Te fanau-faahou-raa—eaha te tumu?

MEA rahi te tiaturi nei e e mea tia ia fanau-faahou-hia te hoê taata no te fanaˈo i te faaoraraa mure ore. A tapao na râ i ta Iesu i parau no nia i te tumu o te fanau-faahou-raa. Ua na ô oia: ‘Ia ore te taata ia fanau-faahou-hia ra, e ore [e tia ia ˈna ia]  ite i te basileia o te Atua ra.’ (Ioane 3:3; MN) No reira, e mea tia ia fanau-faahou-hia te hoê taata no te ô i te Basileia o te Atua, eiaha no te fanaˈo i te faaoraraa. E na ô paha vetahi, ‘E ere anei râ hoê â mea teie na parau e piti, e ô i te Basileia e e fanaˈo i te faaoraraa?’ E ere. No te taa i te taa-ê-raa, e hiˈopoa na mua tatou i te auraa o te parau “basileia o te Atua.”

Te hoê basileia, o te hoê ïa huru faatereraa. No reira, te auraa o te parau “basileia o te Atua,” e “faatereraa a te Atua” ïa. Te haapii ra te Bibilia e o Iesu Mesia, “te Tamaiti a te taata,” te Arii o te Basileia o te Atua e e arii apiti to ˈna. (Daniela 7:1, 13, 14; Mataio 26:63, 64) E teie mau arii apiti o te Mesia, ia au i te hoê orama itehia e te aposetolo Ioane, e feia maitihia ïa “no roto i te mau opu atoa, e te mau reo atoa, e te mau nunaa atoa e te mau fenua atoa” e ‘e riro ia ratou te hau i teie nei ao.’ (Apokalupo 5:9, 10; 20:6) Te faaite atoa ra te Parau a te Atua e e “nǎnǎ iti” 144 000 taata faatere ratou “i tauihia no roto i teie nei ao.”—Luka 12:32; Apokalupo 14:1, 3.

Teihea te pu o te Basileia o te Atua? “Te basileia o te Atua,” e parau-atoa-hia ïa “te basileia o te [raˈi],” te auraa ïa e e faatere mai Iesu e to ˈna mau arii apiti mai te raˈi mai. (Luka 8:10; Mataio 13:11; MN) No reira, e faatereraa i te raˈi te Basileia o te Atua, o Iesu Mesia e te hoê pǔpǔ arii apiti maitihia i rotopu i te huitaata te mau melo.

Eaha râ te auraa o ta Iesu i parau e ia fanau-faahou-hia te hoê taata e tia ˈi no te “ô i te basileia o te Atua”? Oia ïa e mea  titauhia ia fanau-faahou-hia oia no te faatere e te Mesia i nia i te raˈi. Te tumu o te fanau-faahou-raa, ei haapotoraa, o te faaineineraa ïa i te hoê pǔpǔ taata iti no te faatere i nia i te raˈi.

Ua ite mai ïa tatou e mea faufaa roa te fanau-faahou-raa, na te Atua e rave i te reira, e te faaineine nei te reira i te hoê pǔpǔ taata no te faatere i nia i te raˈi. E nafea râ te fanau-faahou-raa e tupu mau ai?

[Parau iti faaôhia i te api 7]

Te tumu o te fanau-faahou-raa, o te faaineineraa ïa i te hoê pǔpǔ taata iti no te faatere i nia i te raˈi

[Hohoˈa i te api 7]

O Iesu Mesia e te hoê pǔpǔ arii apiti maitihia i rotopu i te huitaata te mau melo o te Basileia o te Atua