1, 2. (a) Eaha te auraa o te “ô horoa noa eita e tia ia parau?” (b) Eaha te mau uiraa ta tatou e hiˈopoa mai i roto i teie tumu parau?

 UA HOROA Iehova i te hoê ô rahi roa ˈˈe o te here a tono ai oia i ta ˈna Tamaiti here ra o Iesu i nia i te fenua nei! (Ioa. 3:16; Ioa. 1, 4:9, 10) Ua pii te aposetolo Paulo i teie ô te hoê “ô horoa noa eita e tia ia parau.” (Kor. 2, 9:15) No te aha Paulo i faahiti ai i te reira?

² Ua ite Paulo e e haapapuraa te tusia taraehara o Iesu e e faatupu iho â te Atua i ta ˈna mau parau fafau. (A taio i te Korinetia 2, 1:20.) Te auraa ïa e e tei roto atoa te tusia taraehara o Iesu i te “ô horoa noa eita e tia ia parau” a te Atua. E te haapapu ra te maitai e te here taiva ore atoa ta Iehova e faaite mai. Eita e nehenehe e faataa i te faufaaraa o te hoê ô horoa noa mai teie no te taa maitai i te reira. Eaha ïa to tatou huru aau a feruri ai i teie ô horoa noa? E e nafea te reira e turai ai ia faaineine ia tatou no te Oroa haamanaˈoraa o te poheraa o te Mesia o te tupu i te Mahana toru 23 no Mati 2016?

3, 4. (a) Eaha to oe huru aau ia horoa mai te hoê taata i te hoê ô na oe? (b) E nafea te hoê ô taa ê e nehenehe ai e taui i to oe oraraa?

³ Mea au roa na tatou ia horoa mai te hoê taata i te hoê ô na tatou. Te vai ra râ te tahi mau ô mea faufaa roa aore e mea taa ê roa e e nehenehe te reira e taui i to tatou oraraa. Ei hiˈoraa, a feruri na e ua parihia oe no te hoê ohipa ino. Te faautuaraa o te reira, o te pohe ïa. Tera râ, ua hinaaro te hoê taata o ta oe i ore i matau e rave i teie faautuaraa no ˈna. Te hinaaro nei oia e pohe no oe! Eaha ïa to oe huru aau no te hoê ô taa ê mai teie?

⁴ E turai te hoê ô î i te here e te taa ê ia oe ia rave i te mau tauiraa i roto i to oe oraraa. I te hoê â taime, e turai atoa mai te reira ia faatupu rahi atu â i te aau horoa noa e ia faaite i te here ia vetahi ê. Oia atoa, e turai te reira ia faaore i te hapa a te feia i rave i te ino i nia ia oe. No te toea o to oe oraraa, e hinaaro paha oe e faaite i te mauruuru no te tusia taraehara i ravehia.

5. E nafea te ô a te Atua o te hoo i hau aˈe i te tahi atu ô?

⁵ Ua hau aˈe te ô a te Atua, oia hoi te hoo, i te ô o tei faahitihia i roto i te hiˈoraa. (Pet. 1, 3:18) A feruri na: Ua raea tatou pauroa i te hara no ǒ mai ia Adamu ra, e te faautuaraa, o te pohe ïa. (Roma 5:12) Ua turai te here ia tono Iehova ia Iesu i te fenua nei no te pohe no te mau taata atoa, “ia pohe oia ei [m]ono i te taata atoa.” (Heb. 2:9) Mea rahi atu â ta te tusia taraehara o Iesu e rave mai! E faaore roa te reira i te pohe a muri noa ˈtu. (Isa. 25:7, 8; Kor. 1, 15:22, 26) E ora te feia o te faaite i te faaroo ia Iesu ma te hau e e ite ratou i te oaoa e a muri noa ˈtu. E fanaˈo atoa te feia e riro mai ei arii e te Mesia i nia i te raˈi aore ra ei tavini o te Basileia o te Atua i te fenua. (Roma 6:23; Apo. 5:9, 10) Eaha te tahi atu mau haamaitairaa tei ô i roto i te ô a Iehova?

6. (a) Eaha te mau haamaitairaa ta oe e tiai ru nei? (b) Maoti te ô a te Atua, eaha na ohipa e toru e turai mai ia rave?

⁶ Ei tuhaa o te ô a te Atua, e riro mai te fenua ei paradaiso, e faaorahia mai tei maˈihia e e faaora-faahou-hia te feia pohe. (Isa. 33:24; 35:5, 6; Ioa. 5:28, 29) Te here ra tatou ia Iehova e i ta ˈna Tamaiti here no te horoaraa i teie “ô horoa noa eita e tia ia parau” na tatou. Eaha ta teie ô e turai mai ia rave? E turai ia tatou (1) ia pee maite i te hiˈoraa o Iesu Mesia, (2) ia here i to tatou mau taeae e tuahine, e (3) ia faaore i te hapa a vetahi ê ma te aau atoa.

