1. E nafea tatou e auraro ai i te Atua e te faatereraa taata?

 TE HAAPII mai ra te Bibilia ia auraro i te mau faatereraa taata, te parau atoa ra râ te reira e e tia ia tatou ia auraro noa i te Atua. (Ohi. 5:29; Tito 3:1) E nafea ïa? Ua faataa Iesu i te hoê faaueraa tumu no te tauturu ia tatou ia ite o vai ta tatou e auraro. Ua parau oia e mea tia ia faahoˈi i “ta Kaisara ia Kaisara ra, e ta te Atua ra, e hopoi â ïa i te Atua ra.” ^[1] (Mat. 22:21) E faahoˈi tatou i “ta Kaisara ia Kaisara” ia auraro tatou i te mau ture a te hau faatere, ia faatura tatou i te mau tia faatere e ia aufau i te mau tute. (Roma 13:7) Ia parau mai râ te faatereraa ia rave i te tahi ohipa e aita Iehova e hinaaro ia rave tatou, e patoi tatou, ma te faatura râ.

2. E nafea tatou e faaite ai e aita tatou e faaô ra i roto i te mau ohipa poritita a teie nei ao?

² Hoê ravea e faahoˈi ai i “ta te Atua ra, . . . i te Atua ra,” ma te oreraa ïa e faaô i roto i te ohipa poritita a teie nei ao. E tapea tatou i to tatou tiaraa amui ore no nia i te reira. (Isa. 2:4) Ua vaiiho Iehova i te mau faatereraa taata ia faatere, eita tatou  e patoi atu ia ratou. Eita atoa tatou e faaô i roto i te mau ohipa here aiˈa. (Roma 13:1, 2) Eita tatou e tamata i te taui i te mau faatereraa aore ra i te ohipa i nia i te mau tia poritita e eita tatou e maiti i te tahi pǔpǔ poritita aore ra e riro mai ei tia poritita.

3. No te aha ia tapea tatou i to tatou tiaraa amui ore?

³ E rave rahi tumu i parau mai ai te Atua ia tapea i to tatou tiaraa amui ore. Hoê o te mau tumu, te pee ra tatou i to Iesu hiˈoraa, “e ere [hoi oia] i to teie nei ao.” Aita roa ˈtu oia i faaô i roto i te mau ohipa poritita aore ra i roto i te mau tamaˈi. (Ioa. 6:15; 17:16) E te tahi tumu, te turu ra tatou i te Basileia o te Atua. No te mea eita tatou e turu i te mau faatereraa taata, e manaˈo haava maitai to tatou ia poro tatou i te taata e o te Basileia o te Atua anaˈe te nehenehe e faatitiaifaro i te mau fifi atoa o te huitaata. Te faaô ra te mau haapaoraa hape i roto i te mau ohipa poritita e na te reira e faaamahamaha i te taata. No te mea râ e tapea tatou i to tatou tiaraa amui ore, e hoê ïa tatou e to tatou mau taeae e tuahine na te ao atoa nei.—Pet. 1, 2:17.

4. (a) E nafea tatou e ite ai e e riro ei mea fifi roa ˈtu â ia tapea i to tatou tiaraa amui ore? (b) No te aha ia faaineine tatou i teie nei â ia tapea i to tatou tiaraa amui ore?

⁴ Te ora ra paha tatou i te hoê vahi aita te taata e tiai ra ia faaô tatou i roto i te mau ohipa poritita. A piri noa ˈi râ te hopea o te ao a Satani, e riro ei mea fifi roa ˈtu â i te tapearaa i to tatou tiaraa amui ore. I teie mahana, aita te taata e hinaaro e faatupu i te hau e e “mârô” atoa ratou e e amahamaha ˈtu â ratou. (Tim. 2, 3:3, 4) Te vai ra vetahi o to tatou mau taeae o tei peapea i te taui-taue-raa te poritita o to ratou fenua. No reira, mea titauhia ia faaineine tatou ia tatou iho i teie nei â no te tapea i to tatou tiaraa amui ore, i roto atoa i te mau tupuraa fifi. E hiˈopoa anaˈe e maha tuhaa no te faaineine ia tatou.

