TEIE te tahi fee no Vaihi e imi i ta ˈna maa i te po. Na ˈna iho e faaama i to ˈna mori, tera râ e na reira oia ia ore o ˈna ia itehia noa ˈtu te maramarama o te avaˈe e to te mau fetia. Maoti te aha e tia ˈi ia ˈna ia na reira? Te vai ra te tahi bateria i roto ia ˈna o te nehenehe e faaama i te mori. E nehenehe atoa paha tatou e faufaahia i tera bateria no te haamaitai i to tatou ea.

A hiˈo na: E ora teie hohoˈa fee i te pae tahatai o te mau motu Vaihi. No te maramarama ia hiti te avaˈe e te mau fetia, e nehenehe te tahi animara e ite maitai i ta ˈna e haru e e amu. Auaa râ no teie fee no Vaihi, i raro aˈe ia ˈna, e nehenehe ta ˈna e faaama i te tahi mori o tei au i te maramarama o te po. Eaha te tupu? Eita o ˈna e to ˈna ata e itehia. I roto i to ˈna mero faaama mori, te vai ra te mau bateria o te horoa i te maramarama tano maitai ia ore teie fee ia itehia.

Na tera atoa paha bateria e faatano i te taime taotoraa e araraa o teie hohoˈa fee. Ua anaanatae roa te feia maimi, eita hoi tera faanahoraa e itehia i roto noa i te tino o teie fee no Vaihi. No te animara atoa e horoa i te û e no te taata, e nehenehe te bateria o te tauturu ia faatopa i te maa e haa i nia i te tupu i roto i te tino i te roaraa o te mahana. Ia faahuru-ê-hia te reira, e nehenehe te taata e hepohepo, e roohia i te maˈi omaha tihota e e fifihia i te taoto. E nehenehe te mau maimiraa no nia i te bateria e vai ra i roto i teie fee no Vaihi e faaite mai nafea ia haamaitai i te ea o te taata.

Eaha to oe manaˈo? Mea tupu noa anei te mero faaama mori o teie fee no Vaihi aore ra mea poietehia?