Ua paari au i Los Angeles i Kalifonia, i te mau aroâ matauhia e te mau pûpû taata ohipa ino e tapihoo ra i te mau raau taero. E ono tamarii ta to ˈu nau metua e o vau te piti.

Ua paari matou i roto i te ekalesia evanelia na muri to ˈu mama. Tera râ, i to ˈu apîraa ua haamata vau i te rave i te ohipa ino. I te Tapati, i himene na vau i roto i te pûpû himene i te fare pure. I te toea râ o te hebedoma, e haere au e arearea, e rave i te raau taero e e rave i te peu taotoraa tia ore.

E taata iria roa vau. Ia taputô vau, e rave au i te ohipa na mua mai no te aro atu. Aita te mea ta ˈu i haapii i te fare pure i tauturu mai ia ˈu. E pinepine au i te parau: “Na te Fatu e tahoo, o vau ta ˈna mauhaa i roto i te rima!” I te matahiti 1960, i te haapiiraa tuarua, ua pee au i te Black Panthers, e pûpû poritita o te paturu ra i te tiaraa taata. E ua riro mai au e mero o te hoê taatiraa piahi o te paturu ra i te tiaraa taata. E rave rahi taime, i faatupu na matou i te mau taahiraa. E no tera mau taahiraa e opani roa te fare haapiiraa tuarua.

Aita teie mau taahiraa i haamâha i to ˈu huru iria. Ua haamata ïa vau i te rave i te ohipa ino. Ei hiˈoraa, i haere na vau e to ˈu mau hoa e mataitai i te hohoˈa teata e faataa ra i te mauiui ta te feia i faatîtîhia no Afirika i faaruru i Marite. No to matou hae, ua taparahi matou i te mau taurearea uouo i roto i te fare teata. Aita i navai, haere roa matou i roto i te aroâ e faaea ˈi te feia uouo no te taparahi te taata.

I te paariraa mai au, mea rahi ta ˈu ohipa ino i rave, ua na reira atoa to ˈu nau taeae. Ua matau maitai te mau mutoi ia matou. Te roto hoê o to ˈu taeae apî aˈe ia ˈu i te hoê pûpû taata ohipa ino e ua faaô atoa vau i roto i tera pûpû. Ua haere ino noa ˈtura to ˈu oraraa.

E Ite no Iehova te metua o to ˈu hoa. Ua titau manihini mai ratou ia ˈu ia apiti i ta ratou putuputuraa, e ua farii au. Te taa-ê-raa ta ˈu i ite, e Bibilia ta te taata tataitahi e te faaohipa nei ratou i te putuputuraa. E te horoa ra te feia apî i te tumu parau! Ua faahiahia roa vau i te haapii e iˈoa to te Atua, o Iehova, e ia faaroo ia ratou ia faaohipa i tera iˈoa. (Salamo 83:18) Mea hoê roa ratou noa ˈtu ua rau te nunaa i roto i tera amuiraa.

I te omuaraa, aita vau i hinaaro e haapii i te Bibilia e te mau Ite no Iehova, mea au râ na ˈu e apiti i ta ratou mau putuputuraa. I te hoê po a apiti ai au i te putuputuraa, ua haere te tahi o to ˈu mau hoa e arearea. I ǒ, ua taparahi pohe roa ratou i te hoê taurearea no te mea aita oia i horoa i to ˈna pereue. I te mahana i muri iho, ua faahiahia roa ratou i te ohipa ta ratou i rave. A haavahia ˈi ratou, mai te huru ra e ere te ohipa ta ratou i rave i te ohipa ino. Ua faautuahia vetahi o ratou i te fare auri e eita ratou e matara faahou mai. Auê au i te oaoa e aita vau i haere na muri ia ratou i tera po. Faaoti atura vau e taui i to ˈu oraraa e i te haapii i te Bibilia.

