Ua parau te mau taeae mai tera no te mea e ere iho â vau i te mea piri ia Iehova i tera taime. Aita vau i au i te pororaa! E pure na vau ia ûa i te mau Tapati atoa eiaha vau ia haere i roto i te taviniraa! E ia haere noa ˈtu vau, e opere noa vau i te mau vea. Aita ta ˈu e omuaraa parau no te haamata i te hoê aparauraa Bibilia. E horoa mai na to ˈu mama here i te moni no te turai ia ˈu ia rave i te mau taioraa Bibilia i roto i te amuiraa. Eita vau e au e haapii i te Bibilia e aita ta ˈu e fa pae varua.

 I tera matahiti, ua faatupuhia te tairururaa e toru mahana i Cardiff i te fenua no Galles. I tera taime to ˈu oraraa i te taui-roa-raa! Ua faahiti hoê o te mau taeae orero i te tahi mau uiraa o tei haaferuri mau ia ˈu. Ua na ô oia: “Ua pûpû anei oe i to oe ora ia Iehova e ua bapetizohia?” Pahono ihora vau i roto ia ˈu: E! “Ua euhe anei oe i te tavini ia Iehova ma to aau, ora e manaˈo atoa?” E! “E maˈi anei aore ra e hopoia utuafare anei ta oe o te tapea ra ia oe ia rave i te taviniraa pionie?” Aita! “Te vai ra anei te tahi atu tumu eita ˈi oe e nehenehe e riro ei pionie?” Aita! “Mai te peu ua pahono oe aita i te uiraa hopea nei, no te aha ïa e ere oe i te pionie?”

 I tera taime, e au ra ua pura mai te mori! Na ô aˈera vau, te haamâuˈa ra vau to ˈu taime! Aita vau e tapea ra i ta ˈu euhe, aita vau e tavini ra ia Iehova ma to ˈu ora atoa! Mai te peu e hinaaro vau ia tapea Iehova i ta ˈna i fafau mai, mea titauhia na mua roa ia tapea vau i ta ˈu i euhe ia ˈna! No reira, i Atopa 1956, ua haamata vau i te taviniraa pionie tauturu.

 Hoê matahiti i muri iho, riro mai nei au ei pionie tamau e haere atura vau e tavini i roto i te hoê amuiraa 19 feia poro. I te haamataraa, e oreroraa parau ta ˈu i te mau hebedoma atoa. Maoti te tauturu a te mau taeae, ua aravihi mai au no te horoa i te mau oreroraa parau. E piti matahiti i muri aˈe, i 1959, ua faatoroahia vau ei pionie taa ê. Ua tonohia vau i Aberdeen, te tahi oire i te pae apatoerau i Écosse. Tau avaˈe i muri iho, ua titau-manihini-hia vau ia tavini i te Betela i Lonedona. Ua oaoa roa vau i te ohipa i te tuhaa neneiraa e hitu matahiti te maoro.

 Mea au roa na ˈu te oraraa i te Betela, tera râ ua hinaaro vau e rave i te tahi taviniraa taa ê i roto i te tuhaa fenua. Mea apî e mea pautuutu maitai au e ua hinaaro vau ia tono Iehova ia ˈu i te vahi ta ˈna e hinaaro. No reira, i Eperera 1965, ua faaî au i te aniraa no te haere i te Haapiiraa no Gileada o tei faaineine na i te mau mitionare.

 I tera matahiti, ua faaoti mâua te taeae hoê â piha to mâua i te Betela i te haere i te hoê tairururaa e toru mahana i Berlin i Heremani, e no te mataitai atoa i te patu o Berlin tei hamanihia tau matahiti na mua ˈtu.

 Hoê mahana o tera tairururaa, ua haere matou e poro e o Susanne Bandrock to ˈu hoa ohipa. Ua faaipoipohia mâua i 1966. E piti matahiti i muri iho, ua titau-manihini-hia mâua no te apiti i te 47raa o te Piha haapiiraa no Gileada. E haamaitairaa mau tera! No te au o tera haapiiraa, ua mairi oioi na avaˈe e pae! Ua tonohia mâua i Zaïre, piihia i teie nei te Repupirita manahune no Congo. Ua hitimahuta roa mâua, mea iti roa ta mâua i ite no nia i tera fenua! Ua tupu mai te taiâ, ua farii râ mâua i te reira e ua tuu i roto i te rima o Iehova.

 Hou a tapae ai i te oire o Kolwezi, e rave rahi hora mâua i nia i te manureva e te mau tauraa manureva. Ua maere mâua i te oreraa e ite i te mau taeae. I muri iho to mâua iteraa ua hape te poroi i haponohia i te mau taeae, ua parauhia hoi e tae atu mâua e piti mahana i muri iho! Tapiri mai ra hoê mutoi e paraparau mai nei na roto i te reo Farani. Aita â mâua i taa ˈtu ra i tera reo, fariu mai nei te vahine i mua noa mai ia mâua no te huri i ta ˈna parau, oia hoi, “E tapeahia orua!”

