Te patu ra anei oe i nia i te one aore ra i nia i te pǎpǎ?

MEA au anei na oe e taio i te Bibilia? Ua faaherehere atoa anei oe i te tahi taime no te haapii tamau i te Bibilia e te hoê Ite no Iehova? Mai te peu e e, te manaˈo ra paha oe e ua tauturu te ite i noaa ia oe ia taa maitai aˈe no te aha teie nei ao i roohia ˈi i te mau fifi. (Apokalupo 12:9, 12) Hau atu â, e rave rahi roa irava bibilia tei horoa ˈtu i te tamahanahanaraa i te mau taime fifi e te tiaturiraa o te tau no a muri aˈe.—Salamo 145:14; 147:3; Petero 2, 3:13.

E taahiraa faufaa roa te noaaraa te ite mau o te Bibilia no te feia e hinaaro ra e riro ei pǐpǐ na te Mesia. Teie râ, tera anaˈe anei te taahiraa? Eita. No te vai noa ei Kerisetiano mau—te taata iho â râ i tamatahia te faaroo—e titauhia ia rave te hoê piahi Bibilia i te tahi atu taahiraa faufaa roa. Eaha ïa? No te pahono atu, e hiˈo poto anaˈe na i te Aˈoraa i nia i te mouˈa, te hoê oreroraa parau horoahia e Iesu i nia i te hoê mouˈa i Galilea.—Mataio 5:1, 2.

Na fare e piti i tamatahia

Ua ite anei oe i te mau tumu parau o te Aˈoraa i nia i te mouˈa? E nehenehe oe e ite i tera oreroraa parau tuiroo i roto i na Evanelia a Mataio e a Luka. (Mataio 5:1–7:29; Luka 6:20-49) E 20 noa minuti te titauhia no te taio i te aˈoraa taatoa. Tera râ, ua hau atu i te 20 faahitiraa no roto mai i te mau Papai Hebera e ua hau atu i te 50 faaauraa parau. E mea taa ê râ te hoê faaauraa parau—te paturaa o na fare e piti—no te mea ua faaohipa Iesu i te reira no te faaoti i ta ˈna oreroraa parau. Ia taa ia oe te auraa o tera parabole, e tauturuhia ïa oe ia ite e nafea ia mau papu noa ei pǐpǐ na te Mesia i roto i te mau huru tamataraa atoa i te faaroo ta oe paha e farerei.

Ua parau Iesu e: “O te faaroo mai i ta ˈu nei mau parau, e haapao atura, e faito vau ia ˈna i te hoê taata paari, o tei faatia i to ˈna fare i nia i te pǎpǎ; e mairi ihora te ûa, e tahe ihora te pape pue, e te mataˈi hoi i te uihiraa mai i nia iho i taua fare ra e aore roa i parari, no te mea e pǎpǎ te tiaraa. Area tei faaroo noa mai i ta ˈu nei mau parau, e aore i haapao, e faitohia ïa i te maamaa, o tei faatia noa i to ˈna fare i nia i te one; e mairi ihora te ûa, e tahe ihora te pape pue, e te mataˈi hoi i te uihiraa i nia iho i taua fare ra, mairi ihora e e parari rahi to taua fare ra.”—Mataio 7:24-27.

Te taata ‘e ô i raro roa’

Eaha te parau mau faufaa ta Iesu i haapii i ta ˈna mau pǐpǐ na roto i te parabole o na taata patu e piti? No te ite atu, e hiˈopoa maite anaˈe i ta Iesu mau parau. Eaha ta oe e tapao ra no nia i na fare e piti? Ua faaruru na fare e piti atoa i te hoê â ati. Hoê â paha hohoˈa to na fare. Tei te hoê â vahi atoa paha—mea tapiri paha. Tera râ, ua patuhia hoê i nia i te one, te tahi i nia i te pǎpǎ. E nafea te reira e nehenehe ai? Mai tei faaitehia i roto i te Evanelia a Luka, ua “ô” te taata paari “i raro roa” a raea ˈtu ai te pǎpǎ. (Luka 6:48) Ei faahopearaa, aita te fare o te taata paari i aueue aˈe.

Eaha ta Iesu i hinaaro e haamahitihiti? Ua  faahiti Iesu i te parabole no te haamahitihiti, eiaha i te hohoˈa aore ra te vahi tiaraa o na fare, eiaha atoa i te puai o te mataˈi e o te pape, i te ohipa râ a te feia patu. Ua ô te hoê i raro roa, area te tahi atu aita ïa. E nafea oe e nehenehe ai e riro mai te taata paari e e ô i raro roa? Ua haapoto Iesu iho i te manaˈo faufaa o te parabole ma te na ô e: “Eaha outou i parau mai ai ia ˈu nei, E te Fatu, e te Fatu, e aore outou i haapao i ta ˈu parau? O te haere mai ia ˈu nei faaroo ai i ta ˈu parau, e haapao maite ihora, e faaite atu vau ia outou i to ˈna faaau: e au oia i te taata i . . . ô atura i raro roa, haamau ihora i te niu i nia i te pǎpǎ.”—Luka 6:46-48.

Oia mau, e au te haapao faaroo noa i te mau haapiiraa bibilia aore ra te haapao taio noa i te Bibilia i te fare, i te faatiaraa i te fare i nia i te one—aita e ôraa. Teie râ no te rave, aore ra faaohipa, i te mau haapiiraa a te Mesia, e tautooraa ïa. E titauhia ia ô i raro roa ia raea te pǎpǎ paari.

