Numera 19:1-22
-
Te puaatoro uteute e te pape tamâraa (1-22)
19 Paraparau faahou maira Iehova ia Mose raua Aarona a na ô ai:
2 “E faatureraa teie o te ture ta Iehova i faaue: ‘A parau i te ati Iseraela ia rave mai no oe i te hoê puaatoro uteute oraora maitai, aita e ino i nia iho+ e aita i amo aˈenei i te zugo.
3 E horoa oe i te reira ia Eleazara te tahuˈa, ta ˈna e aratai i rapaeau i te puhapa, e e tupaihia te reira i mua ia ˈna.
4 E rave Eleazara te tahuˈa maa vahi o to ˈna toto i to ˈna manimani rima, a pîpî atu ai i to ˈna toto e hitu taime i mua mau i te tiahapa o te amuiraa.+
5 E taninahia te puaatoro i mua i to ˈna mata. To ˈna iri, to ˈna iˈo, to ˈna toto e to roto i to ˈna aau te taninahia.+
6 E e rave te tahuˈa i te raau arezi, te hisopa+ e te ahu uteute a taora ˈtu ai i roto i te auahi i reira te taninahia ra te puaatoro.
7 I reira te tahuˈa e horoi ai i to ˈna mau ahu e e hopu ai ia ˈna i te pape, e i muri iho oia e nehenehe ai e haere mai i roto i te puhapa. E viivii râ te tahuˈa e ahiahi noa ˈtu.
8 “‘E horoi te taata tei tanina i te puaatoro i to ˈna mau ahu, e hopu oia ia ˈna i te pape e e viivii oia e ahiahi noa ˈtu.
9 “‘Na te hoê taata viivii ore e haaputu i te rehu auahi o te puaatoro+ a vaiiho atu ai i te reira i rapaeau i te puhapa i te tahi vahi viivii ore e e faahereherehia te reira no te amuiraa o te ati Iseraela no te faaineine i te pape e faaohipahia no te tamâraa.+ E tusia no te hara teie.
10 E horoi te taata tei haaputu i te rehu auahi o te puaatoro i to ˈna mau ahu e e viivii oia e ahiahi noa ˈtu.
“‘E riro te reira ei faatureraa vai maoro no te ati Iseraela e te taata ê e noho ra i ǒ ratou.+
11 E viivii te taata e tapea i te tahi taata pohe e hitu mahana.+
12 E tamâ taua taata ra ia ˈna i te pape* i te toru o te mahana, e e mâ oia i te hitu o te mahana. Ia ore râ oia ia tamâ ia ˈna i te toru o te mahana, eita oia e mâ i te hitu o te mahana.
13 O te tapea i te tino o te tahi taata pohe, e o te ore e tamâ ia ˈna, ua haaviivii oia i te sekene+ a Iehova e e haapohehia taua taata ra no roto mai ia Iseraela.+ No te mea aita te pape no te tamâraa+ i pîpîhia i nia iho ia ˈna, e viivii noa oia. E vai to ˈna viivii i nia ia ˈna.
14 “‘Teie te ture te haapaohia ia pohe te hoê taata i roto i te tahi fare ie: Pauroa te taata e tomo i roto i te fare ie aore ra to roto ê na i te fare ie, e viivii ratou e hitu mahana.
15 Pauroa te farii fatafata e aita i oroihia, mea viivii+ ïa.
16 Pauroa te taata i rapae e tapea i te tahi taata tei haapohehia i te ˈoˈe, i te tahi tino pohe, i te hoê ivi taata aore ra i te tahi menema, e viivii oia e hitu mahana.+
17 E ravehia no te taata viivii maa vahi o te rehu auahi o te tusia no te hara tei taninahia, a ninii atu ai i te pape maaro i nia iho i roto i te tahi farii.
18 I reira te tahi taata viivii ore+ e rave ai i te hisopa+ ta ˈna e tutau i roto i te pape a pîpî atu ai i nia iho i te fare ie e pauroa te farii e i nia iho i te mau taata to roto, e i nia iho i te taata tei tapea i te ivi, i te taata tei taparahihia, i te tino pohe aore ra i te menema.
19 E pîpî te taata viivii ore i te reira i nia iho i te taata viivii i te toru o te mahana e i te hitu o te mahana, e e tamâ oia ia ˈna i te hara i te hitu o te mahana.+ I reira oia e horoi ai i to ˈna mau ahu e e hopu ai ia ˈna i te pape, e e mâ oia i te ahiahi.
20 “‘Te taata râ tei viivii e te ore e tamâ ia ˈna, e haapohehia oia no roto mai i te amuiraa,+ no te mea ua haaviivii oia i te nao* o Iehova. Aita hoi te pape no te tamâraa i pîpîhia i nia iho ia ˈna, mea viivii ïa oia.
21 “‘E riro te reira ei faatureraa vai maoro no ratou: E horoi te taata e pîpî ra i te pape no te tamâraa+ i to ˈna mau ahu, e e viivii te taata e tapea ra i te pape no te tamâraa e ahiahi noa ˈtu.
22 E viivii te mau mea atoa ta te taata viivii e tapea, e e viivii te taata e tapea ia ˈna e ahiahi noa ˈtu.’”+