 Ua faahepo te mutoi i te tahi taata ia faahoro ia mâua na nia i to ˈna pereoo tahito e te nainai. E piti anaˈe hoi parahiraa, ua apǐ aˈena i te mutoi e te fatu pereoo e faaô-noa-hia ˈtu ra mâua Susanne! E au ra mai i roto i te hohoˈa teata, ua taueue e ua pee hanoa te pereoo a tere ai na nia i te purumu apoopoo. Area te muriraa o te pereoo, ua hamǎmǎ noa ïa mai te vaha o te hoê iˈa, ua taueue noa ta mâua taihaa!

 Ua ani mâua ia faahorohia mâua i te fare mitionare. Aita mâua i ite teihea roa, te mutoi râ, oia ïa! I to mâua taeraa ˈtu, aita e taata e ua ponaohia te mau opani. Ua tere haere te mau mitionare i te mau tairururaa nunaa rau e no ta ratou tau faafaaearaa. A tia noa ˈi i raro aˈe i te mahana puai, feruri atura mâua e nafea râ. Tae mai nei te hoê taeae no ǒ. A ite ai i to ˈna mata oaoa, ua topa roa to mâua hau! Area te mutoi, te tiai ra ïa ia horoa ˈtu mâua maa moni. Auaa râ, ua matau te taeae ia ˈna. Paraparau atura raua e haere ihora te mutoi e nehenehe atura mâua e faanaho i ta mâua taihaa i roto i te fare.

 Na ahuru matahiti na mua ˈtu, ua itehia te orure hau e te taparahiraa taata i Zaïre. Ua taa oioi ia mâua tei rotopu mâua i te hoê nunaa oaoa e te î i te here o tei faaruru e rave rahi ati. No reira, i te matahiti 1971, ua opanihia te ohipa a te mau Ite no Iehova. Ua feruri matou e nafea ïa matou i teie nei.

 E ere i te taime no te otohe. E rave rahi taeae e tuahine tei faahepohia ia ofati i to ratou tiaraa amui ore ma te rave e ma te pine i te hoê tareta no te turu i te hoê pǔpǔ poritita. Ia ore oe e farii, eita oe e nehenehe e fanaˈo i te tahi mau mea no ǒ mai i te faatereraa e e faahepo te mau faehau e mutoi ia oe! Ua ere te mau taeae i ta ratou ohipa, area te mau tamarii, ua tiavaruhia ratou i rapae i te fare haapiiraa. Mea rahi roa te mau taeae tei tapeahia. E taime fifi mau! Noa ˈtu râ, ua tamau noa te mau Ite no Iehova i te poro ma te itoito.

 I tera mau matahiti, ua horoa rahi mâua Susanne i to mâua taime no te taviniraa haaati e no ta ˈu hopoia ei tiaau mataeinaa. Mea taa ê te oraraa i te mau oire rii, e i te tahi taime, e ere i te mea ohie! Mea nainai te fare e mea pirihao no te taoto atu i raro. Ehia taime to ˈu upoo i te tanoraa i nia i te mau opani! No te hopu, mea titauhia ia tari mai i te pape, e haere ïa oe e tii i te apoo pape aore ra i te anavai. I te po, e faaama mâua i te mori hinu no te taio i te Bibilia e e tunu na mâua i te maa i nia i te vahie. Tera râ, no mâua, tera mau â te oraraa mitionare: I nia i te tahua aroraa, o matou to mua roa no te faatupu i te hinaaro o Iehova!

 I to mâua oraraa i rotopu i te mau utuafare o te mau taeae e tuahine, ua taa ia mâua i te faufaaraa ia mauruuru i te mea e vai ra ia mâua. E maa, e pape, e ahu e e nohoraa to oe, a oaoa ïa! (Timoteo 1, 6:8) Mai te peu e ohipa ê atu â ta oe i fanaˈo, e haamaitairaa ïa! E haamanaˈo noa mâua i tera haapiiraa faufaa mau tae roa mai i teie mahana!

 Aita iho â mâua i faaruru i ta te aposetolo Paulo i faaruru! I te tahi râ o to mâua mau tere, e au ra e te tamatahia ra to mâua faaroo e to mâua mau manaˈo turai. E titauhia ia tere mâua na nia i te purumu atâta. I te tahi atu vahi, aita e purumu! Area te purumu ofaifai, e taueue noa ïa te pereoo. I te tahi taime, e mure to mâua pereoo i roto i te one. Area i te tau ûa, i roto ïa i te vari! I te hoê mahana, ua tere mâua 70 kilometera te atea, 12 râ taime i mau ai te pereoo i roto i te vari! Ua titauhia ia heru no te tatara mai i te pereoo!

