IA AU I TE BIBILIA
Ia pohe te taata
E haere anei te feia pohe i te tahi vahi taa ê?
“E repo hoi oe, e e hoˈi faahou atu â oe i te repo.”—Genese 3:19.
TA TE TAATA E PARAU RA
Te manaˈo nei vetahi e i muri aˈe i te pohe, e oraraa to ratou i te raˈi, i roto i te po auahi, te vahi tamâraa hara aore ra i te tahi atu vahi. Te vai ra te feia e tiaturi e e fa faahou ratou i roto i te tino ê. No te tahi atu râ, te patoi nei ïa i tera mau tiaturiraa no te mea no ratou, o te pohe te hopea o te taata atoa.
TA TE BIBILIA E PARAU RA
Te na ô ra te Koheleta 9:10: “Aore hoi e ohipa, aore e imiraa, aore hoi e ite, aore hoi e paari, i te apoo ta oe e haere na.” Te faaite atoa ra te Bibilia eaha te tupu ia pohe te taata e te animara ma te na ô: “Te haere nei ratou i te vahi otahi; no te repo anaˈe ratou e te hoˈi anaˈe nei i te repo.”—Koheleta 3:20.
Eaha te tupu ia pohe te taata?
“Te reva nei hoi to ˈna varua, te hoˈi nei oia i to ˈna ra repo; mou roa ˈtura ta ˈna i opua i taua mahana ra.”—Salamo 146:4.
TA TE TAATA E PARAU RA
E rave rahi tei haapiihia e tei te huru o to oe oraraa i te fenua nei e ite ai oe i te vahi e haere ai oe i muri aˈe i te pohe. Ua rave anaˈe oe i te ohipa maitai, e fanaˈo oe i te oaoaraa rahi e a muri noa ˈtu. Mai te peu e e ohipa ino, e haamauiuihia ïa oe e a muri noa ˈtu. Te auraa ïa e, ia tamâhia te taata i ta ˈna mau hara hou a tia ˈtu ai i mua i te aro o te Atua i muri aˈe i to ˈna poheraa. O tei ore i na reira, e ere roa ratou i tera fanaˈoraa e a muri noa ˈtu.
TA TE BIBILIA E PARAU RA
Eita te feia pohe e nehenehe e oaoa e e mauiui. I te mea e aita faahou te ora i roto i to ratou tino, eita tei pohe e ite noa ˈˈe i te haapaoraa, eita atoa e nehenehe e tauturu aore ra e hamani ino i te feia e ora nei. Ia au i te Koheleta 9:5, 6: “Ua ite te feia e ora nei, e pohe ratou, aita râ a te feia i pohe ra e parau itea . . . To ratou aroha e to ratou riri, e to ratou feii, ua mou anaˈe ïa; aita hoi a ratou e tufaa e a muri noa ˈtu i te mau mea atoa e ravehia i raro aˈe i te mahana nei.”
Te vai ra anei te tiaturiraa no tei pohe?
“Ia pohe te taata nei, e ora faahou anei? E tiai au i to ˈu pue mahana i haapaohia ra e ia hope, e ia tae i te taime e faahoˈihia ˈi au ra.”—Ioba 14:14.
TA TE TAATA E PARAU RA
Ua matauhia e ia haere te tahi taata i te po auahi, aita faahou e tiaturiraa to ˈna. E haamauiuihia o ˈna e a muri noa ˈtu. No te feia râ e haere i te vahi tamâraa hara, e nehenehe ratou e fanaˈo i te oaoaraa rahi i te raˈi ia tamâhia ratou i te auahi i ta ratou mau hara na mua.
TA TE BIBILIA E PARAU RA
Ia hope to ratou taotoraa i roto i te pohe, e faatia mai te Tamaiti a te Atua i te feia pohe no te ora i te fenua nei. Te na ô ra te Bibilia: “Eiaha e maere i te reira; te fatata mai nei hoi te hora e faaroo ai te feia atoa i roto i te apoo ra i tana reo, e e haere mai i rapae.” (Ioane 5:26, 28, 29) E fanaˈo te tahi taata i te ora mure ore ia au to ˈna haerea i muri aˈe i te tia-faahou-raa. a
a No te ite atu â no nia i te tia-faahou-raa, a hiˈo i te pene 7 o te buka Eaha ta te Bibilia e haapii mau ra? piahia e te mau Ite no Iehova.
E au atoa outou . . .
TE PAHONO RA TE BIBILIA
Eaha te Hade e te Gehena ia au i te Bibilia?
Rave rahi taata e tiaturi i te po auahi, hoê vahi e auahi pohe ore to roto e e tuuhia te feia ino no te faautua ˈtu. Tera anei râ ta te Bibilia e haapii mau ra?
TE PAHONO RA TE BIBILIA
Te haapii ra anei te Bibilia e ora faahou tatou i roto i te tino ê?
Eaha te tupu ia pohe te hoê taata?
TE PAHONO RA TE BIBILIA
Te faahiti ra anei te Bibilia i te hoê vahi tamâraa hara?
E maere paha oe a ite ai nohea mai tera haapiiraa.
