TUMU PARAU HAAPIIRAA 8
HIMENE 130 E faaore noa anaˈe i te hapa
E faaore Iehova i te hara: E nafea ia na reira atoa?
“Mai ia Iehova i faaore noa mai i ta outou ra, ia na reira atoa ˈtu outou.”—KOL. 3:13.
MANAˈO FAUFAA
E faataa mai teie tumu parau eaha ta tatou e nehenehe e rave no te faaore i ta vetahi ê hapa.
1-2. (1) I teihea taime mea fifi roa ia faaore i ta vetahi ê hapa? (2) Mea nafea Denise i te faaoreraa i te hapa?
MEA fifi anei no oe ia faaore i ta vetahi ê hapa? E ere i te mea ohie mai te peu iho â râ ua mauiui maitai oe no te tahi parau aore ra ohipa. Mea fifi atoa no te taata e rave rahi ia na reira. Teie râ, te vai ra te ravea e ore ai te mauiui, a faaore noa ˈtu ai i ta vetahi ê hapa. A hiˈo na i te tupuraa o Denise. a I 2017, ua haere oia e to ˈna utuafare e mataitai i te pu rahi a te mau Ite no Iehova. I to ratou râ hoˈiraa i te fare, ua faaû mai te hoê pereoo ia ratou. Ua matapoirihia o tuahine. I to ˈna araraa mai, ua faaarahia o ˈna e ua pepe maitai ta ˈna mau tamarii e ua pohe ta ˈna tane o Brian. Ua mauiui roa o tuahine e aita i taa faahou e nafea. I muri iho, faaroo atura oia e aita te taata tei faaû ia ratou i taero. Pure ihora tuahine Denise ia Iehova ia tamǎrû mai ia ˈna.
2 Ua tapeahia taua taata ra no te mea ua pohe te tane a Denise ia ˈna. Ia faaoti noa ˈtu te tiripuna e faautua ia ˈna, e tuuhia ïa oia i te fare tapearaa. Ua parau râ te hoê taata o te tiripuna ia Denise e tei ia ˈna noa, ia au hoi i ta ˈna e parau i te haava. Te na ô ra Denise: “Mai te huru ra e te tatarahia ra to ˈu mau taamu a maniihia ˈi te miti papaa i nia i to ˈu pepe, no te mea e titauhia ia faatia vau i to ˈu ati mamae mau.” Tau hebedoma noa i muri iho, ua tia ˈtu Denise i roto i te piha haavaraa. Eaha ta ˈna i parau? Ua ani o ˈna i te haava eiaha e faautua i taua taata ra. b Ua taˈi te haava. Ua parau oia: “A 25 atura matahiti to ˈu tiaraa mai ei haava, a tahi ra vau a faaroo ai i te parau mai teie. Aita vau i faaroo aˈenei i te fetii tei roohia i te ati ia taparu mai eiaha e faautua i te taata e haavahia ra. Aita vau i faaroo aˈenei i teie mau parau î i te here e ia faaorehia te hapa.”
3. Eaha tei tauturu ia Denise ia faaore noa ˈtu i te hapa?
3 Eaha tei tauturu ia Denise ia faaore i te hapa a taua taata ra? Ua feruriruri oia i ta Iehova huru faaoreraa i te hara. (Mika 7:18) Ia mauruuru tatou i te faaoreraa Iehova i ta tatou mau hara, e na reira atoa tatou i nia ia vetahi ê.
4. Eaha ta Iehova e titau mai ra ia tatou? (Ephesia 4:32)
4 Te hinaaro ra Iehova ia faaore noa ˈtu tatou i ta vetahi ê hapa mai ta ˈna i faaore i ta tatou. (A taio i te Ephesia 4:32.) Ia ineine tatou i te na reira i tei haamauiui mai, ta Iehova ïa e titau ra ia tatou. (Sal. 86:5; Luka 17:4) I roto i teie tumu parau, e hiˈopoa tatou e toru ravea e nehenehe ai tatou e na reira.