 Ua piri atu â mâua ia Iehova a tavini ai ia ˈna i te mau vahi atea roa e i roto i te mau tupuraa fifi. Ua haapii mâua maoti te tauturu a Iehova, e nehenehe e faaoromai tamau ma te oaoa tae noa ˈtu te tupuraa fifi eita oe e nehenehe e taui. E ere o Susanne i te taata o te au e ora na rapae aore ra e ora i te tupuraa apî. Noa ˈtu râ te mau ati e te mau fifi atoa ta mâua i farerei, aita vau i faaroo aˈenei ia ˈna ia amuamu. Ia feruri mâua i tera mau tupuraa, e taime oaoa ïa e te faufaa e mea rahi te mau haapiiraa ta mâua i huti mai!

 I Zaïre, ua tapeahia vau e rave rahi taime! I te hoê mahana, ua parihia vau i te tapihoo i te taiamani! Ua haapeapea iho â ïa mâua. Tera râ, mai te peu ua tono Iehova ia mâua i Zaïre, e tauturu mai iho â ïa o ˈna! O ta ˈna iho â ïa i rave!

 I te matahiti 1981, ua titau-manihini-hia mâua ia tavini i te amaa i Kinshasa. Hoê matahiti na mua ˈtu, ua roaa faahou mai te parau haamanahia i mua i te ture no te ohipa a te mau Ite no Iehova. Ua roaa mai i te mau taeae i te hoê tâpû fenua no te patu i te hoê amaa rahi aˈe. Tera râ, ma te manaˈo-ore-hia, i Mati 1986, ua tarima te peretiteni o te fenua i te hoê ture no te opani i te ohipa a te mau Ite no Iehova. Mau atura te paturaa, e aita i maoro, ua faarue te rahiraa o te mau mitionare i te fenua.

 Ua nehenehe mâua e faaea rii mai. Ua rave mâua i tei maraa no te tamau i te poro noa ˈtu e hiˈopoa-noa-hia mâua. Noa ˈtu ua haapao maitai mâua, ua tapeahia vau a faatere ai i te hoê haapiiraa Bibilia. Ua tuuhia vau i roto i te hoê piha i raro aˈe i te hoê tahua tei î i te mau auri. Mea veavea, mea hauˈa, mea poiri e aita e mataˈi! Hoê anaˈe mori e hoê anaˈe haamaramarama nainai roa! Haru mai nei te tahi mau auri ia ˈu e afai atura ia ˈu i to ratou raatira. Faaue mai nei ia ˈu: “A himene i te himene aiˈa o to matou fenua!” Pahono atura vau: “Aita vau i ite!” Na ô mai nei: “A himene ïa i te himene aiˈa o to oe fenua!” Pahono atura vau: “Aita atoa vau i ite!” I muri iho, faahepo maira to ratou raatira ia tia vau 45 minuti te maoro a hiˈo noa ˈi i te patu. I muri aˈe, ua nehenehe te mau taeae no ǒ e rave i te tahi faanahoraa ia matara mai au.

 Ua ite mâua eita te tupuraa e maitai mai. Aita i maoro, ua tonohia mâua i Zambie. A faarue ai mâua, te vai ra te tamǎrûraa, te vai atoa ra te oto. E 18 matahiti to mâua taviniraa e teie mau mitionare e teie mau taeae e tuahine haapao maitai. Noa ˈtu e ere te oraraa i te mea ohie i te tahi taime, ua ite mâua i te haamaitairaa a Iehova. Tei pihai iho noa Iehova ia mâua i te mau taime atoa! Ua haapii mâua toopiti i te reo Swahili e te reo Farani, area o Susanne, ua haapii atoa ïa i te reo Lingala. Mea oaoa roa ta mâua taviniraa e ua tauturu mâua hau atu i te 130 taata ia bapetizo ia ratou. Te mauruuru atoa nei mâua i te raveraa i te tahi tuhaa rii no te tauturu e rave rahi atu â taata ia haapii i te parau mau. E mea rahi mau tei haere mai i te parau mau i muri mai! I te matahiti 1993, ua faaore te Tiripuna teitei i te ture o te matahiti 1986 o tei opani na i te ohipa a te mau Ite no Iehova. I teie nei, ua hau atu i te 240 000 feia poro i Congo!

 I Zambie, ua ite mâua i te paturaa o te amaa apî, e na reira atoa te faarahiraahia te reira. I teie nei, ua tataitoru te rahiraa o te feia poro ia faaauhia i te taime a tae mai ai mâua i te matahiti 1987.

 Eaha ˈtu ra te parau o teie taeae apî ua parauhia no ˈna eita o ˈna e tapea hoê avaˈe i roto i te taviniraa pionie? Maoti te haamaitairaa a Iehova e te turu a ta ˈu vahine here ra o Susanne, a 65 matahiti au i teie nei i roto i te taviniraa pionie. Ua tamata e ua ite au i te maitai o Iehova!—Salamo 34:8.

 E ere mâua i te taata taa ê, ua rave noa mâua i tei maraa no te tapea maite i ta mâua euhe ia Iehova! Te tiaturi nei mâua e tamau Iehova i te tauturu mai ia ore e “otohe,” ia rahi atu â râ to mâua faaroo “a ora ˈtu ai.”—Hebera 10:39.

 A mataitai i te video Dayrell et Susanne Sharp : Nous avons promis de servir Jéhovah de toute notre âme