A TUPU ai te Tamaˈi rahi Matamua i 1914, ua taa i te taata e eita te Feia haapii Bibilia e apiti i te tamaˈi. (Isa. 2:2-4; Ioa. 18:36; Eph. 6:12) Eaha ta te mau tavini a te Atua i Beretane i faaruru?

I 1916, ua haamauhia i Beretane te hoê ture o tei faahepo i te mau tane faaipoipo-ore-hia mai te 18raa e tae atu i te 40raa o te matahiti ia haere i te tamaˈi. Area te feia o te ore e na reira no to ratou to ratou manaˈo haava, e faatiamâhia ïa. Ua haamau te faatereraa i te mau tiripuna no te faaoti o vai te faatiamâhia e i nia i teihea faito.

Aita i maoro roa, fatata e 40 Feia haapii Bibilia tei tuuhia i te fare auri e e 8 tei afaihia i te tamaˈi i Farani. Hapono aˈera te mau taeae i Beretane i te hoê rata, oia atoa te hoê papie e 5 500 tarimaraa to nia iho, i te faatere hau nui o Herbert Asquith no te patoi i tera mau ohipa tia ore.

Faaroohia ˈtura e e pupuhihia na taeae e vau tei afaihia i Farani no te mea ua patoi ratou i te oraraa faehau. Tei mua ratou i te feia te pupuhi ia ratou a taui ai ta ratou faautuaraa ei ahuru matahiti ohipa faahepohia. Ta ratou ïa i rave a hoˈi ai i Beretane i roto i te mau fare tapearaa tivira.

A tamau noa ˈi te tamaˈi, ua tihepu atoa te nuu i te mau tane faaipoipo. I Manchester (Beretane), ua haavahia Henry Hudson, te hoê taote e taata haapii Bibilia atoa. I te 3 no Atete 1916, ua faahapa te tiripuna ia ˈna, ua titau ia ˈna ia aufau i te hoê utua e ua tuu ia ˈna i te rima o te mau tia a te nuu. I te hoê â taime, ua faaroohia e te haavahia ra i Édimbourg (Ekosia) James Frederick Scott. Aita teie pionie e 25 matahiti i faahapahia. Ani faahou atura te faatereraa ia haava ia ˈna. Tera râ, vaiiho aˈera te faatereraa i te reira no te haapao i te tahi atu haavaraa i Lonedona. I reira, ua faahapahia te taeae Herbert Kipps, ua titauhia ia aufau o ˈna i te hoê utua e ua tuuhia o ˈna i te rima o te mau tia a te nuu.

I Tetepa 1916, e 264 taeae tei ani ia faatiamâhia ratou i te tau faehau. E 5 o ratou tei faatiamâhia, 154 tei horoahia te hoê ohipa no te tauturu i te huiraatira, e 23 tei tuuhia i te mau tuhaa a te nuu aita i taaihia i te aroraa e e 82 tei tuuhia i te rima a te mau tia a te nuu. Ua haavahia e ua tapeahia vetahi no te oreraa e auraro i te mau faaueraa. Mea rahi te taata tei patoi i te mau hamani-ino-raa ta teie mau tane i faaruru i te fare tapearaa a te nuu. Ua afai atura te faatereraa ia ratou i te mau aua raveraa ohipa tivira.

 Ua ohipa Edgar Clay e Pryce Hughes, tei tavini i muri aˈe ei tiaau amaa i Beretane, i nia i te hoê patu haapahuraa pape i te fenua no Galles. Area o Herbert Senior, hoê o na taeae e vau tei faahoˈihia mai Farani mai, ua afaihia ïa i te fare auri no Wakefield i Yorkshire. Ua amo vetahi ê i ta ratou faautuaraa ma te rave i te ohipa faahepohia i te fare auri fifi roa no Dartmoor. O ratou te pǔpǔ rahi roa ˈˈe e te otahi o te feia tei ore i rave i te tau faehau no to ratou tiaturiraa faaroo.

I farii na Frank Platt ia rave i te ohipa tei ore i taaihia i te aroraa. Ua hamani-ino-noa-hia o ˈna ma te uˈana a afaihia ˈi o ˈna i te tamaˈi. Ua haapii Atkinson Padgett i te parau mau i muri iti noa ˈˈe i te ôraa i roto i te nuu. Ua hamani-ino-atoa-hia o ˈna e te mau tia a te nuu no te oreraa e apiti i te aroraa.

Ua fatata 100 matahiti noa paha to to tatou mau taeae taa-maitai-roa-raa i to tatou tiaraa amui ore ei Kerisetiano. Noa ˈtu râ, ua imi ratou i te faaoaoa i te Atua ra o Iehova. E hiˈoraa maitai mau te feia tei faahitihia ma to ratou iˈoa i roto i teie tumu parau o te tiaraa amui ore i te hoê “hora ati” mau. (Apo. 3:10)—Haamanaˈoraa no tahito ra no Beretane mai.