apî i te mau Ite no Iehova i pihai iho i te hoê vairaa papai afaifai e mea matau maitai ia ˈna ta ratou mau vea, e hinaaro atoa râ oia e rave i te buka Eaha ta te Bibilia e haapii mau ra? Ua parau o ˈna e e afaro roa o ˈna i te fare vairaa buka huiraatira no te taio i te reira.

E piti hora i muri aˈe, ua hoˈi faahou teie tane i te vairaa papai afaifai. Ua taio oia i na 79 api matamua o te buka. “E taui teie buka i te oraraa o te taata!” Ta ˈna ïa i parau. “Te taa ra ia ˈu i teie nei e mea hape e rave rahi haapiiraa ta ˈu i tiaturi na. Mea maramarama maitai te mau mea i faataahia i roto i teie buka. Ua taui roa to ˈu manaˈo no nia i te oraraa!”