5. Eaha to Iehova manaˈo i te mau faatereraa a te taata?

⁵ Hoê ravea e faaineine ai ia tatou i teie nei â no te tapea i to tatou tiaraa amui ore, o te faatuearaa ïa i to tatou manaˈo e to Iehova no nia i te mau faatereraa taata. Aita Iehova i horoa i te taata te tiaraa e faatere i te tahi atu mau taata a poiete ai oia ia ratou. (Ier. 10:23) No ˈna, ua riro te taata atoa mai te hoê utuafare. Ua faaamahamaha râ te mau faatereraa i te taata, ma te parau e o to ratou nunaa te mea maitai roa ˈˈe. Noa ˈtu e e au ra e mea maitai te mau faatereraa, eita ta ratou e nehenehe e faatitiaifaro i te mau fifi atoa. Ua riro atoa mai ratou ei enemi no te Basileia o te Atua o tei haamata i te faatere i 1914. Fatata roa teie Basileia i te faaore i te mau faatereraa taata atoa.—A taio i te Salamo 2:2, 7-9.

6. Eaha to tatou huru i nia i te feia e mana to ratou i roto i te faatereraa?

⁶ Ua vaiiho te Atua i te mau taata ia faatere, no te mea e nehenehe ratou e haa ia vai te tahi hau e te nahonaho atoa. E tauturu  mai te reira ia poro i te parau apî oaoa o te Basileia o te Atua. (Roma 13:3, 4) Ua parau atoa mai Iehova ia pure no te feia e mana to ratou ia nehenehe tatou e haamori ia ˈna ma te hau. (Tim. 1, 2:1, 2) Aita anaˈe vetahi ê e haa ma te tano i nia ia tatou, e ani paha tatou i te feia mana a te hau faatere i te tauturu. Tera ta Paulo i rave. (Ohi. 25:11) Ua parau te Bibilia e mana to Satani i nia i te mau faatereraa taata, aita râ te reira e parau ra e e mana to ˈna i nia i te taata taitahi a te hoê hau faatere. (Luka 4:5, 6) No reira, eiaha roa ˈtu tatou e horoa i te tahi mau taata te manaˈo e te faaterehia ra te tahi mau tia faatere e te Diabolo. Te faataa ra te Bibilia e aita e tia ia tatou ia faaino ia vetahi ê.—Tito 3:1, 2.

7. Eaha te manaˈo mea tia ia tatou ia haapae?

⁷ E auraro tatou i te Atua ma te oreraa e turu i te tahi feia poritita aore ra pǔpǔ poritita, noa ˈtu e e faufaahia tatou i to ratou mau manaˈo. I te tahi mau taime, e ere paha i te mea ohie no tatou. Ei hiˈoraa, te orure hau ra te taata i te hoê faatereraa o tei haamauiui rahi ia ratou, oia atoa i te mau Ite no Iehova. Mea papu, eita tatou e apiti atu i te feia orure hau. Tera râ, e manaˈo anei oe e ua tano te feia orure hau a tiaturi atu ai e e manuïa ratou? (Eph. 2:2) Ia hinaaro tatou e tapea i to tatou tiaraa amui ore, e haapae tatou i te manaˈo e mea tano aore ra mea maitai aˈe hoê pae i te tahi atu. E itehia te reira ma ta tatou e parau e e rave.

8. Mea fifi anaˈe ia tapea i te tiaraa amui ore, e nafea tatou e faaite ai i te “paari” ma te “hapa ore” râ?

⁸ Te piti o te ravea no te tapea i to tatou tiaraa amui ore, ia “paari . . . mai te ophi ra, e te hapa ore mai te uuairao ra.” (A taio i te Mataio 10:16, 17.) E faaite tatou i te “paari” ia feruri tatou i te mau fifi e nehenehe e tupu mai. E e faaite tatou i te “hapa ore” ia tapea tatou i to tatou tiaraa amui ore i mua i tera mau tupuraa fifi. E hiˈopoa anaˈe te tahi o tera mau tupuraa e e nafea ia tapea i to tatou tiaraa amui ore.