7, 8. (a) Eaha to tatou huru aau no nia i te here o te Mesia? (b) E turai mai te reira ia rave i te aha?

⁷ Na mua, e turai mai te reira ia faaohipa i to tatou oraraa no te faahanahana ia Iesu. Ia au i ta te aposetolo Paulo i parau: “Te riro nei hoi matou i te aroha o te Mesia.” (A taio i te Korinetia 2, 5:14, 15.) Ua ite Paulo e ia farii tatou i te here rahi o Iesu, e faahepohia aore ra e turaihia tatou ia here e ia faahanahana ia Iesu. Parau mau, ia taa maitai tatou i te mau ohipa atoa ta Iehova i rave no tatou, e turai mai to ˈna here ia tatou ia faaite i te faatura ia Iesu. E nafea ïa?

⁸ E turai te here no Iehova ia pee maite tatou i te hiˈoraa o Iesu. (Pet. 1, 2:21; Ioa. 1, 2:6) Ia auraro tatou i te Atua e i te Mesia, te haapapu ra tatou i to tatou here no ratou. Ua parau mai Iesu: “Tei ia ˈna ta ˈu ra parau e ua haapao oia i taua parau ra, oia tei hinaaro mai ia ˈu; e tei hinaaro mai ia ˈu ra, e herehia mai oia e tau Metua ra; e e here hoi au ia ˈna, e e  faaite atu hoi au ia ˈna ia ˈu iho.”—Ioa. 14:21; Ioa. 1, 5:3.

9. Eaha te mau tamataraa ta tatou e ite ra?

⁹ I te tau o te Oroa haamanaˈoraa, mea maitai ia feruri i nia i te faaohiparaa o to tatou oraraa. E uiui anaˈe: ‘I roto i teihea tuhaa i pee aˈena anei au i te hiˈoraa o Iesu? I roto i teihea tuhaa e nehenehe ai au e haamaitai?’ Mea faufaa roa ia ui i teie mau uiraa no te mea te hinaaro ra te ao ia ora tatou mai tei matauhia i te rave. (Roma 12:2) Mai te peu e aita tatou e tâuˈa ˈtu, e tamatahia tatou ia pee i te hiˈoraa o te mau orometua haapii, te mau taata tuiroo e te mau aito tuaro o teie nei ao. (Kol. 2:8; Ioa. 1, 2:15-17) E nafea tatou e patoi ai i teie mau tamataraa?

10. (a) Eaha te mau uiraa ta tatou e ui mai i te tau o te Oroa haamanaˈoraa? (b) E turai mai te mau pahonoraa o te reira ia rave i te aha? (A hiˈo i te hohoˈa matamua.)

¹⁰ I te tau o te Oroa haamanaˈoraa, mea maitai ia faataa i te tahi taime no te hiˈopoa i to tatou mau ahu, ta tatou mau hohoˈa teata e ta tatou mau upaupa. E hiˈopoa atoa mai eaha to roto i ta tatou roro uira, niuniu afaifai aore ra matini roro uira. E uiui anaˈe: ‘Ahani to reira Iesu e e ite o ˈna i te ahu ta ˈu e oomo, e haama anei au?’ (A taio i te Timoteo 1, 2:9, 10.) ‘E faaite anei to ˈu ahu e e pǐpǐ vau na Iesu? Mea au anei na Iesu ia mataitai vau i ta ˈu mau hohoˈa teata? E faaroo anei oia i ta ˈu mau upaupa? Ahani Iesu i rave i ta ˈu niuniu afaifai aore ra i ta ˈu matini roro uira, e haama anei au no te mau mea ta ˈna e ite? Mea fifi anei no ˈu ia faataa ˈtu ia Iesu no te aha mea au na ˈu i te tahi mau hauti video?’ E turai to tatou here no Iehova ia faarue i te mau mea atoa e ere i te mea tano no te hoê Kerisetiano, noa ˈtu eaha te rahi o te haamâuˈaraa. (Ohi. 19:19, 20) I te pûpûraa i to tatou ora no Iehova, ua euhe tatou i te faaohipa i to tatou oraraa no te faahanahana i te Mesia. Eiaha ïa tatou e tapea i te tahi mea o te nehenehe e haafifi ia tatou no te pee i te hiˈoraa o Iesu.—Mat. 5:29, 30; Phil. 4:8.

