A hiˈo ai i te mau parau faaite o ta oe afata moni, aita rea faahou i nia iho. No faaipoipo noa ˈtura oe e ua rahi roa te mau haamâuˈaraa. No to oe hoa faaipoipo anei te hape? Eiaha e manaˈo oioi mai tera! Ma te haa amui, a feruri i ta oe e ta ˈna i rave i topa ˈi orua i roto i tera fifi. a

Te faatanoraa i te manaˈo. Mai te peu e ua ora noa oe i te fetii na mua ˈˈe, mea apî paha no oe te aufauraa i te mau haamâuˈaraa. Peneiaˈe atoa e mea taa ê to manaˈo e to to oe hoa faaipoipo no nia i te moni. Ua matau paha te tahi i te haamâuˈa i te moni e te tahi atu i te tarani. E titauhia te taime ia nehenehe na hoa faaipoipo ia taui e ia faatano i to raua manaˈo no te haapao i ta raua moni.

Te oreraa e rave oioi i te tahi ohipa. Mea rahi ta Jim faufaa i teie nei. Ua parau râ oia e i te haamataraa o to ˈna faaipoiporaa, ua pau rahi ta ˈna moni no to ˈna ite ore i te haapao i te reira. Te na ô ra oia: “I te mea e aita vau i aufau oioi i tera e tera mea, ua faautuahia mâua ta ˈu vahine ia aufau i te tino moni rahi aˈe. Ua pau roa ta mâua moni!”

Te oreraa e ite i ta oe moni. Mea ohie roa ia haamâuˈa i te moni ia ore oe e ite ehia to roto i ta oe pute. Tera iho â ia pinepine oe i te aufau e i te hoo mai i nia i te Internet aore ra ma te faaohipa i te matini uira. E hema hanoa atoa te feia faaipoipo apî i te tarahu i te fare moni.

Noa ˈtu eaha te tumu, e nehenehe te moni e haafifi i to oe faaipoiporaa. Ia au i te tahi buka, “noa ˈtu ehia moni ta ratou, ua faaite te rahiraa o te feia faaipoipo e tera te fifi matamua roa. E pinepine no te moni e rave rahi e tatamaˈi ai.”—Fighting for Your Marriage.

A faaoti i te haa amui. Eiaha te tahi e faahape i te tahi atu, a haa amui râ no te ore faahou e haamâuˈa i te moni. I te haamataraa o ta orua tauaparauraa, a faaoti eiaha e vaiiho i teie fifi ia tuino i to orua taairaa.—Aratairaa Bibilia: Ephesia 4:32.

A faaineine i te tahi tapura no te haapao i te moni. A papai i ta orua mau haamâuˈaraa atoa o te avaˈe noa ˈtu e e mea iti te reira. E ite ïa orua ihea te moni e haere ai e eaha te mau haamâuˈaraa faufaa ore.

A tapao i te mau haamâuˈaraa faufaa mai te hooraa mai i te maa, te ahu, te aufauraa i te fare, te pereoo e te vai ra ˈtu â. I muri aˈe, a papai ehia moni te pau no te ite oioi i te haamâuˈaraa o te avaˈe.—Aratairaa Bibilia: Luka 14:28.

I te mau avaˈe atoa, a faataa i te tahi tino moni no tera e tera haamâuˈaraa (no te maa, fare, mori pereoo e te vai ra ˈtu â). E tuu vetahi i te reira i roto i te vehî faataahia no tera e tera haamâuˈaraa. b Ia iti te moni i roto i te tahi vehî, e faaea ratou i te haamâuˈa aore ra i te rave mai i tei roto i te tahi atu vehî.

A taui i to oe manaˈo no nia i te mau taoˈa. Eita oe e ite i te oaoa mau ma te hoo noa mai i te taoˈa apî roa. Ua parau hoi Iesu: “Rahi noa iho hoi ta te taata nei taoˈa, e ere hoi tei taua taoˈa na ˈna ra to ˈna ora.” (Luka 12:15) E pinepine, e faaite ta oe mau haamâuˈaraa e ua tiaturi mau anei oe i tera mau parau.—Aratairaa Bibilia: Timoteo 1, 6:8.

A rave i te mau tauiraa. Te na ô ra Aaron tei faaipoipohia a piti matahiti i teie nei, “e ere paha te aufauraa i te tahi reni afata teata e te haereraa i rapae e tamaa i te mea moni roa i te haamataraa, ia matau râ oe i te na reira noa, e pau roa ta oe moni. E titauhia ia haapii tatou i te faaoti eiaha e hoo mai i te tahi mau taoˈa no te ore e haamâuˈa i te moni.”