9. Eaha te tia ia tatou ia haapao maitai ia paraparau tatou ia vetahi ê?

⁹ Te mau tauaparauraa. Mea tia ia haapao maitai tatou ia haamata te taata i te tauaparau no nia i te mau ohipa poritita. Ei hiˈoraa, ia paraparau tatou i te taata no nia i te Basileia o te Atua, eita ïa tatou e parau e e farii aore ra eita tatou e farii i te mau manaˈo o te hoê pǔpǔ aore ra aratai poritita. Eiaha tatou e paraparau no nia i ta te taata e hinaaro ra e rave no te faatitiaifaro i te mau fifi o te huitaata, e faaite râ tatou ia au i te Bibilia e nafea te Basileia o te Atua e faatitiaifaro roa ˈi i te reira. Ia hinaaro te taata e aparau i nia i te hoê tumu parau, mai te faaipoiporaa tane tane e vahine vahine aore ra te haamaruaraa tamarii, e faaite anaˈe eaha ta te Parau a te Atua e faataa ra e e nafea tatou e tutava ˈi i te pee i te reira i roto i to tatou oraraa. Ia parau te tahi taata e e tia ia faaorehia aore ra ia faatanohia te tahi mau ture, e tapea tatou i to tatou tiaraa amui ore e aita tatou e mârô atu ia taui teie taata i to ˈna manaˈo.

10. E nafea tatou e papu ai e te tapea ra tatou i te tiaraa amui ore ia mataitai aore ra ia taio tatou i te mau mea atoa tei haapurorohia?

¹⁰ Te ravea haaparareraa parau. I te tahi mau taime, e faatiahia te hoê parau apî ma te turu maitai hoê pae o te aamu. Parau mau te reira i te mau fenua iho â râ e mana to te faatereraa i nia i te mau parau apî. Ia paetahi te mau faanahonahoraa aore ra te mau papai vea, mea tia ia haapao maitai  tatou eiaha e haamata i te manaˈo mai ia ratou. Ei hiˈoraa, a ui ‘Mea au anei na ˈu ia faaroo i te tahi taata papai vea, no te mea te farii ra vau i ta ˈna e parau ra no nia i te mau ohipa poritita?’ No te tauturu ia tatou ia tapea i to tatou tiaraa amui ore, eiaha e mataitai aore ra e taio i te mau tapura e rave rahi o tei niuhia i nia i te mau ohipa poritita. E tamata râ tatou i te imi i te mau tapura paetahi ore. E a faaau noa i ta oe e faaroo i “te hiroa parau mau” e itehia ra i roto i te Bibilia.—Tim. 2, 1:13.

11. E nafea e riro ai ei mea fifi no tatou ia tapea i te tiaraa amui ore mai te peu e mea faufaa ta tatou mau taoˈa no tatou?

¹¹ Te taoˈa materia. Mai te peu e e mea faufaa roa no tatou te moni e ta tatou iho mau taoˈa, e nehenehe te tapearaa i to tatou tiaraa amui ore e riro mai ei mea fifi. I muri aˈe i 1970, ua vaiiho e rave rahi Ite no Iehova i Malawi i ta ratou mau taoˈa materia, no te mea ua patoi ratou i te apiti atu i te hoê pǔpǔ poritita. Teie râ hoi, aita vetahi i faarue i to ratou oraraa au mau. Te haamanaˈo ra te hoê tuahine o Ruth te iˈoa: “Ua horo ê vetahi e o matou atoa, i muri aˈe râ, ua apiti ratou i te pǔpǔ poritita e ua hoˈi ratou no te mea aita ratou i au e ora i te puhapa no te feia i horo ê.” E ere râ mai tera te rahiraa o te mau tavini a te Atua. E tapea ratou i to ratou tiaraa amui ore, noa ˈtu e iti mai ta ratou moni aore ra e ere ratou i ta ratou iho mau taoˈa materia.—Heb. 10:34.

12, 13. (a) Eaha to Iehova manaˈo no nia i te huitaata? (b) E nafea tatou e ite e te faateoteo ra tatou i to tatou fenua?

