Mai to ˈna tamariiraa, ua ora e ua ohipa Samuela i te sekene, te vahi e haere ai te nunaa e haamori ia Iehova. Ua ite anei oe mea nafea Samuela i te taeraa i reira? Na mua, e hiˈo anaˈe eaha te parau no nia i te mama o Samuela, Hana.

Mea maoro to Hana hinaaroraa i te hoê aiû, eita râ ta ˈna e nehenehe e fanau. Ua pure ïa o ˈna ia Iehova e ua taparu ia tauturu atu. Ua parau oia ia ˈNa e ia noaa ta ˈna te hoê tamaiti, e horoahia ïa no te ora e no te ohipa i te sekene. Ua pahono Iehova i ta ˈna pure e noaa mai nei ta ˈna tamaiti, o Samuela to ˈna iˈoa. Mai ta ˈna i parau, a tia ˈi to te tama e toru aore ra maha matahiti, ua aratai Hana ia ˈna i te sekene no te tavini ia Iehova.

Ei Tahuˈa rahi i te sekene, o Eli te tia rahi o te nunaa i mua i te Atua. E piti ta ˈna tamaroa paari e rave ra i te ohipa i reira. Te haamanaˈo ra oe e e vahi te sekene e haere ai te taata e haamori ia Iehova? Te auraa, e mau ohipa maitatai ïa te itehia i reira. Ua ite râ Samuela i te mau peu iino roa ta te mau tamaiti a Eli i rave. Ua na reira atoa anei o ˈna?— Aita, ua rave noa Samuela i te mea tia mai ta to ˈna na metua i haapii atu.

I to oe manaˈo, eaha te tia ia Eli ia rave no ta ˈna na tamaiti?— E mea tia ia faautua e ia ore faahou e faatia ia raua ia ohipa i roto i to te Atua fare. Aita râ Eli i na reira. Ua riri atura Iehova ia ˈna e i ta ˈna na tamaiti, faaoti aˈera ïa i te faautua ˈtu.

I te tahi po, te taoto noa ra Samuela i faaroo ai oia i te hoê reo i te na ô: ‘Samuela!’ Horo atura o ˈna ia Eli, pahono mai nei oia: ‘Aore au i pii ia oe.’ Ua tupu te reira e piti â taime. I muri aˈe i te toru o te piiraa, ua parau Eli ia Samuela e ia faaroo faahou oia i te reo, ia na ô atu oia: ‘A parau mai e Iehova e, te faaroo atu nei au.’ Ua na reira iho â Samuela. Ua faaue atura Iehova: ‘A parau na ia Eli e e faautua vau i to ˈna utuafare no te mau peu  iino ta ratou i rave.’ I to oe manaˈo, mea ohie anei no Samuela ia faaite i tera poroi ia Eli?— Eita. Noa ˈtu e ua riaria Samuela, ua faaite atu oia i ta Iehova mau parau e ua tupu iho â mai ta ˈna i faahiti. Ua haapohehia na tamaiti e pohe aˈera atoa Eli i muri aˈe.

E hiˈoraa maitai Samuela no tatou. Noa ˈtu te ohipa ino a vetahi ê, ua rave noa o ˈna i te mea tia. E oe? E riro anei oe mai ia Samuela? E tamau anei oe i te rave i te mea tia? Ia na reira oe, e ere noa to oe na metua te oaoa, o Iehova atoa râ!