HAAPIIRAA 6
Eaha te tiaturiraa no te feia pohe?
1. Eaha te parau apî oaoa no tei pohe?
I to Iesu taeraa ˈtu i Betania i pihai ia Ierusalema, a maha ˈtura mahana te poheraa to ˈna hoa o Lazaro. Haere atura oia e o Mareta raua Maria, na tuahine o Lazaro, i te menema. Tae maira te hoê nahoa taata. Eaha paha Mareta raua Maria i te oaoa i to Iesu faahoˈiraa mai ia Lazaro i te ora!—A taio i te Ioane 11:21-24, 38-44.
Ua ite ê na Mareta i te parau apî oaoa no tei pohe. E faahoˈi mai Iehova ia ratou i te ora i te fenua.—A taio i te Isaia 26:19.
2. Eaha te tupu ia pohe te taata?
Ua na ô te Atua ia Adamu: “E repo hoi oe, e e hoˈi faahou atu â oe i te repo.”—GENESE 3:19.
Ua hamanihia te taata i te repo. (Genese 2:7; 3:19) E ere tatou i te varua i roto i te hoê tino iˈo. E taata tatou, aita ïa e mea e ora ˈtu ia pohe tatou. Ia pohe tatou, e pohe atoa to tatou roro e e mou to tatou manaˈo. No reira Lazaro i ore ai i faatia i ta ˈna i ite a pohe ai o ˈna. Aita hoi e parau itea a tei pohe.—A taio i te Koheleta 9:5, 6, 10.
E haamauiui anei te Atua i te feia pohe i roto i te auahi? E haapiiraa hape mau â te po auahi e faaino ra ia ˈna. Te parau ra hoi te Bibilia e aita e parau itea a tei pohe. Mea au ore roa na te Atua te manaˈo e haamauiui i te taata i roto i te auahi.—A taio i te Ieremia 7:31.
A hiˈo i te video Eaha te tupu ia pohe te taata?
3. E nehenehe anei tei pohe e paraparau mai?
Eita te feia pohe e paraparau, eita atoa e faaroo. (Salamo 115:17) Mea ino râ te tahi mau melahi. E nehenehe ratou e paraparau mai ma te rave i te hohoˈa aore ra te reo o te feia pohe. (Petero 2, 2:4) Eiaha roa ˈtu e tamata i te paraparau i tei pohe, ta Iehova ïa e faaue maira.—A taio i te Deuteronomi 18:10, 11.
4. O vai te faahoˈihia mai i te ora?
E rave rahi mirioni taata pohe te hoˈi mai i te ora i te fenua. E tia atoa mai te tahi mau taata aita i ite i te Atua e tei rave i te ino.—A taio i te Luka 23:43; Ohipa 24:15.
E nehenehe te feia e faatiahia mai e ite i te parau mau no nia i te Atua e e tiaturi ia Iesu ma te auraro ia ˈna. (Apokalupo 20:11-13) Te feia e tia mai a rave ai i te maitai, e ora ïa e a muri noa ˈtu i te fenua.—A taio i te Ioane 5:28, 29.
5. Eaha ta te tia-faahou-raa e faaite maira no nia ia Iehova?
Ua tono mai te Atua i ta ˈna Tamaiti ia pohe no tatou, a horoa mai ai i te tiaturiraa no te feia pohe. Te faaite maira ïa te tia-faahou-raa i te here e te maitai rahi o Iehova. O vai iho â râ ta oe e hinaaro e farerei ia hoˈi mai tei pohe i te ora?—A taio i te Ioane 3:16; Roma 6:23.
