1, 2. (a) Ua roohia Nabota e ta ˈna nau tamaiti i teihea ohipa parau-tia ore? (b) Eaha na huru maitatai e piti ta tatou e hiˈopoa mai i roto i teie tumu parau?

 UA PARI e piti taata haerea ino i te hoê tane i te raveraa i te hoê ohipa ino mau. E haavare ta raua. Tera râ, ua faautuahia teie tane e e haapohehia oia. A feruri na i te huru o te taata o tei haafaufaa i te parau-tia a hiˈo noa ˈi i teie tane hapa ore e ta ˈna nau tamaiti e pehihia i te ofai a pohe roa ˈtu ai ratou! E ere te reira i te hoê noa aamu. Ua tupu iho â te reira no te hoê tavini taiva ore a Iehova, o Nabota te iˈoa, o tei ora a arii ai Ahaba i nia ia Iseraela.—Arii 1, 21:11-13; Arii 2, 9:26.

² I roto i teie tumu parau, e hiˈopoa mai tatou i tei tupu no Nabota. E hiˈopoa atoa mai tatou i te hape ino mau ta te hoê matahiapo taiva ore i rave i roto hoê o te mau amuiraa Kerisetiano matamua. E faaite mai teie na hiˈoraa e piti e mea faufaa te haehaa e te ineineraa i te faaore i ta vetahi ê hapa  ia hinaaro tatou e pee i to Iehova huru no nia i te parau-tia.

3, 4. Mai te aha te huru o Nabota e no te aha oia i patoi ai i te hoo i ta ˈna ô vine i te arii Ahaba?

³ Ua vai taiva ore Nabota ia Iehova i te hoê taime a pee ai te rahiraa o te mau Iseraela i te hiˈoraa ino o te arii Ahaba e ta ˈna vahine, te arii vahine ino o Iezebela. Ua haamori ratou ia Baala te atua haavare, e aita ratou i faatura ia Iehova aore ra i ta ˈna mau ture. Ua haafaufaa râ Nabota i to ˈna auhoaraa e o Iehova hau atu i to ˈna iho ora.

⁴ A taio i te mau Arii 1, 21:1-3. A hinaaro ai Ahaba e hoo mai i te ô vine a Nabota aore ra e horoa ˈtu na ˈna te hoê ô vine maitai aˈe ei monoraa, ua patoi Nabota. No te aha? Ua faataa oia ma te faatura: “Ia tapea mai Iehova ia ˈu eiaha vau e horoa ˈtu i te fenua aiˈa tupuna na oe.” Ua patoi Nabota i ta Ahaba aniraa no te mea aita te reira i tano i ta Iehova ture no te mau Iseraela ia hoo faariro roa i ta ratou faufaa tupuna. (Lev. 25:23; Num. 36:7) Mea papu, ua auraro Nabota ia Iehova.

5. Eaha ta Iezebela i rave ia noaa mai te ô vine a Nabota?

⁵ I to Nabota patoiraa i te hoo i ta ˈna ô vine, ua rave te arii Ahaba e ta ˈna vahine i te ohipa ino mau. Ia noaa ia raua te ô vine, ua faaue te arii vahine Iezebela i e piti taata ia pari ia Nabota i te raveraa i te hoê ohipa ino, o ta ˈna i ore roa ˈtu i rave. Eaha tei itehia? Ua haapohehia Nabota e ta ˈna nau tamaiti. Eaha ta Iehova i rave no teie ohipa parau-tia ore peapea mau?

6, 7. (a) Mea nafea Iehova i te faaiteraa e mea au na ˈna i te parau-tia? (b) No te aha te reira i riro ai ei tamahanahanaraa no te utuafare o Nabota e to ˈna mau hoa?

⁶ Ua tono oioi Iehova ia Elia no te tia ˈtu i mua ia Ahaba. Ua parau atu Elia ia Ahaba e taparahi taata oia e te eiâ atoa. Eaha ta Iehova i faaoti? E haapohehia Ahaba, ta ˈna vahine e ta ˈna nau tamaiti, mai tei tupu i nia ia Nabota e ta ˈna na tamaiti.—Arii 1, 21:17-25.

⁷ Ua oto roa te utuafare o Nabota e to ˈna mau hoa no te mau ohipa iino ta Ahaba i rave. Ua ite râ Iehova i teie ohipa parau-tia ore e ua haa oioi oia. Eita e ore e ua tamahanahana te reira ia ratou. Tera râ, peneiaˈe ua tamatahia to ratou haehaa e tiaturi ia Iehova i te mau ohipa o tei tupu i muri iho.