11. (a) E turai to tatou here no Iehova e no Iesu ia aha i roto i te pororaa? (b) E nafea to tatou here e turai mai ai ia tauturu ia vetahi ê i roto i te amuiraa?

¹¹ E turai to tatou here no Iesu ia poro e ia haapii atu ma te itoito. (Mat. 28:19, 20; Luka 4:43) I te tau o te Oroa haamanaˈoraa, e nehenehe anei oe e rave i te tahi mau faanahoraa i roto i to oe oraraa no te riro ei pionie tauturu a faataa ˈtu ai 30 hora aore ra 50 hora no te pororaa? Ua manaˈo te hoê tane ivi, e 84 matahiti to ˈna, e eita e maraa ia ˈna ia rave i te taviniraa pionie no to ˈna matahiti rahi e no to ˈna ea. Ua hinaaro râ te tahi mau pionie i roto i ta ˈna tuhaa fenua e tauturu ia ˈna. Ua faanaho ïa ratou i te mau faurao no te afai atu aore ra no te faahoˈi atu ia ˈna. Ua maiti atoa ratou i te mau tuhaa fenua mea tano no ˈna no te haere e poro. Ei faahopearaa, ua naea i te taeae ta ˈna fa e 30 hora. E nehenehe anei oe e tauturu i te hoê melo o ta oe amuiraa ia riro oia ei pionie tauturu i te avaˈe Mati aore ra Eperera? Parau mau, e ere o tatou pauroa te nehenehe e riro ei pionie. Teie râ, e nehenehe tatou e faaohipa i to tatou taime e itoito no te rave hau atu â i roto i ta tatou taviniraa no Iehova. Ia na reira tatou, e faaite tatou mai ia Paulo e te turaihia ra tatou maoti te here o Iesu. Eaha ˈtu â ohipa ta te here o te Atua e turai mai ia rave?

12. E turai mai te here o te Atua ia rave i te aha?

¹² Te piti, e turai mai te here o te Atua ia here i to tatou mau taeae. Ua papai te aposetolo  Ioane: “E au mau here e, e aroha tatou ia tatou iho.” (Ioa. 1, 4:7-11) No reira, ia farii tatou i te here o te Atua, e titauhia ia here i to tatou mau taeae. (Ioa. 1, 3:16) E nafea ïa?

13. Eaha te hiˈoraa ta Iesu i vaiiho mai a here ai ia vetahi ê?

¹³ Te faaite mai ra te hiˈoraa o Iesu e nafea tatou e nehenehe ai e here ia vetahi ê. I to ˈna faaearaa i te fenua nei, ua tauturu Iesu i te taata, i te feia veve iho â râ. Ua faaora oia i te feia maˈi, te pirioi, te matapo, te tariˈa turi e te vava. (Mat. 11:4, 5) Mea taa ê roa Iesu i te mau tia faaroo no te mea mea au na ˈna ia haapii i te taata o tei hinaaro e ite o vai te Atua. (Ioa. 7:49) Ua here Iesu i te feia haehaa e ua haa rahi oia no te tauturu ia ratou.—Mat. 20:28.

14. Eaha ta oe e nehenehe e rave no te faaite i te here no to tatou mau taeae?

¹⁴ E taime au mau atoa te tau o te Oroa haamanaˈoraa no te feruri i nia i te mau ravea e nehenehe ai oe e tauturu i te mau taeae e tuahine i roto i ta oe amuiraa, i te feia ruhiruhia iho â râ. E nehenehe anei oe e haere e hiˈo i teie mau hoa herehia? E nehenehe anei oe e afai na ratou i te tahi maa, e tauturu ia ratou i roto i te mau ohipa i te fare, e haere e tii ia ratou no te haere i te mau putuputuraa aore ra e apiti e o ratou i roto i te pororaa? (A taio i te Luka 14:12-14.) A vaiiho anaˈe te here o te Atua e turai ia oe ia faaite i te here no to tatou mau taeae!

15. Eaha te titauhia ia tatou ia farii?

¹⁵ Te toru, e turai mai te here o Iehova ia faaore i te hapa o to tatou mau taeae e tuahine. E taata tia ore tatou pauroa no te mea no ǒ mai ia Adamu ra te hara e te pohe. Aita ïa taata e nehenehe e parau, “Aita e faufaa ia fanaˈo vau i te hoo.” E titau-atoa-hia i te tavini a te Atua mea taiva ore ia fanaˈo i te ô o te hoo. Ua faaorehia ia tatou paatoa i te hoê tarahu rahi! No te aha mea faufaa ˈi ia farii i te reira? E itehia te pahonoraa i roto i te hoê faahohoˈaraa a Iesu.