Ua ora vau i roto i tera oraraa e te vai ra te au oreraa i te tahi atu nunaa, ua faahiahia roa vau i te tahi mau mea ta te mau Ite no Iehova e rave ra. I te hoê mahana, ua vaiiho te hoê Ite no Iehova uouo i ta ˈna tamarii i te hoê utuafare ereere. I te tahi atu mahana, ua rave mai te hoê utuafare uouo i ǒ ratou i te hoê taurearea ereere o te imi ra i te hoê nohoraa. Ua haapapu teie mau tupuraa e te faaohipa ra te mau Ite no Iehova i ta Iesu i parau i roto i te Ioane 13:35: “I te mea e mea here outou te tahi i te tahi, e ite ïa te taata atoa e e pǐpǐ outou na ˈu.” Ua taa ia ˈu e ua itehia mai ia ˈu te hoê fetii taeae.

Ua haaferuri ta ˈu haapiiraa Bibilia ia ˈu e ua taa ia ˈu e mea titauhia ia taui au i to ˈu huru feruriraa ma te faatupu i te hau. E oia atoa ia farii au e tera te oraraa maitai aˈe. (Roma 12:2) Ua rave riirii au i te mau tauiraa. I Tenuare 1974, ua riro mai au ei Ite no Iehova.

Ua tamau noa vau i te rave i te mau tauiraa i muri aˈe i to ˈu bapetizoraa. I te hoê mahana a poro ai au, ua tapapa vau i te hoê taurearea o te eiâ i ta ˈu radio i roto i to ˈu pereoo. Fatata roa oia i te noaa mai ia ˈu, faarue mai nei oia i ta ˈu radio e horo atura. I to ˈu faatiaraa ia vetahi mea nafea te noaaraa mai ia ˈu ta ˈu radio, na ô mai nei te hoê matahiapo ia ˈu: “Stephen, mai te peu ua noaa ia oe eaha ïa ta oe e rave i nia ia ˈna?” Ua turai ta ˈna uiraa ia ˈu ia tamau ta ˈu mau tutavaraa ia vai hau noa e o vetahi.

I Atopa 1974, ua haamata vau i te taviniraa taime taatoa, ua haapii au i te taata i te Bibilia e 100 aˈe hora i te avaˈe. Ua haere atoa vau i te pu rahi a te mau Ite no Iehova i Brooklyn, Marite ei rima tauturu. I te matahiti 1978, ua hoˈi i Los Angeles no te haapao i to ˈu mama tei maˈihia. Piti matahiti i muri iho, ua faaipoipo vau ia Aarhonda. Ua tauturu mau â Aarhonda ia ˈu no te haapao i to ˈu mama e pohe noa ˈtu oia. I muri aˈe, ua apiti mâua i te haapiiraa Gileada, te haapiiraa no te mau mitionare Ite no Iehova. Ua tonohia mâua i Panama, i reira noa â mâua e tavini ai ei mitionare.

Mai to ˈu bapetizoraahia, e rave rahi tupuraa e tupu ai to ˈu riri. Ua haapii ra vau e nafea ia haavî ia ˈu aore ra e tamata vau i te tamǎrû ia ˈu. Ua haapopou mai vetahi e ta ˈu vahine atoa no to ˈu huru i mua i te fifi. Ua maere roa vau ia ˈu iho! Ua ite ra vau e maoti te puai o te Bibilia i rave ai au i teie mau tauiraa.—Hebera 4:12.

Ua tauturu mau â te Bibilia ia ˈu i roto i to ˈu oraraa e e nafea ia vai hau noa. Eita vau e taparahi faahou i te taata e tauturu râ vau ia ratou ia maitai mai i te pae varua. Ua haapii atoa vau i te Bibilia i te hoê taata e enemi mâua a haere ai au i te haapiiraa tuarua! I muri mai i to ˈna bapetizoraahia, e hoa piha mâua e e hoa noa â mâua. Tae roa mai i teie mahana, 80 taata o tei riro mai ei Ite no Iehova ta mâua Aarhonda i haapii i te Bibilia.

Te haamauruuru nei au ia Iehova no te mea maoti o ˈna, i ite ai au i te maitai i roto i to ˈu oraraa e te oaoa ia amui e te hoê fetii taeae.