EIAHA E TÂUˈA ORE I TO OE MAU HURU AAU
5. Ia au i te Maseli 12:18, eaha to tatou huru ia haamauiui mai te tahi taata?
5 E mauiui e e riri roa paha tatou no te tahi parau aore ra ohipa a te hoê taata, mai te peu iho â râ e fetii aore ra e hoa rahi o ˈna. (Sal. 55:12-14) Mai te huru ra ua patiahia tatou i te tipi. (A taio i te Maseli 12:18.) E imi paha tatou i te ravea no te tâuˈa ore i te mauiui aore ra te riri. Ia na reira tatou, mai te huru ra ïa e vaiiho noa tatou i te tipi i roto i to tatou pepe. Eita ïa to tatou pepe e ora. Hoê â huru no te mauiui e te riri. Eita te reira e ore ia tâuˈa ore atu tatou.
6. Eaha to tatou huru ia haamauiui mai te hoê taata?
6 Ia haamauiui mai te hoê taata, e riri paha tatou. Te parau ra te Bibilia e riri iho â tatou. Tera râ, te faaara mai ra te Bibilia eiaha e tamau noa i te riri. (Sal. 4:4; Eph. 4:26) No te aha? No te mea e haa tatou ia au i to tatou mau huru aau. Hau atu ia ore ia vî to tatou riri e faahopearaa ino te nehenehe e tupu. (Iak. 1:20) No reira, e riri iho â tatou i te tahi taime. Na tatou râ e faaoti e tamau noa i te riri aore ra eita.
E riri iho â tatou i te tahi taime, na tatou râ e faaoti e tamau noa i te riri aore ra eita
7. Eaha te tahi atu mau huru aau e faura mai ia haamauiuihia tatou?
7 Te vai ra te tahi atu â mau huru aau mamae te faura mai ia haamauiuihia tatou. Teie ta te tuahine Anne e parau ra: “Mea nainai au i to papa faarueraa ia mama no te faaipoipo i te vahine tei haapao mai ia ˈu. Puta mai nei te manaˈo e ua faaruehia vau na to ˈu papa. I te fanauraahia mai ta raua na tamarii, e au ra e ua monohia vau. Ua paari au e te manaˈo e ere au i te tamarii hinaarohia.” Te faataa ra te tahi atu tuahine, o Georgette te iˈoa, i to ˈna huru aau i te faaturiraa ta ˈna tane: “Ua oti roa vau i te mamae. Ua matau hoi au ia ˈna mai to ˈu tamarii-rii-raa mai â. Mâua atoa tei rave i te taviniraa pionie.” Ua taa raua i muri iho. E te na ô ra te tahi tuahine o Naomi te iˈoa: “Aita vau i manaˈo noa ˈˈe e haamauiui mai ta ˈu tane ia ˈu mai tera. I to ˈna faaiteraa mai e te mataitai huna ra o ˈna i te hohoˈa faufau, ua mauiui roa vau. No ˈu ua taiva o ˈna ia ˈu.”
8. (1) No te aha tatou e faaore ai i ta vetahi ê hapa? (2) Eaha te tupu ia ore tatou ia faaore i te hapa? (A hiˈo i te tumu parau tarenihia “ E nahea tatou ua rave-ino-hia anaˈe tatou?”)
8 Aita e mana to tatou i nia i ta vetahi ê e parau mai aore ra e rave mai. Na tatou râ e faaoti eaha te rave i mua i tera tupuraa. Pinepine o te faaore i te hapa te ravea maitai roa ˈˈe. No te aha? No te mea mea here na tatou ia Iehova o te hinaaro ra ia na reira tatou. Ia tamau tatou i te riri, a ore atu ai e faaore i te hapa, e nehenehe tatou e rave i te tahi mea maamaa e e ino roa to tatou ea. (Mas. 14:17, 29, 30) A hiˈo na i te tupuraa o te tuahine Christine. Te na ô ra oia: “Ia inoino noa ˈtu vau, e iti roa mai to ˈu oaoa. Eita atoa vau e haapao faahou i ta ˈu maa. Eita to ˈu taoto e topa. E riri hanoa vau, e mea ino atoa vau i nia i ta ˈu tane e ia vetahi ê.”
9. Eaha te mau maitai ia faaea tatou i te inoino?
9 Noa ˈtu eita te taata tei haamauiui ia tatou e tatarahapa, e noaa ia tatou ia tamǎrû i to tatou mauiui. E nafea? Te na ô ra Georgette, tei faahitihia na: “Ua titauhia te taime, i muri mai râ ua pee to ˈu inoino e to ˈu riri i ta ˈu tane na mua ˈˈe. Fanaˈo atura vau i te hau.” Ia faaea tatou i te inoino, mea maitai ïa tatou i nia ia vetahi ê. O tatou atoa te maitaihia ia faaea tatou i te manaˈo noa i tei tupu. Inaha, e oaoa faahou tatou a nuu ai i mua. (Mas. 11:17) E nafea râ oe mai te peu aita â oe i ineine atura i te faaore i te hapa?