¹² Te teoteo. Mea matauhia i te taata i te teoteo i to ratou nunaa, peu tumu, oire aore ra fenua. Aita râ Iehova e manaˈo e mea maitai aˈe te tahi taata aore ra pǔpǔ taata i te tahi atu. No ˈna, mea aifaito tatou pauroa. Mea papu, i te poieteraa mai Iehova, mea taa ê tatou pauroa e te oaoa e te faahiahia nei tatou i te rauraa o te reira. Eita oia e titau ia vaiiho tatou i ta tatou peu tumu. Eita atoa râ oia e hinaaro ia manaˈo tatou e mea maitai aˈe tatou ia vetahi ê.—Roma 10:12.

¹³ Eita roa ˈtu e tia ia tatou ia teoteo i to tatou fenua aore ra nunaa a manaˈo atu ai tatou e mea maitai aˈe to tatou i to te tahi atu. Ia manaˈo tatou mai tera, e nehenehe te reira e riro ei mea fifi roa no tatou i te tapearaa i to tatou tiaraa amui ore. Tera tei itehia i te senekele matamua. Aita vetahi mau taeae Hebera i haapao maitai i te mau vahine ivi Heleni. (Ohi. 6:1) E nafea tatou e ite ai e te haamata ra tatou i te faatupu i tera huru teoteo? Ia horoa te hoê taeae aore ra te hoê tuahine i to ˈna manaˈo, e feruri oioi anei oe, ‘Mea ite aˈe matou i te rave i te reira,’ a patoi atu ai i to ˈna manaˈo? Mai te peu e e, a haamanaˈo i teie aˈoraa faufaa: “Ei aau haehaa . . . , i te manaˈo haamaitairaa ˈtu te tahi i te tahi eiaha ia ˈna iho.”—Phil. 2:3.

14. E nafea te pure e tauturu mai ai, e eaha te hiˈoraa Bibilia e haapapu ra i te reira?

¹⁴ Te toru o te ravea e tapea ˈi tatou i to tatou tiaraa amui ore, o te tiaturiraa ïa ia Iehova. A pure no te ani i te varua moˈa, o te nehenehe e horoa mai i te faaoromai e te hitahita ore. E tauturu teie mau huru maitatai  ia oe ia rave te faatereraa i te tahi ohipa piˈo aore ra tano ore. A ani ia ˈNa i te paari no te taa i te hoê tupuraa o te nehenehe e riro mai ei mea fifi no tatou ia tapea i to tatou tiaraa amui ore. A ani ia Iehova ia tauturu ia oe ia rave i te mea tano i roto i tera tupuraa. (Iak. 1:5) E afaihia paha oe i te fare tapearaa aore ra e faautuahia oe no to oe taiva ore ia Iehova. Mai te peu e tera te tupu mai, a pure no te ani i te itoito ia nehenehe oe e faataa ia vetahi ê ma te papu no te aha e tapea ˈi oe i to oe tiaraa amui ore. E papu ia oe e e tauturu Iehova ia oe ia faaoromai.—A taio i te Ohipa 4:27-31.

15. E nafea te Bibilia e tauturu ai ia tatou ia tapea i te tiaraa amui ore? (A hiˈo atoa i te tumu parau tarenihia “ Ua haapuai te Parau a te Atua i to ratou tiaturiraa.”)

¹⁵ Ua horoa mai Iehova i te Bibilia no te faaitoito ia tatou. A feruriruri i te mau irava o te tauturu ia oe ia tapea i to oe tiaraa amui ore. A tamata i te tamau aau teie mau irava, e tauturu te reira ia oe mai te peu aita anaˈe e Bibilia ia oe ra. E nehenehe atoa te Bibilia e haapuai i to oe tiaturiraa i ta Iehova i parau no nia i te a muri aˈe. Mea titauhia tera tiaturiraa no te faaoromai i te hamani-ino-raa. (Roma 8:25) A maiti i te mau irava o te faataa ra i te mau ohipa o ta oe e hinaaro ra e fanaˈo i roto i te ao apî e a feruri ia oe i reira.