8. Ua aha Ahaba a faaroo ai oia i te poroi a Iehova e eaha tei tupu?

⁸ A faaroo ai Ahaba i ta Iehova i faaoti no ˈna, “ua hahae ihora oia i tana ahu, ua tuu aˈera i te ahu paau i nia ia ˈna, e ua haapae ihora i te maa, taoto ihora i roto i taua ahu paau ra, e ua hahaere noa ihora ma te oto.” Ua faahaehaa Ahaba ia ˈna! Eaha tei itehia? Ua parau atu Iehova ia  Elia: “No te mea ua faahaehaa mai oia i mua ia ˈu nei, e ore au e hopoi vave mai i taua ino nei i to ˈna nei anotau; ia tae râ i to te tamaiti ra anotau, e hopoi mai ai au i taua ino nei i nia i to ˈna ra utuafare.” (Arii 1, 21:27-29; Arii 2, 10:10, 11, 17) Ua aroha-hamani-maitai-hia Ahaba e Iehova, te Atua “tei tamata [aore ra hiˈopoa] i te aau,” o te nehenehe e ite o vai mau tatou.—Mas. 17:3.

9. No te aha te haehaa e nehenehe ai e riro ei paruru no te utuafare o Nabota e to ˈna mau hoa?

⁹ A faaroo ai te utuafare o Nabota e to ˈna mau hoa e eita te utuafare o Ahaba e faautuahia e tae roa ˈtu i muri aˈe i te poheraa o Ahaba, ua tamatahia paha to ratou faaroo i te Atua. E nehenehe râ te haehaa e tauturu ia ratou ia paruru i to ratou faaroo. No te aha? Mai te peu e mea haehaa ratou, e tamau ïa ratou i te haamori ia Iehova ma te tiaturi e eita roa ˈtu te Atua e haa ma te parau-tia ore. (A taio i te Deuteronomi 32:3, 4.) No a muri aˈe, e fanaˈo te utuafare o Nabota i te haamaitairaa i te iteraa i te feia tei herehia e ratou i te tia-faahou-raa. E ohipa parau-tia roa te tupu no Nabota e ta ˈna nau tamaiti. (Ioba 14:14, 15; Ioa. 5:28, 29) Ua ite te hoê taata haehaa “e hopoi . . . te  Atua i te mau parau atoa i te haavaraa, e te mau mea moe atoa ra, te maitai e te ino atoa ra.” (Koh. 12:14) Ua ite Iehova i te mau mea ta tatou e ore e ite. No reira, e paruru mai te haehaa ia ore tatou e ere i to tatou faaroo ia Iehova.

10, 11. (a) Eaha te mau tupuraa o te tamata i ta tatou huru hiˈoraa i te parau-tia? (b) Nafea te haehaa e paruru ai ia tatou?

¹⁰ Eaha to oe huru ia rave te mau matahiapo i te hoê faaotiraa o ta oe e ore e taa aore ra o ta oe e ore e farii? Ei hiˈoraa, eaha ta oe e rave ia ere oe aore ra te hoê taata ta oe e au, i te hoê hopoia i roto i te taviniraa a Iehova? E ia tiavaruhia to oe hoa faaipoipo, ta oe tamaiti, tamahine aore ra hoa piri e aita oe i mauruuru i te faaotiraa a te mau matahiapo? Eaha ta oe e rave ia tiaturi oe e ua hape te mau matahiapo i te faaiteraa i te aroha hamani maitai i te hoê taata o tei hara? E nehenehe teie mau tupuraa e tamata i to tatou faaroo ia Iehova e i ta ˈna huru faanahoraa i te amuiraa i teie mahana. E nafea te haehaa e paruru ai ia oe ia tamata hoê o teie mau tupuraa ia oe? E hiˈo mai tatou e piti ravea.

¹¹ A tahi, mai te peu e taata haehaa tatou, e farii tatou e aita tatou i ite i te mau haamaramaramaraa atoa. Noa ˈtu e manaˈo tatou e ua ite tatou i te mau mea atoa te tia ia ite no nia i te hoê tupuraa, o Iehova anaˈe tei ite eaha to roto i te aau o te hoê taata. (Sam. 1, 16:7) Ia haamanaˈo tatou i te reira, ma te haehaa e farii tatou e ua taotiahia tatou e e tia ia taui i to tatou huru feruriraa. Te piti, mai te peu e ohipa parau-tia ore ta tatou i ite aore ra tei ravehia i nia ia tatou, e tauturu mai te haehaa ia auraro, ia faaoromai e ia tiai na Iehova e faaafaro i tera tupuraa. Te na ô ra te Bibilia: “E maitai to te feia i mǎtaˈu i te Atua.” Te parau atoa ra te Bibilia: “Aita râ o te paieti ore e maitai, e ore hoi o ˈna pue mahana e haamaorohia.” (Koh. 8:12, 13) Ia vai haehaa noa tatou, e faufaahia tatou e te mau taata atoa i roto i taua tupuraa ra.—A taio i te Petero 1, 5:5.