EAHA TE RAVE E ORE AI TE INOINO?
10. No te aha e titauhia ˈi te taime e ore ai te inoino? (A hiˈo atoa i te hohoˈa.)
10 E titauhia te taime e ore ai to tatou inoino. Mai te hoê taata tei rapaauhia, e titauhia te taime e ora roa ˈi to ˈna mau pepe. E titauhia atoa te taime e ore ai to tatou inoino, a ineine atu ai i te faaore i ta vetahi ê hapa ma te aau tae.—Koh. 3:3; Pet. 1, 1:22.
E titauhia te rapaauraa e te taime e ora ˈi to tatou pepe, hoê â huru ia mauiui to tatou aau (A hiˈo i te paratarafa 10)
11. E nafea te pure e tauturu mai ai ia faaore i te hapa?
11 A pure ia Iehova ia tauturu ia oe ia faaore i te hapa. c Te faataa ra Anne, tei faahitihia na, mea nafea te pure i te tautururaa ia ˈna. Te na ô ra oia: “Ua ani au ia Iehova ia faaore i te mau mea tano ore ta matou tataitahi i parau e i rave. E papai atura vau i te hoê rata i to ˈu papa e ta ˈna vahine apî no te faaite ua pee to ˈu inoino ia raua.” E ere râ i te mea ohie no ˈna. Te parau ra o ˈna: “Peneiaˈe e hinaaro to ˈu papa e ta ˈna vahine e ite o vai Iehova, inaha ua tutava vau i te faaore i te hapa mai ta Iehova i haapii mai ia ˈu.”
12. No te aha mea maitai aˈe ia tiaturi tatou ia Iehova eiaha râ ia tatou iho? (Maseli 3:5, 6)
12 A tiaturi ia Iehova, eiaha râ to oe mau huru aau. (A taio i te Maseli 3:5, 6.) Ua ite Iehova eaha te mea maitai roa ˈˈe no tatou. (Isa. 55:8, 9) Eita o ˈna e ani mai ia rave i te tahi mea o te haamauiui ia tatou. No reira, ia faaitoito mai Iehova ia faaore i te hapa, no to tatou ïa maitai. (Sal. 40:4; Isa. 48:17, 18) Ia tiaturi râ tatou ia tatou iho, eita roa ˈtu e haere ia tatou ia faaore i te hapa. (Mas. 14:12; Ier. 17:9) Te na ô ra Naomi, tei faahitihia na: “I te omuaraa, ua manaˈo vau eiaha e faaore i te hapa a ta ˈu tane i te mataitairaa i te hohoˈa faufau. Ua taiâ vau aˈunei o ˈna e haamauiui faahou ai ia ˈu aore ra e moˈehia ia ˈna to ˈu mauiui. Manaˈo ihora vau e te taa ra ia Iehova to ˈu mau huru aau. Tera râ, feruri ihora vau e ere no te mea te taa ra ia Iehova to ˈu mau huru aau, te auraa e farii ïa o ˈna i te reira. Ua ite o ˈna e te vai noa ra tera inoino e e titauhia te taime e ore ai te reira. Te hinaaro atoa râ Iehova ia faaore noa ˈtu vau i te hapa.” d
EI HURU AAU MAITATAI NOA TO OE
13. Ia au i te Roma 12:18-21, eaha te titauhia ia rave tatou?
13 Ia faaore tatou i te hapa a te hoê taata, eita tatou e faaoti noa e tapoˈi i te reira. E faatupu atoa râ tatou i te hau. Mai te peu e taeae aore ra e tuahine tei haamauiui mai, e imi tatou i te ravea ia vai noa te hau. (Mat. 5:23, 24) E faaoti tatou eiaha e inoino faahou, e aroha hamani maitai atu râ ma te faaore i te hapa. (A taio i te Roma 12:18-21; Pet. 1, 3:9) Eaha te tauturu mai?
