Faatereraa no vetahi, haamaitairaa no e rave rahi

MAI te tau o te mau aposetolo mai â to te Atua maitiraa i rotopu i te huitaata i te tahi mau Kerisetiano haapao maitai, ma te faatavai ia ratou ei tamaiti. No te mea e e tauiraa taatoa ta teie mau tamaiti tavai e ite, no reira te Parau a te Atua e faataa ˈi i te reira mai te hoê fanau-faahou-raa. Te tumu o te fanau-faahou-raa, o te faaineineraa ïa i tera mau tavini a te Atua no te riro ei arii i nia i te raˈi. (Timoteo 2, 2:12) No te riro ei arii, ua faatiahia mai ratou mai te pohe mai no te ora i nia i te raˈi. (Roma 6:3-5) I nia i te raˈi, ‘e riro ia ratou te hau i teie nei ao,’ e te Mesia.—Apokalupo 5:10; 11:15.

Te faaite atoa ra râ te Parau a te Atua e e ere o te feia noa tei fanau-faahou-hia te fanaˈo i te faaoraraa mure ore. Te faahiti ra te Bibilia (te mau Papai Hebera e te mau Papai Heleni  Kerisetiano atoa) i te opuaraa a te Atua e faaora e piti pǔpǔ taata—te hoê pǔpǔ iti o te feia faatere e ora i nia i te raˈi e te hoê pǔpǔ rahi o te feia faaterehia e ora i nia i te fenua. A tapao na, ei hiˈoraa, i ta te aposetolo Ioane i papai i te tahi atu mau Kerisetiano tei fanau-faahou-hia na. Teie ta ˈna i parau no Iesu: “Oia hoi te taraehara i ta tatou nei hara; e ere hoi i ta tatou anaˈe ra [te pǔpǔ iti], i ta to te ao atoa nei râ [te pǔpǔ rahi].”—Ioane 1, 2:2.

Oia atoa, ua papai te aposetolo Paulo: “Te hinaaro rahi o te mau mea hamanihia nei [te pǔpǔ rahi] ma te faaoao, te tiai nei ïa i te faaiteraahia mai o te tamarii a te Atua [te pǔpǔ iti].” (Roma 8:19-21) E nafea ia taa i teie mau parau a na aposetolo Ioane e Paulo? Teie ïa: E riro te feia tei fanau-faahou-hia ei melo o te hoê faatereraa i nia i te raˈi. No teihea ohipa? No te hopoi mai i te mau haamaitairaa mure ore na te mau mirioni taata, o te ora i nia i te fenua i raro aˈe i te faatereraa a te Atua. No reira Iesu i haapii ai i ta ˈna mau pǐpǐ ia pure: “Ia tae to oe ra hau. Ia haapaohia to oe hinaaro i te fenua nei, mai tei te [raˈi] atoa na.”—Mataio 6:10; MN.

Te faahiti atoa ra te mau Papai Hebera e e piti pǔpǔ te faaorahia. A tapao na ei hiˈoraa i ta Iehova i parau ia Aberahama te tupuna o Iesu: “E maitai te mau fenua atoa o te ao nei” te pǔpǔ rahi “i to oe na huaai,” te pǔpǔ iti. (Genese 22:18) E fanaˈo iho â te mau fenua atoa i te mau haamaitairaa na roto i te “huaai” aore ra huero o Aberahama.

O vai tera huero? O Iesu Mesia, apitihia e te feia tei fanau-faahou-hia, te mau tamaiti tavai a te Atua. Te faataa ra te aposetolo Paulo: “No te Mesia outou na, e huaai ïa outou no Aberahama.” (Galatia 3:16, 29) E eaha te mau haamaitairaa e fanaˈo te feia o te mau fenua atoa na roto i te huero? Te haamaitairaa ïa e fanaˈo i te farii maitai a te Atua e i te ora mure ore i nia i te hoê fenua paradaiso. Ua tohu te papai salamo ra o Davida: “E parahi te feia parau-tia i nia i te fenua, e parahi tamau â ratou i reira.”—Salamo 37:29; Isaia 45:18; Apokalupo 21:1-5.

Oia mau, ua faataahia te faatereraa i nia i te raˈi no vetahi, area te mau haamaitairaa a taua faatereraa ra—te ora mure ore i nia i te fenua e te mau haamaitairaa atoa ta te reira e hopoi mai—no te taata e rave rahi ïa. Ia fanaˈo atoa ïa oe e to oe utuafare i te mau haamaitairaa mure ore ta te Basileia o te Atua e hopoi mai.

[Hohoˈa i te api 12]

E mirioni te haamaitaihia i te ora mure ore i nia i te fenua. O oe atoa anei?