12. Eaha te aamu ta tatou e hiˈopoa mai i teie nei, e no te aha?

¹² Ua farerei te mau Kerisetiano o te senekele matamua i Anetiohia i Suria i te hoê tupuraa o tei tamata i to ratou haehaa e oia atoa, i to ratou ineineraa i te faaore i te hapa. E hiˈo e e faaohipa anaˈe i tera aamu no te hiˈopoa i to tatou huru feruriraa no nia i te faaoreraa i te hapa. E tauturu mai te reira ia taa no te aha Iehova e nehenehe ai e faaohipa i te taata tia ore ma te ore e faaiti i ta ˈna mau ture aveia.

13, 14. Eaha te mau hopoia a te aposetolo Petero, e mea nafea oia i te faaiteraa e e taata itoito oia?

¹³ E matahiapo te aposetolo Petero o ta te rahiraa o te mau Kerisetiano o te senekele matamua i matau maitai. E hoa piri oia no Iesu e ua horoahia ia ˈna te tahi mau hopoia faufaa. (Mat. 16:19) Ei hiˈoraa, i te matahiti 36, ua tonohia Petero no te poro ia Korenelio e te feia atoa i  roto i to ˈna fare. No te aha mea taa ê ai te reira? No te mea e ere Korenelio i te ati Iuda, e taata nunaa ê peritome-ore-hia oia. A fanaˈo ai Korenelio e te feia i roto i to ˈna fare i te varua moˈa, ua taa ia Petero e e nehenehe ratou e bapetizohia ei Kerisetiano. Ua parau oia: “Ua noaa i teie mau taata te varua moˈa mai ia matou atoa, e tia anei ïa i te tahi taata ia tapea ia ratou ia ore ia bapetizohia i te pape?”—Ohi. 10:47.

¹⁴ I te matahiti 49, ua putuputu te mau aposetolo e te mau matahiapo no Ierusalema no te faaoti e mea titauhia anei ia peritomehia te mau Kerisetiano no te mau nunaa ěê. I tera putuputuraa, ua haamanaˈo atu Petero ma te itoito i te mau taeae e ua ite oia i te feia no te mau nunaa ěê peritome-ore-hia i te fanaˈoraa i te varua moˈa. Na teie tupuraa ta Petero i ite i tauturu i te tino aratai ia rave i ta ratou faaotiraa. (Ohi. 15:6-11, 13, 14, 28, 29) Eita e ore e ua mauruuru roa te mau Kerisetiano ati Iuda e te mau Kerisetiano nunaa ěê i to Petero faaiteraa ma te itoito i te mau haamaramaramaraa. Eita e ore ua riro ei mea ohie no tera mau Kerisetiano o te senekele matamua ia tiaturi i teie taata taiva ore e te feruriraa paari atoa!—Heb. 13:7.

15. Eaha te hape ta Petero i rave i Anetiohia i Suria? (A hiˈo i te hohoˈa matamua.)

¹⁵ I muri iti noa ˈˈe i te putuputuraa i Ierusalema, ua haere Petero i Anetiohia i Suria. I reira, ua faataa oia i te taime e to ˈna mau taeae no te mau nunaa ěê. E nehenehe tatou e feruri e ua au roa ratou i te haapii mai i to Petero ite rahi. Tera râ, ua maere roa paha ratou e ua mauiui atoa paha no to Petero faaearaa i te tamaa e o ratou. Ua turai Petero i te tahi atu mau Kerisetiano ati Iuda, oia atoa ia Baranaba, ia na reira. No te aha teie matahiapo Kerisetiano feruriraa paari i rave ai i teie huru hape ino mau o te nehenehe e faaamahamaha i te amuiraa? Te mea faufaa roa ˈtu â, eaha ta tatou e nehenehe e haapii mai i te hape a Petero o te tauturu mai ia haamauiuihia tatou e te tahi mau parau aore ra haaraa a te hoê matahiapo?