16, 17. Eaha ta tatou e haapii mai i te mau hiˈoraa o te mau tavini taiva ore a te Atua o tei tapea i to ratou tiaraa amui ore? (A hiˈo i te hohoˈa matamua.)

¹⁶ Te maha o te ravea o te tauturu ia tatou ia tapea i to tatou tiaraa amui ore, o te feruriraa ïa i te mau hiˈoraa o te mau tavini taiva ore a Iehova. E rave rahi i tahito ra o tei faaite i te itoito e ua rave ratou i te mau faaotiraa î i te paari o tei tauturu ia ratou ia tapea i to ratou tiaraa amui ore. A feruri na ia Sadaraka, o Meseka e Abede-nego, o tei patoi i te haamori i te hoê hohoˈa o tei faaauhia i te faatereraa a Babulonia. (A taio i te Daniela 3:16-18.) Ua tauturu teie aamu Bibilia e rave rahi Ite no Iehova i teie mahana ia faaite i te itoito e eiaha e haamori i  te reva o to ratou fenua. Aita Iesu i faaô i roto i te mau ohipa poritita aore ra i te tahi mau ohipa o te faaamahamaha i te mau taata. Ua ite oia e e tauturu to ˈna hiˈoraa maitai i ta ˈna mau pǐpǐ. Ua parau oia: “E faaitoito râ, ua riro te re o teie nei ao ia ˈu.”—Ioa. 16:33.

¹⁷ E rave rahi Ite no Iehova o to tatou tau o tei tapea i to ratou tiaraa amui ore. Ua hamani-ino-hia vetahi, ua tuuhia i roto i te fare tapearaa e ua haapohe-atoa-hia no to ratou taiva ore ia Iehova. E tauturu to ratou hiˈoraa ia tatou ia faaite i te itoito. Ua parau te hoê taeae no Turekia mai oia: “E taeae apî o Franz Reiter, o tei haapohehia no to ˈna patoiraa i te faaô i roto i te nuu a Hitler. Ua faaite te rata ta ˈna i papai i to ˈna mama i te po hou oia a pohe ai i te faaroo rahi e i te tiaturi ia Iehova e te hinaaro nei au e pee i to ˈna hiˈoraa ia faaruru noa ˈtu vau i te hoê â fifi. ^[2]

18, 19. (a) E nafea te mau melo o ta oe amuiraa e tauturu ai ia oe ia tapea i te tiaraa amui ore? (b) Eaha ta oe e faaoti papu i te rave?

¹⁸ E nehenehe te mau taeae e tuahine o ta oe amuiraa e tauturu ia oe ia tapea i to oe tiaraa amui ore. Ia ite te mau matahiapo e tei roto oe i te hoê tupuraa fifi, e nehenehe ta ratou e horoa ˈtu i te mau aˈoraa maitai o te Bibilia. Oia atoa, ia ite te tahi mau melo o te amuiraa eaha to oe tupuraa, e nehenehe ta ratou e faaitoito ia oe. A ani ia ratou ia pure no oe. E tia atoa râ ia tatou ia turu i to tatou mau taeae e ia pure no ratou. (Mat. 7:12) No te ite i te mau tapura iˈoa o te mau taeae o tei tapeahia i te fare tapearaa i nia jw.org, a hiˈo i te tumu parau “Témoins de Jéhovah emprisonnés en raison de leur foi (par pays)” i raro aˈe i te tuhaa, SALLE DE PRESSE > VEILLE JURIDIQUE. A maiti i te tahi mau iˈoa e a ani ia Iehova ia tauturu i teie mau taeae e tuahine ia faaite i te itoito e ia vai taiva ore ia ˈna.—Eph. 6:19, 20.

¹⁹ A piri noa ˈtu â ˈi tatou i te hopea, e rahi atu â te mau faatereraa i te faahepo ia tatou ia ore tatou e tapea i to tatou tiaraa amui ore. No reira, mea faufaa ia faaineine ia tatou i teie nei â no te tapea i to tatou tiaraa amui ore i roto i teie ao amahamaha!