Exodo 32:1-35
32 A ite ai te nunaa e te haamaoro ra Mose i te pou mai nia mai i te mouˈa,+ putuputu maira te nunaa ati aˈe ia Aarona e parau maira: “A tia i nia, a hamani no tatou i te tahi atua o te haere na mua ia tatou,+ no te mea aita tatou i ite eaha tei tupu no tera Mose, te taata tei aratai ia tatou i rapae i te fenua o Aiphiti.”
2 Parau atura Aarona ia ratou: “A rave i te tapea tariˈa auro+ no nia i te tariˈa o ta outou mau vahine faaipoipo, tamaiti e tamahine e a hopoi mai.”
3 Tatara aˈera ïa te nunaa taatoa i te tapea tariˈa auro i nia i to ratou tariˈa e hopoi maira ia Aarona ra.
4 Rave maira oia i te auro ta ratou i hopoi mai, e hamani ihora i te tahi tii fanauˈa puaatoro*+ i te hoê mauhaa nanaˈo. Parau maira ratou: “Teie to oe Atua, e Iseraela, tei aratai ia oe i rapae i te fenua o Aiphiti.”+
5 I to Aarona iteraa i te reira, hamani ihora oia i te tahi fata i mua i te tii. Tuô ihora Aarona: “E tupu te hoê oroa no Iehova ananahi.”
6 Ananahi aˈe, tia aˈera ratou i te poipoi roa e pûpû aˈera ratou i te tusia taauahi e te tusia no te hau. Parahi ihora te nunaa, tamaa aˈera ratou e inu aˈera. Tia aˈera ratou no te arearea.+
7 Na ô maira ïa Iehova ia Mose: “A haere, a pou, no te mea to oe nunaa, ta oe i aratai i rapae i te fenua o Aiphiti, ua haaviivii ratou ia ratou.+
8 Ua oioi ratou i te hahi-ê-raa i te eˈa ta ˈu i faaue ia ratou ia na reira i te haere.+ Ua hamani ratou no ratou iho i te tahi tii fanauˈa puaatoro,* e te piˈo noa ra ratou i raro i mua i te reira e te pûpû ra i te tusia i te reira a na ô ai: ‘Teie to oe Atua, e Iseraela, tei aratai ia oe i rapae i te fenua o Aiphiti.’”
9 Na ô faahou maira Iehova ia Mose: “Ua ite atu vau e nunaa mârô* teie.+
10 No reira, a vaiiho na ia ˈu, e haamou vau ia ratou i roto i to ˈu riri rahi, o oe râ ta ˈu e faariro ei nunaa rahi.”+
11 Taparu ihora ïa Mose ia* Iehova to ˈna Atua+ e parau atura: “No te aha, e Iehova, e faatae ai oe i to oe riri rahi i nia i to oe nunaa, i muri iho i to oe aratairaa ia ratou i rapae i te fenua o Aiphiti i te mana rahi e te rima puai?+
12 No te aha hoi to Aiphiti e parau ai: ‘E opuaraa ino ta ˈna i to ˈna aratairaa ia ratou i rapae. Ua hinaaro oia e haapohe ia ratou i te mau mouˈa e e haamou ia ratou mai nia mai i te fenua’?+ A faaore na i to oe riri rahi e a hoˈi mai i nia* i ta oe faaotiraa e faatae i teie ati i nia i to oe nunaa.
13 A haamanaˈo i to mau tavini o Aberahama, Isaaka, e o Iseraela ta oe i horeo ia oe iho a na ô ai: ‘E faarahi au i to huaai mai te mau fetia o te raˈi,+ e e horoa vau i teie fenua taatoa ta ˈu i faaoti no to huaai, ia fatu ratou i te reira e a muri noa ˈtu.’”+
14 Hoˈi maira ïa Iehova i nia* i ta ˈna faaotiraa e faatae i te ati i nia i to ˈna nunaa.+
15 Fariu maira Mose e pou ihora oia i raro mai nia mai i te mouˈa e na piti pǎpǎ ofai o te Haamanaˈoraa+ i roto i to ˈna rima.+ Ua papaihia na pǎpǎ ofai i na pae e piti, ua papaihia i mua e i muri.
16 E ohipa na te Atua na pǎpǎ ofai, e te papairaa, e papairaa na te Atua tei nanaˈohia i nia iho i na pǎpǎ ofai.+
17 I te faarooraa Iosua i te maniania a te nunaa no ta ratou tutuôraa, parau atura oia ia Mose: “E huro tei te puhapa.”
18 Parau maira râ Mose:
“E ere i te himene a te feia upootia,E ere atoa i te oto o te feia tei pau.E huru himene ê â ta ˈu e faaroo ra.”