16, 17. (a) Eaha ta tatou e haapii mai i nia i te faahohoˈaraa a Iesu no nia i te arii e te mau tavini? (b) I muri iho i te feruri-maite-raa i nia i te faahohoˈaraa a Iesu, eaha ta oe e faaoti papu i te rave?

¹⁶ Ua horoa Iesu i te hoê faahohoˈaraa i nia i te hoê arii o tei faaore i te hoê tarahu rahi e 60 000 000 denari i ta ˈna tavini. I muri iho râ, aita teie tavini i faaore i te hoê tarahu mea iti aˈe i te tahi atu tavini, 100 noa denari ta ˈna. Ua turai te hamani maitai o te arii i ta ˈna tavini ia faaore i te tarahu a te tahi atu tavini. Ua riri roa te arii i to ˈna faarooraa e aita ta ˈna tavini i faaore i te hoê tarahu iti mai teie. Ua parau oia: “E teie nei tavini ino e! faaore atoa ˈtura vau i tau tarahu ia oe ra, o oe i parau mai ia ˈu ra; eiaha oe e aroha atoa ˈtu i to taeae tavini mai ia ˈu i aroha ˈtu ia oe na?” (Mat. 18:23-35) Mai te arii, ua faaore mai Iehova i te hoê tarahu rahi. E turai mai te here  e te hamani maitai o Iehova ia rave tatou i te aha?

¹⁷ A faaineine ai tatou no te Oroa haamanaˈoraa, e uiui anaˈe paha: ‘Ua haamauiui anei te hoê taeae ia ˈu? Mea fifi anei no ˈu ia faaore i ta ˈna hapa?’ Mai te peu e tera iho â, e taime au mau teie no te pee i te hiˈoraa o Iehova, o tei tia ia ˈna ia faaore i te hara. (Neh. 9:17; Sal. 86:5) Ia haafaufaa tatou i te hamani maitai rahi o Iehova, e faaite atoa ïa tatou i te hamani maitai ia vetahi ê e ia faaore i ta ratou hapa ma te aau atoa. Ia ore râ tatou e here e e faaore i te hapa a to tatou mau taeae, eiaha tatou e tiai ia here e ia faaore mai Iehova i ta tatou mau hapa. (Mat. 6:14, 15) Ia faaore tatou i te hapa a vetahi ê, te vai noa ra te mauiui. Teie râ, e tauturu mai te reira ia fanaˈo tatou i te hoê a muri aˈe oaoa mau.

18. Mea nafea te here o te Atua i turai ai i te hoê tuahine ia faaoromai i te huru tia ore o te tahi atu tuahine?

¹⁸ Mea fifi ia faaoromai i te huru tia ore o to tatou mau taeae e tuahine. (A taio i te Ephesia 4:32; Kolosa 3:13, 14.) Ua na reira Lily, te hoê tuahine. ^[1] Ua tauturu oia i te hoê vahine ivi, o Carol to ˈna iˈoa. Ei hiˈoraa, ua faahoro Lily ia Carol na nia i to ˈna pereoo i te mau vahi ta ˈna i hinaaro e haere, ua tauturu ia ˈna no te hoohoo-haere-raa e ua rave oia i te tahi atu mau ohipa no ˈna. Noa ˈtu te reira, e riri noa o Carol, e i te tahi mau taime, e ere i te mea ohie no Lily ia tauturu ia ˈna. Ua haapao noa râ Lily i te mau huru maitatai o Carol e ua tauturu noa oia ia ˈna tau matahiti hou a roohia ˈi Carol i te hoê maˈi rahi e a pohe atu ai oia. Noa ˈtu e ere i te mea ohie no Lily ia tauturu ia Carol, ua parau oia: “Te tiai ru nei au e ite ia Carol i te tia-faahou-raa. E hinaaro vau e ite ia ˈna ei taata tia roa.” Mea papu, e turai mai te here o te Atua ia faaite i te faaoromai i to tatou mau taeae e tuahine. Oia atoa, te tiai ru nei tatou i te taime e faaore-roa-hia to tatou huru tia ore no a muri noa ˈtu.

19. E nafea te “ô horoa noa eita e tia ia parau” e turai ai ia oe?

¹⁹ Ua horoa mai Iehova i te hoê “ô horoa noa eita e tia ia parau.” Ia haafaufaa noa tatou i te reira! Mea au mau te tau o te Oroa haamanaˈoraa no te feruri maite i nia i te mau ohipa atoa ta Iehova e Iesu i rave no tatou. E turai to tatou here ia pee maite i te hiˈoraa o Iesu, ia faaite tatou i te here i to tatou mau taeae e tuahine e ia faaore tatou i te hapa a to tatou mau taeae ma te aau atoa.