Deuteronomi 14:1-29
14 “E tamarii outou na Iehova to outou Atua. Eiaha outou ia otioti ia outou+ aore ra e hahu i to outou tue mata* no te tahi taata pohe.+
2 E nunaa moˈa+ hoi outou no Iehova to outou Atua, e ua maiti Iehova ia outou no te riro ei nunaa no ˈna, ei faufaa taa ê* na ˈna, i rotopu i te mau nunaa atoa e vai ra i te fenua.+
3 “Eiaha oe e amu i te tahi mea faufau.+
4 Teie te mau animara ta outou e nehenehe e amu:+ te puaatoro, te mamoe, te puaaniho,
5 te aili, te zabi, te hemura, te puaaniho oviri, te disina, te mamoe oviri, e te mamoe no te mouˈa.
6 E nehenehe outou e amu i te mau animara atoa e maiuu amaha to ratou e o te tamǎrû i ta ratou maa.
7 Teie râ, eiaha outou e amu i teie mau animara o te tamǎrû i ta ratou maa aore ra e maiuu amaha to ratou: te kamela, te aranabata e te rapiti no te mato, no te mea e tamǎrû ratou i ta ratou maa, aita râ to ratou e maiuu amaha. Mea viivii te reira no outou.+
8 Te puaa atoa no te mea e maiuu amaha to ˈna, eita râ oia e tamǎrû i ta ˈna maa. Mea viivii te reira no outou. Eiaha outou e amu i to ratou iˈo aore ra e tapea i to ratou tino pohe.
9 “O te mau mea atoa e ora ra i roto i te mau pape, teie ta outou e nehenehe e amu: Te mau mea atoa e pehau e e poa to ratou, e nehenehe outou e amu.+
10 Eiaha râ outou e amu i te mau mea atoa aita e pehau e aita e poa to ratou. Mea viivii te reira no outou.
11 “E nehenehe outou e amu i te mau manu viivii ore.
12 Eiaha râ outou e amu i teie mau manu: te aeto, te peresa, te ozeni,+
13 te aia uteute, te aia ereere, e te tahi atu mau huru aia atoa,
14 te mau huru oreba atoa,
15 te ione, te tehemesa, te sehepha, te mau huru nesa atoa,
16 te tehemesa nainai, te tehemesa tariˈa roa, te tenesemata,
17 te kata, te rehema, te seleka,
18 te heside, te mau huru anephe atoa, te dukipata, e te iore pererau.
19 Pauroa te animara pererau o te aere,* mea viivii atoa no outou. Eiaha te reira ia amuhia.
20 E nehenehe outou e amu i te mau animara rere viivii ore atoa.
21 “Eiaha outou e amu i te mau animara atoa tei pohe ê na.+ E nehenehe outou e horoa i te reira na te taata ê e noho ra i roto i to outou mau oire,* e e nehenehe oia e amu i te reira, aore ra e nehenehe te reira e hoohia ˈtu i te hoê taata ê. E nunaa moˈa hoi outou no Iehova to outou Atua.
“Eiaha outou e tunu i te tahi fanauˈa puaaniho i roto i te û o te maiaa.+
22 “E horoa mau â oe hoê tuhaa i nia ahuru* o tei tupu mai o ta oe mau huero maa i tanu i roto i te faaapu i tera e tera matahiti.+
23 E amu oe i te tuhaa ahuru o ta oe huero maa, ta oe uaina apî, ta oe hinu, e te fanauˈa matamua o ta oe nǎnǎ puaatoro e nǎnǎ mamoe e te puaaniho i mua ia Iehova to Atua i te vahi ta ˈna e maiti no te haamau i to ˈna iˈoa,+ ia haapii oe i te mǎtaˈu noa ia Iehova to Atua.+
24 “Mai te peu râ e tere roa roa no oe e eita ta oe e nehenehe e hopoi i te reira i te vahi ta Iehova to Atua e maiti ei vahi no to ˈna iˈoa,+ no te mea mea atea ia oe (e haamaitai hoi Iehova to Atua ia oe),
25 e nehenehe oe e taui i te reira i te moni, a tere atu ai e ta oe moni i roto i te rima i te vahi ta Iehova to Atua e maiti.
26 E nehenehe oe i muri iho e faaohipa i te moni no te mau mea atoa ta oe e hiaai, te puaatoro, te mamoe, te puaaniho, te uaina e te tahi atu mau ava, e te mau mea atoa mea au na oe, e e amu oe i te reira i reira i mua ia Iehova to Atua, a oaoa ˈtu ai oe e to utuafare.+
27 Eiaha e haamoˈe i te ati Levi i roto i to mau oire,+ aita hoi i horoahia to ˈna fenua, aita atoa ta ˈna e tuhaa e o oe.+
28 “Ia hope e toru matahiti, e hopoi mai oe i te tuhaa ahuru taatoa o te mau mea i noaa mai ia oe i taua matahiti ra e e vaiiho oe i te reira i roto i to mau oire.+
29 E te ati Levi, aita i horoahia to ˈna fenua, aita atoa ta ˈna e tuhaa e o oe, e te taata ê, te tamarii aita e metua tane* e te vahine ivi e noho ra i roto i to mau oire, e haere mai ïa, e tamaa e ia paia,+ ia haamaitai Iehova to Atua ia oe i te mau ohipa atoa ta oe e rave.+
Nota i raro i te api
^ Heb: “i ropu i to outou mata.” Aore ra “to outou rae.”
^ Aore ra “poiherehia.”
^ Aore ra “manumanu.”
^ Heb: “uputa.”
^ Aore ra “i te tuhaa ahuru.”
^ Aore ra “te otare.”