No reira, e mau papu oe ei pǐpǐ na te Mesia mai te peu noa e e faaohipa oe i ta oe e faaroo ra. Ia faaohipa oe i roto i to oe oraraa i ta oe i ite na roto i te haapiiraa bibilia, e au ïa oe i te taata paari o tei ô i raro roa. No reira, e mea tia ia rave te piahi Bibilia taitahi i te taime no te hiˈopoa e no te uiui ia ˈna iho: ‘E taata faaroo noa anei au, aore ra e taata rave? Mea haapao taio e haapii noa anei ta ˈu i te Bibilia, aore ra te pee ra anei au i te mau faaueraa bibilia ia rave au i te mau faaotiraa?’

Ta tatou e fanaˈo ia ô tatou i raro roa

A rave na i te hiˈoraa o José. Ua haapii to ˈna na metua ia ˈna ia faatura i te mau ture aveia o te Bibilia, aita râ oia i haapii noa ˈˈe i te Parau a te Atua no ˈna iho. “I to ˈu faarueraa i te fare,” ta José ïa e parau ra, “ua tamata vau i te rave i te maitai, e amuimuiraa iino râ ta ˈu. Ua haamata aˈera vau i te rave i te raau taero, e te mau peu taatiraa morare ore, e i te taputô tamau.”

Ua opua ˈtura José e taui i to ˈna huru oraraa e ua anaanatae maite i te haapiiraa bibilia. “Te mea i turai mau ia ˈu ia taui,” ta José ïa e parau ra, “o te taioraa e te taaraa ïa i ta Iesu Aˈoraa i nia i te mouˈa. Ua titauhia râ te taime no te taui i to ˈu huru taata e huru oraraa. I te omuaraa, ua mǎtaˈu vau i ta to ˈu mau ‘hoa’ e manaˈo no ˈu, ua haavî râ vau i tera mǎtaˈu. Ua faaea vau i te haavare e i te parau ino e ua haamata i te haere i te mau putuputuraa a te mau Ite no Iehova. Ua haapii au e e hopoi mai iho â te oraraa i te hoê oraraa maitai e te faaohiparaa i te mau aˈoraa bibilia i te oaoa mure ore, mai ta Iesu i fafau.”—Mataio 5:3-12.

Eaha te mau faahopearaa ia ô oe i raro roa no te patu i nia i te pǎpǎ—oia hoi ia faaohipa tuutuu ore oe i ta oe e taio ra i roto i te Parau a  te Atua? Ua na ô Iesu: “E pape-pue-hia ihora, e te uˈana i te paururaa mai i taua fare ra, aore râ te fare i aueue i te reira; ua haamauhia hoi i nia i te pǎpǎ.” (Luka 6:48) Mea papu, ia patu maitai oe ma te faaohipa i ta oe e haapii ra, eita te mau tamataraa e au i te mataˈi rahi e manuïa i te tuparari i to oe fare, to oe hoi faaroo, e eita atoa e faaaueue i te reira. Auê ïa manaˈo tamahanahana e!

Ua faahiti râ te pǐpǐ Iakobo, te hoê taeae o Iesu, i te tahi atu haamaitairaa no te mau piahi Bibilia e ere i te feia faaroo noa e feia rave mau râ i te Parau papaihia a te Atua. Ua papai Iakobo: ‘Ei feia rave hoi outou i te parau nei, eiaha ei feia faaroo noa. O te hiˈo i roto i te ture tia roa o te tiamâ ra, ma te tamau maite, no te mea e ere oia i te taata e moina noa te parau ia faaroo ra, e taata rave râ oia i taua ohipa ra, e haamaitaihia ïa oia i ta ˈna ra raveraa.’—Iakobo 1:22-25.

Mea papu maitai, e mea oaoa iho â te feia e faaohipa ra i te mau aˈoraa o te Bibilia. E e horoa tera oaoa i te puai i te mau pǐpǐ a te Mesia no te mau papu i mua i te mau ati e au i te mataˈi rahi o te tamata i to ratou faaroo e te haavare ore o to ratou paieti i te Atua.

E nafea ïa oe?

Ia Iesu i vauvau i ta ˈna Aˈoraa i nia i te mouˈa, ua haamahitihiti oia e mea pinepine e ere te taviniraa i te Atua ra o Iehova i te raveraa i teie e tera ohipa, i teie râ aore ra tera ohipa. Ei hiˈoraa, ua haapii Iesu e e mata maitai aore ra e mata ino to te hoê taata, e tavini oia i te Atua aore ra i te taoˈa, e haere oia na nia i te purumu ǒaǒa aore ra aano. (Mataio 6:22-24; 7:13, 14) No reira, i roto i ta ˈna faahohoˈaraa hopea o na taata patu e piti, ua horoa Iesu i te tahi atu â maitiraa i ta ˈna mau pǐpǐ: Ia ohipa ei taata paari aore ra ei taata maamaa.

Ia tamau oe i te faaohipa ma to aau atoa i ta oe e haapii nei i roto i te Bibilia, te ohipa ra ïa oe ma te paari. Oia, ia ô oe i raro roa no te patu i nia i te pǎpǎ, e fanaˈo ïa oe i te mau haamaitairaa i teie nei e a muri aˈe.—Maseli 10:25.

[Hohoˈa i te api 29]

Ma te faaohipa noa i ta tatou e haapii ra e mau papu ai tatou