16. Mea nafea Petero i te faaafaro-raa-hia e eaha te mau uiraa e hiti mai?

¹⁶ A taio i te Galatia 2:11-14. Ua mǎtaˈu Petero i te taata. (Mas. 29:25) Ua ite Petero i to Iehova manaˈo no nia i te feia no te mau nunaa ěê. Ua mǎtaˈu râ oia i ta te mau Kerisetiano ati Iuda peritomehia o tei haere mai mai Ierusalema, e manaˈo ia amuimui oia e te mau Kerisetiano no te mau nunaa ěê. Ua parau te aposetolo Paulo ia Petero e e taata haavarevare oia. No te aha? Ua faaroo Paulo ia Petero i te patururaa i te feia no te mau nunaa ěê i te putuputuraa i Ierusalema i te matahiti 49. (Ohi. 15:12; Gal. 2:13) Eaha te huru o te mau Kerisetiano no te mau nunaa ěê o ta Petero i haamauiui? Ua vaiiho anei ratou i te reira e faaturori ia ratou? Ua ere anei Petero i ta ˈna mau hopoia no ta ˈna hape?

17. Mea nafea Petero i faufaahia ˈi i to Iehova faaoreraa i te hapa?

¹⁷ E taata haehaa Petero e ua farii i te aˈoraa a Paulo. Aita te mau Papai e parau ra e ua ere Petero i ta ˈna mau hopoia. Inaha, ua aratai te Atua ia ˈna i muri aˈe ia papai e piti rata o tei riro mai ei tuhaa o te Bibilia. I roto i te piti o ta ˈna na rata, ua faahiti atoa oia ia Paulo mai “to tatou taeae here.” (Pet. 2, 3:15) Eita e ore e ua haamauiui ta Petero hape i te mau Kerisetiano no te mau nunaa ěê. Tera râ, ua tamau noa Iesu, te upoo o te amuiraa, i te faaohipa ia ˈna. (Eph. 1:22) E ravea ta te mau taeae e tuahine o te amuiraa no te pee i te hiˈoraa o Iesu e o to ˈna Metua ma te faaore i ta Petero hapa. Mea maitai aita te hape a te hoê taata tia ore i faaturori hoê noa ˈˈe taata.

18. I teihea taime e titauhia paha ia pee tatou i te huru o Iehova no nia i te parau-tia?

¹⁸ Aita e matahiapo tia roa i roto i te amuiraa o te senekele matamua, aita atoa e matahiapo tia roa i roto i te amuiraa Kerisetiano i teie mahana. Te parau ra te Bibilia: “E turori hoi tatou paatoa e rave rahi taime.” (Iak. 3:2, nota.) Mea ohie ia ite i te reira, tera râ, eaha ta tatou e rave mai te peu e o tatou te faaruru ra i te huru tia ore o te hoê taeae? E pee anei tatou i te huru o Iehova no nia i te parau-tia? Ei hiˈoraa, eaha to oe huru ia faahiti te hoê matahiapo i te hoê parau e au ra e e manaˈo oti noa te reira? Ia faahiti te hoê matahiapo i te mau parau feruri-ore-hia e inoino aore ra e mauiui ai oe, e vaiiho anei oe i te reira e faaturori ia oe? E tiaturi anei oe ia Iesu, te upoo o te amuiraa, ma te ore e manaˈo oioi e eita ta teie taeae e nehenehe e riro mai ei matahiapo? E haamanaˈo anei oe i te rahiraa matahiti taviniraa taiva ore a teie taeae ma te ore e haapao i te hape ta ˈna i rave? Mai te peu e te tamau noa ra te hoê taeae, o tei hara ia oe, i te tavini ei matahiapo aore ra te fanaˈo ra oia hau atu â hopoia, e oaoa anei oe no ˈna? Mai te peu e ua ineine oe i te faaore i te hapa, te pee ra ïa oe i te huru o Iehova no nia i te parau-tia.—A taio i te Mataio 6:14, 15.

19. Eaha ta tatou i faaoti papu i te rave?

¹⁹ No te mea, mea au na tatou te parau-tia, te tiai ru nei tatou i te mahana e faaore roa ˈi Iehova i te mau ohipa parau-tia ore atoa o ta Satani e ta ˈna ao ino e faatupu noa ra. (Isa. 65:17) A tiai noa ˈtu ai, ia faaruru tatou i te hoê ohipa parau-tia ore, e farii anaˈe ma te haehaa e aita tatou i taa maitai pauroa te haamaramaramaraa, e e faaore noa anaˈe i te hara ta te feia i rave ia tatou. Ma te na reira, e pee ïa tatou i te manaˈo o Iehova no nia i te parau-tia.