I te 25 no Tetepa 2024, ua rave te Tiripuna teitei no Beresilia i te hoê faaotiraa faufaa roa, e turu ra i te tiaraa o te taata maˈi ia patoi i te pâmuraa toto e ia maiti i te tahi atu ravea rapaauraa. Ua faaue atoa te Tiripuna teitei i te Piha faatere hau no te ea ia haafanaˈo i taua taata maˈi ra i te mau ravea rapaauraa eita e faaohipahia te toto.

Ua ravehia teie faaotiraa no e piti Ite no Iehova no Beresilia. I 2018, aita tuahine Malvina Silva i tarima i te api parau e faatia ra i te mau taote ia pâmu ia ˈna i te toto a tâpûhia ˈi to ˈna mafatu. Faaore atura ïa te fare maˈi i te tâpûraa. Piri e piti matahiti i muri iho to Malvina rapaauraahia ia au i ta ˈna i faaoti no ta ˈna mau tiaturiraa.

I 2014, mea tâpû-atoa-hia o taeae Heli de Souza. Aita râ ta te fare maˈi e matini no te tâpû ia ˈna ma te ore e pâmu i te toto. Ani atura ïa Heli e faahaere ia ˈna i te tahi atu fare maˈi, o te farii e tâpû ia ˈna ma te faatura i ta ˈna faaotiraa no ta ˈna mau tiaturiraa. Aita râ te Piha faatere hau no te ea i faatia. Te tiai noa râ ïa Heli ia tâpûhia o ˈna. Mea rahi te Ite no Iehova i Beresilia i roto i tera tupuraa, e ua pâmuhia vetahi i te toto.

Teie hoê tuhaa o te faaotiraa i taiohia e te haava o Luís Roberto Barroso, peretiteni o te Tiripuna teitei: “Te tiaraa e patoi i te pâmuraa toto no ta ˈna mau tiaturiraa, ua niuhia ïa i nia i te mau aratairaa pǎpǎ ture no nia i te faaturaraa i te taata e te tiamâraa e maiti i ta ˈna haapaoraa. No reira, no nia i te parau o te ora e te pohe, e tiaraa to [te mau Ite no Iehova] e fanaˈo i te tahi atu mau ravea rapaauraa, e tiaraa [atoa] to ratou e patoi i te mau ravea rapaauraa e faaohipahia te toto, e tiaraa hoi to ratou e rave i ta ratou iho faaotiraa.”

Te faahepo ra teie faaotiraa i te mau tiripuna i Beresilia ia faatura i te faaotiraa a te taata maˈi no nia i te rapaauraa. Tera atoa te faaotiraa a te Tiripuna teitei i te tahi atu mau fenua, mai ia Auteralia, Kanada, Tapone, Afirika apatoa e Marite. Te faaotiraa atoa ïa ta te Piha hororaa hopea o te Tiripuna Europa o te tiaraa o te taata i rave i te 17 no Tetepa 2024, o te faahepo ra e 46 fenua no Europa ia faatura i te faaotiraa a te taata maˈi.

Mauruuru roa matou i te faaotiraa a te Tiripuna teitei no Beresilia ia faaturahia te mau tiaturiraa a te huiraatira e to ratou tiaraa e maiti i ta ratou ravea rapaauraa.