Ua horoa te Atua na te taata i te hoê ô taa ê roa, o te paraparauraa ïa ia ˈna e te faaiteraa i to ratou mau huru aau na roto i te pure. Ua pure hoi te peropheta Davida: “E tei faaroo i te pure ra, e tae atoa mai te taata atoa ia oe ra.” (Salamo 65:2) E nafea tatou e pure ia faaroohia mai e ia haamaitaihia mai e te Atua?

A faaite i to oe mau huru aau atoa na roto i te ‘hohoraraa i to aau i mua ia Iehova.’ (Salamo 62:8) Mea au roa na te Mana hope ia pure te taata ia ˈna ma to ratou aau atoa.

Noa ˈtu e rave rahi tiaraa iˈoa to te Atua, te vai ra râ to ˈna iho iˈoa. “O vau o Iehova, o to ˈu ïa iˈoa.” (Isaia 42:8) Hau atu 7 000 taime e itehia te iˈoa Iehova i roto i te Bibilia. E rave rahi peropheta tei faahiti i te iˈoa o te Atua ma te tura ia pure ratou ia ˈna. Ua parau Aberama: “E te Fatu, e Iehova, eaha ta oe e ho mai no ˈu, teie hoi au a pohe ma te tamarii ore.” (Genese 15:2) Ia faaohipa atoa ïa tatou i te iˈoa o te Atua, Iehova, ia pure anaˈe tatou.

Te taa ra i te Atua i to tatou mau manaˈo e mau huru aau noa ˈtu eaha te reo ta tatou e paraparau ra. Te haapapu mai ra ta ˈna Parau: “E ore te Atua e maitiiti i te taata, i roto râ i te mau nunaa atoa, e farii oia i te taata o te mǎtaˈu ia ˈna e o te rave i te mea tia.”—Ohipa 10:34, 35.

Teie râ, ia haamaitaihia mai tatou e te Atua, e titauhia ia rave hau atu i te pure-noa-raa. I roto i to muri nei mau tumu parau, e hiˈopoa mai tatou eaha te tia ia rave.