Ua fanauhia vau i Ciudad Mante, te tahi tuhaa fenua nehenehe i Tamaulipas i Mehiko. Mea tauturu te feia no ǒ ia vetahi ê e mea maitai atoa. Mea peapea râ ia parau, mea atâta roa ia haere na tera mau vahi no te rahi o te mau ohipa iino.

E maha matou tamaroa, o vau te piti. Ua faaoti to ˈu na metua ia bapetizohia vau i roto i te haapaoraa Katolika e ua riro vau ei mero no te pǔpǔ himene a te paroita i muri aˈe. Ua hinaaro vau e rave i te mea maitai no to ˈu riaria ia haavahia vau e te Atua e ia haamauiuihia e a muri noa ˈtu i roto i te po auahi.

I te paeraa o to ˈu matahiti, ua faarue mai papa i te fare. Auê au i te oto e te mauiui! Aita vau i taa no te aha o ˈna i vaiiho mai ai ia matou, mea here roa hoi na matou ia ˈna. Ua titauhia ia rave to ˈu mama i te ohipa e rave rahi hora no te faatamaa ia matou e maha.

Mea pinepine aita mama i te fare, ua amuimui ïa vau i te mau tamarii paari aˈe e aita vau e tia na i te fare haapiiraa. Na ratou i haapii mai i te parau ino, te puhipuhi i te avaava, te eiâ e te taputô ma te faaohipa noa i te rima. Mea au roa na ˈu e haavî ia vetahi ê, ua haapii atoa ïa i te moto, te aro, te taputô, oia atoa i te na reira ma te faaohipa i te tahi mau taoˈa. Riro ihora vau ei taurearea ino mau. Pinepine au i te itehia i roto i te mau aroraa e te pupuhi. Ehia aˈenei taime, ua î roa vau i te toto e te pae hopea, ua faarue-roa-hia i roto i te aroâ fatata i te pohe! Auê au i te tatarahapa i te mea ua oto to ˈu mama i te iteraa ia ˈu mai tera e ua rave oioi ia ˈu no te afai i te fare maˈi!

Ua haere mai Jorge, te tahi hoa hoê â matou i te paariraa, i te fare. I tera taime, 16 matahiti to ˈu e ua parau mai oia e Ite no Iehova o ˈna i teie nei e e poroi faufaa ta ˈna e hinaaro e faaite mai. Ua haamata ˈtura i te faataa i ta ˈna mau tiaturiraa ma te faaohipa i te Bibilia. A tahi ra vau a taio ai i te Parau a te Atua, e ua anaanatae roa vau i te ite i te iˈoa o te Atua e ta ˈna mau opuaraa! Ua farii matou i ta Jorge aniraa ia haapii i te Bibilia.

Ua oaoa roa ino vau i te ite mea hape te haapiiraa no nia i te po auahi, e ere hoi tera ta  te Bibilia e parau ra! (Salamo 146:4; Koheleta 9:5) Ua faaea ˈtura vau i te riaria i te Atua e ua haamata i te hiˈo ia ˈna mai te hoê Metua î i te here o te hinaaro i te maitai o ta ˈna mau tamarii.

A haere noa ˈi ta ˈu haapiiraa Bibilia i mua, ua taa ia ˈu e tia ia taui i to ˈu huru: Ia faaite i te haehaa e ia faaea i te taputô. Ua tauturu mai te aˈoraa i roto i te Korinetia 1, 15:33 ia ˈu. Te faataa ra hoi, e ino te peu maitai i te amuiraa iino. Taa aˈera ia ˈu, e tia ia faaea vau i te amuimui i te feia o te turai mai ia rave i te mea ino. Ua na reira vau e riro atura te mau Kerisetiano mau o te amuiraa ei hoa papu no ˈu. E feia hoi tera o te faaafaro i te peapea, eiaha ma te tupai, ma te haapao râ i te mau aratairaa Bibilia!