14. Ia tutava tatou i te aha, e no te aha?
14 O te maitai ta Iehova e imi i roto i te taata. Ia tutava ïa tatou i te na reira atoa. (Par. 2, 16:9; Sal. 130:3) E itea mai iho â ia tatou ta tatou e imi i roto i te taata, te mau huru maitatai aore ra te mau vahi paruparu. No reira, ia imi tatou i te mea maitai i roto ia vetahi ê, mea ohie aˈe ïa ia faaore i ta ratou mau hapa. Te na ô ra te taeae Jarrod: “Mea ohie aˈe no ˈu ia faaore i te hapa a te hoê taeae ia faaau vau i ta ˈna hapa i te rahiraa o to ˈna mau huru maitatai.”
15. No te aha mea faufaa ia parau roa ˈtu i te hoê taata ua faaore oe i ta ˈna hapa?
15 Mea faufaa atoa ia parau roa ˈtu i te hoê taata e ua faaore oe i ta ˈna hapa. No te aha? Te na ô ra Naomi: “Ua ani mai ta ˈu tane e ua faaore anei au i ta ˈna hapa. Ua hinaaro vau e parau ‘E.’ Aita râ i matara mai. Taa ihora ia ˈu e, i roto i to ˈu aau aita vau i faaore i ta ˈna i rave. No muri iho roa to ˈu parauraa ˈtu e aita vau i inoino faahou ia ˈna. I tera iho â taime, ua taˈi ta ˈu tane. Ua topa to ˈna hau e to ˈu atoa. Mai reira mai, ua nehenehe au e tiaturi faahou ia ˈna, a riro faahou ai mâua ei hoa rahi.”
16. Eaha ta oe i haapii mai no nia i te faaoreraa i te hapa?
16 Te hinaaro ra Iehova ia faaore tatou i te hapa. (Kol. 3:13) E ere iho â mea ohie e haere râ ia tatou! Eiaha ïa e tâuˈa ore i to tatou mau huru aau. E tutava anaˈe i te faaea i te inoino. E faatupu anaˈe i te mau huru aau maitatai.—A hiˈo i te tumu parau tarenihia “ E toru ravea no te faaore i ta vetahi ê hapa.”
A FERURI I TE MAU MAITAI IA FAAORE OE I TE HAPA
17. No te aha tatou e faaore ai i te hapa?
17 Mea rahi te tumu e faaore ai tatou i te hapa. E faahiti noa râ tatou e toru. A tahi, te pee ra tatou i te hiˈoraa o to tatou Metua aroha hamani maitai ra o Iehova, o te oaoa ia na reira atoa tatou. (Luka 6:36) A piti, te faaite ra tatou i to tatou mauruuru ia Iehova no te faaore-noa-raa i ta tatou mau hara. (Mat. 6:12) A toru, e maitai noa to tatou ea e e piri noa tatou ia vetahi ê e ia Iehova.
18-19. Eaha te tupu ia faaore tatou i te hapa?
18 Ia faaore tatou i te hapa a vetahi ê, e nehenehe tatou e fanaˈo i te mau haamaitairaa hau aˈe i ta tatou e manaˈo. O ta Denise ïa i ite. Ua opua te taata o tei faaû ia ratou e haapohe ia ˈna ia oti te haavaraa. Tera râ, ua putapû roa o ˈna i to Denise aniraa i te haava eiaha e faautua ia ˈna. Haapii atura o ˈna i te Bibilia e te mau Ite no Iehova.
19 E ere paha mea ohie no tatou, mai ia Denise, ia faaore i te hapa a vetahi ê. Tera râ, e haamaitairaa rahi ta tatou e fanaˈo. (Mat. 5:7) No reira, e tutava anaˈe i te faaore i te hapa mai ia Iehova.
HIMENE 125 “E oaoa te feia aroha hamani maitai”
a Ua tauihia te tahi mau iˈoa.
b Na te Kerisetiano tataitahi e faaoti eaha ta ˈna e rave i roto i teie tupuraa.
c A hiˈo i nia i te jw.org i na video himene rau “Faaore te hapa,” “Faaore i te hapa,” e “Hoa faahou.”
d E hara o te haamauiui te mataitairaa i te hohoˈa faufau. E ere râ te reira i te hoê tumu Bibilia e nehenehe ai te hoa faaipoipo hara ore e faataa i to ˈna apiti.