19 I te piriraa iho â Mose i te puhapa e to ˈna iteraa i te tii fanauˈa puaatoro+ e te mau oriraa, ura ihora oia i te riri, e taora ihora i na pǎpǎ ofai no roto i to ˈna rima e huˈahuˈa roa aˈera te reira i te tumu mouˈa.+
20 Rave maira oia i te tii fanauˈa puaatoro ta ratou i hamani, tanina ihora e pâpâhia ihora i te reira a huˈahuˈa roa ˈtu ai.+ Ueue atura oia i te reira i roto i te pape e faainu atura i te reira i te ati Iseraela.+
21 Na ô atura Mose ia Aarona: “Eaha ta teie nunaa i rave ia oe i hopoi mai ai oe i te hara rahi i nia ia ratou?”
22 Pahono maira Aarona: “Eiaha e riri mai, to ˈu fatu. Ua ite maitai oe e nunaa ohipa ino teie.+
23 Ua parau mai ratou ia ˈu: ‘A hamani no tatou i te tahi atua o te haere na mua ia tatou, aita hoi tatou i ite eaha tei tupu no tera Mose, te taata tei aratai ia tatou i rapae i te fenua o Aiphiti.’+
24 Ua na ô atu ïa vau ia ratou: ‘Te taata atoa e auro ta ˈna, a tatara a hopoi mai.’ Ua taora vau i te reira i roto i te auahi e ua noaa mai teie nei tii fanauˈa puaatoro.”
25 Ite ihora Mose e e nunaa vî ore teie, ua tuu hoi Aarona ia ratou ma te ore e haavî, a riro atu ai ei haamaraa i mua i to ratou mau enemi.
26 Tia ˈtura Mose i te uputa o te puhapa e parau atura: “O vai tei te pae o Iehova? A haere mai ia ˈu nei!”+ Putuputu ihora pauroa te ati Levi ati aˈe ia ˈna.
27 Parau atura oia ia ratou: “Teie ta Iehova te Atua o Iseraela i parau: ‘A hatua ia outou tataitahi i ta outou ˈoˈe e a haere na roto i te puhapa taatoa mai te tahi uputa i te tahi atu uputa, a haapohe ai i to outou taeae, to outou taata tupu e to outou hoa piri.’”+
28 Rave aˈera te ati Levi mai ta Mose i parau. No reira, piri i te 3 000 tane tei haapohehia i taua mahana ra.
29 Parau atura Mose: “A faataa ia outou iho* no Iehova i teie mahana, ua aro hoi outou tataitahi i ta outou iho tamaiti e to outou iho taeae.+ E horoa oia na outou i te hoê haamaitairaa i teie mahana.”+
30 Ananahi aˈe, parau atura Mose i te nunaa: “E hara rahi ta outou i rave, e i teie nei e pauma vau ia Iehova, peneiaˈe e nehenehe au e tapoˈi i ta outou hara.”+
31 Hoˈi atura ïa Mose ia Iehova ra e parau atura: “E hara rahi mau ta teie nunaa i rave! Ua hamani ratou i te tahi atua auro no ratou!+
32 Teie nei râ, ia hinaaro oe, a faaore i ta ratou hara.+ Ia ore, a tumâ na i to ˈu nei iˈoa i roto i te buka ta oe i papai.”+
33 Tera râ, na ô maira Iehova ia Mose: “Te taata i hara ia ˈu, to ˈna te iˈoa ta ˈu e tumâ i roto i ta ˈu buka.
34 A haere râ, a aratai i te nunaa i te vahi ta ˈu i parau ia oe. Inaha, e na mua ta ˈu melahi ia oe,+ e i te mahana e haava ˈi au, e faautua vau ia ratou no ta ratou hara.”
35 Haamata ihora Iehova i te tairi i te nunaa i te ati no te mea ua hamani ratou i te tahi tii fanauˈa puaatoro, ta Aarona i hamani.
Nota i raro i te api
^ Aore ra “tii fanauˈa puaatoro faatôhia.”
^ Aore ra “tii fanauˈa puaatoro faatôhia.”
^ Heb: “aˈî etaeta.”
^ Aore ra “Tamǎrû ihora ïa Mose i te aro o.”
^ Aore ra “tatarahapa.”
^ Aore ra “Tatarahapa ihora ïa Iehova.”
^ Heb: “faaî i to outou rima.”