Te tahi atu mau irava tei haaputapû ia ˈu, o te Roma 12:17-19. Te na ô ra hoi: “Eiaha roa te ino e tahoohia i te ino i te taata atoa nei. . . . Peneiaˈe o te tia ra, e parahi hau noa outou i roto i te taata atoa nei. . . . Eiaha outou e tahoo . . . ua papaihia hoi e, Te parau maira Iehova, Ei ia ˈu te riri, na ˈu ïa e tahoo.” Ua farii au, e faaafaro iho â o Iehova i te mau ohipa tia ore i te taime ta ˈna i faaoti e na roto i te ravea ta ˈna i maiti. Ore mǎrû noa ˈtura tera huru ino to ˈu.

Haamanaˈo noa ra vau i tei tupu i te tahi po a hoi ai i te fare. Ua haere mai te tahi mau taurearea, e enemi no te pǔpǔ tahito ta ˈu i apiti na, e taparahi ia ˈu. Ua tupai to ratou aratai i to ˈu tua e ua tuô: “Haere, a taputô!” I tera taime, ua faaoti au i te hoê pure poto noa ia Iehova, ua ani ia ˈna ia tauturu mai ia faaoromai i ta ratou mau raveraa i nia ia ˈu. Ua horo vau noa ˈtu e hinaaro rahi to ˈu e tahoo! I te mahana i muri iho, ua farerei au i te aratai o tera pǔpǔ. Hoˈi mai nei te riri e te hinaaro e tahoo i roto ia ˈu, ua taparu faahou râ vau ia Iehova ia tauturu mai ia haavî i to ˈu huru. Ua maere roa vau, i te haereraa mai tera taurearea i mua maitai ia ˈu e ua parau: “Farii mai na te tatarahapa no inapo ra. Hinaaro vau e riro mai ia oe, haapii mai na te Bibilia ia ˈu.” Auê au i te oaoa i te haavîraa ia ˈu! Haamata aˈera vau i te faatere i ta ˈna haapiiraa Bibilia.

Aita râ te toea o to ˈu utuafare i tamau i te haapii i te Bibilia. Ua faaoti papu râ vau eiaha e faarue i te reira e eiaha atoa e vaiiho i te tahi noa ˈˈe taata aore ra ohipa ia tapea ia ˈu. Ua ite au eita vau e moˈemoˈe ia tahoê noa vau e te nunaa o te Atua e o ratou to ˈu utuafare. Ua tamau vau i te haere i mua e bapetizohia ˈtura vau ei Ite no Iehova i 1991.

E taata ino, haavî e taputô vau na mua ˈˈe. Ua taui roa râ te Parau a te Atua i to ˈu oraraa. I teie mahana, te faaite nei au i te poroi hau a te Bibilia i te taata atoa e farii. Ua haamaitaihia vau i te tavini ei taata poro ma te taime taatoa i na 23 matahiti mairi.

Ua riro atoa vau ei rima tauturu i te amaa a te mau Ite no Iehova i Mehiko. I reira to ˈu farereiraa ia Claudia, e Kerisetiano itoito mau, e ua faaipoipo mâua i 1999. Auê au i te mauruuru ia Iehova i te haamaitairaa mai ia ˈu ma te horoa mai i te hoê hoa faaipoipo taiva ore!

Ua tavini mâua i roto i te tahi amuiraa reo apǎraa rima Mehiko no te tauturu i te feia turi ia ite o vai o Iehova. I muri aˈe, ua anihia ia haere mâua i Belize no te haapii i te Bibilia i te feia o tera fenua. E ere to mâua oraraa i te mea fanaˈo mai na mua ˈˈe, te oaoa nei râ mâua! Eita roa hoi e hinaaro e taui noa ˈˈe i te tahi mea!

Ua rave faahou to ˈu mama i ta ˈna haapiiraa Bibilia e ua bapetizohia i teie nei. E Ite no Iehova atoa to ˈu tuaana, ta ˈna vahine e tamarii. Te tavini atoa nei vetahi o to ˈu mau hoa tahito ta ˈu i poro ia Iehova i teie mahana.

Ma te peapea, ua pohe vetahi mero o to ˈu utuafare no te mea aita ratou i faaea i te rave i te mau ohipa iino. Ahiri vau i tamau i nia i tera eˈa, ua pohe atoa vau. Auê au i te mauruuru ia Iehova, ua farii o ˈna ia haafatata vau ia ˈna e ia farerei au i ta ˈna mau tavini! Ua tauturu mai hoi ratou ia haapao i te mau aratairaa Bibilia ma te faaoromai e te mǎrû.