TE TUPU RA

Ia ahoaho te taata, e hepohepo e e haapeapea rahi oia. E nehenehe tatou paatoa e ahoaho no te mea te ora nei tatou i roto i te hoê ao papu ore.

TA TE BIBILIA E PARAU RA

Ua papai te arii ra o Davida: “Mai te aha ra te maoro o to ˈu feruriraa i roto i to ˈu nei aau ma te oto i roto i to ˈu nei varua i te mau mahana atoa ra?” (Salamo 13:2) Eaha tei tauturu ia Davida? Ua haamahora oia i to ˈna aau na roto i te pure ma te tiaturi papu te here mau ra te Atua ia ˈna. (Salamo 13:5; 62:8) No reira te Atua e faaitoito atoa mai ai ia faaite ia ˈna i te mea e haapeapea ra ia tatou. Te na ô ra hoi te Petero 1, 5:7: “E huri i to outou ahoaho atoa i nia [i te Atua]; oia hoi te tiai mai ia outou.”

E pinepine, te vai ra te ravea no te faaiti i to tatou ahoaho. Ua haapeapea te taata papai Bibilia ra o Paulo no te mau Kerisetiano. Ua haa rahi râ oia no te faaitoito e no te tauturu ia ratou. (Korinetia 2, 11:28) I roto i tera tupuraa, mea maitai ta ˈna haapeapearaa. Ua turai hoi te reira ia ˈna ia tauturu ia vetahi ê. Mea maitai ïa ia na reira atoa tatou. Ia ore tatou e haapeapea no vetahi ê, te auraa ïa aita te here i roto ia tatou.—Maseli 17:17.

“Eiaha hoi te taata atoa e haapao i ta ˈna anaˈe ihora, e haapao atoa râ i to vetahi ê ra maitai.”—Philipi 2:4.

TE TUPU RA

E ahoaho paha te taata no te mau hapa ta ratou i rave, no to tatou ananahi aore ra no te fifi i te pae moni. a

TA TE BIBILIA E PARAU RA

No te mau hapa i ravehia: I te senekele matamua, hou a riro ei Kerisetiano, e feia inu hua i te ava vetahi, e taviri taata, e faaturi e e eiâ. (Korinetia 1, 6:9-11) Ua faaea râ ratou i te rave i tera mau peu, ua taui e ua tiaturi i te aroha hamani maitai o te Atua. Te na ô ra te Salamo 130:4: “Tei [te Atua] ra te faaore i te hara.”

No to tatou ananahi: Te na ô ra Iesu Mesia: “Eiaha e tapitapi i to ananahi ra, na ananahi hoi e tapitapi i ta ˈna iho.” (Mataio 6:25, 34) Eaha ïa te auraa? A haapao noa i te mau fifi o teie mahana. Eiaha e haapeapea i to ananahi atu, e haafifi hoi te reira i te feruriraa e e rave tatou i te mau faaotiraa iino. A haamanaˈo eita atoa paha te mea ta tatou e haapeapea ra e tupu.

No te fifi i te pae moni: I te hoê mahana, ua pure te hoê taata î i te paari ma te na ô: “Eiaha e tuuhia mai te veve e te taoˈa rahi ia ˈu nei.” (Maseli 30:8) Ua mauruuru noa oia i te mea e vai ra ia ˈna. E haamaitai te Atua i tei faaite i tera huru maitai. Te taio ra tatou i roto i te Hebera 13:5: “Ei parahiraa nounou taoˈa ore to outou, ia mauruuru i ta outou i noaa ra; o te Atua iho hoi tei parau mai e, E ore roa vau e taiva ia oe, e ore roa vau e faarue ia oe, e ore, e ore roa ˈtu.” E ere te Atua mai te moni, eita hoi oia e faarue i te feia e tiaturi ra ia ˈna e tei maiti i te hoê oraraa haapae.

“Aitâ . . . vau i ite i te feia parau-tia i te faarueraahia, e to ˈna ra huaai i te aniraa i te maa.”—Salamo 37:25.

TA TE TAATA E PARAU RA

Ua parau te papai vea ra o Harriet Green i roto i te tahi vea The Guardian i matara i 2008: “Teie te tau ahoaho roa ˈˈe.” I 2014, ua papai Patrick O’Connor i roto i te vea The Wall Street Journal, “tei Marite te feia ahoaho roa ˈˈe.”

TA TE BIBILIA E PARAU RA

“E oto tei te aau o te taata ra, e piˈo ïa i raro; hoê roa râ parau maitai ra, oaoa aˈera ïa.” (Maseli 12:25) E “parau maitai” te parau apî oaoa o te Basileia o te Atua. (Mataio 24:14) Fatata roa tera Basileia, te faatereraa ïa a te Atua, i te faaore roa i te ahoaho e te mau mea e faatupu ra i te reira, mai te maˈi e te pohe! “E na te Atua e horoi i to [tatou] roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”—Apokalupo 21:4.

“Ia faaîhia mai outou i te oaoa e te hau i te faarooraa e te Atua, e noaa ˈi te tiaturiraa.”—Roma 15:13.