“O TEI ore i here ra, aore ïa i ite i te Atua: e here hoi te Atua,” ta te Bibilia e parau ra. (Ioane 1, 4:8, V.C.J.S.) E mea tia ïa ia paturu te haapaoraa maitai i te here taeae.

Te rave nei e rave rahi haapaoraa i te hoê ohipa faahiahia ma te aupuru i te feia maˈi, ruhiruhia, e veve. Te faaitoito nei ratou i to ratou mau melo ia faaohipa i teie aˈoraa a te aposetolo Ioane: “O te taata . . . tei ia ˈna te taoˈa o teie nei ao, e ite atura oia i tana taeae i te atiraa, pipiri atura to ˈna aau ia ˈna, teihea te hinaaro i te Atua i te parahiraa i roto ia ˈna? E au mau tamarii ra, eiaha to tatou te aroha vaha anaˈe e te aroha arero; ei aroha rave râ, ei mea mau.”—Ioane 1, 3:17, 18.

E ia tamaˈi te mau nunaa? Ta te Atua faaueraa ia “here atu i to taata tupu mai ia oe iho na,” no te mau taime hau noa anei, a haapae atu ai i te reira ia faaoti te tahi taata poritita aore ra arii e aro atu i te nunaa tapiri?—Mataio 22:39, V.C.J.S.

Ua parau Iesu: “O te mea teie e ite ai te taata atoa e, e pipi outou naˈu, ia here outou ia outou iho.” (Ioane 13:35, V.C.J.S.) A pahono ai oe i te mau uiraa i muri nei, a ui ia oe iho: ‘Te here ra anei te mau melo o tera haapaoraa i te mau taata atoa e i te  mau taime atoa, eiaha ma te parau noa, ma te ohipa atoa râ?’

TA TE BIBILIA E HAAPII RA: Ua faaue Iesu i ta ˈna mau pǐpǐ: “Te parau atu nei râ vau ia outou: e here atu i to outou mau enemi, e hamani maitai atu i te feia i riri roa mai ia outou.”—Mataio 5:44, V.C.J.S.

I to te mau faehau haereraa mai e haru ia Iesu, ua rave ihora Petero i te hoê ˈoˈe no te paruru ia Iesu. Ua parau râ oia: “A oomo i to ˈoˈe i roto i te vehî; o te rave hoi i te ˈoˈe ra, e pohe ïa i te ˈoˈe.”—Mataio 26:52.

Ua papai te aposetolo Ioane: “O te mea teie e itea ˈi te tamarii a te Atua, e te tamarii a te diabolo: o tei ore i rave i te parau-tia ra, e ere ïa i to te Atua; e ere atoa tei ore i aroha i tana taeae. Teie hoi te parau ta outou i faaroo, mai te matamua mai, ia aroha tatou ia tatou iho. Eiaha mai ia Kaina ra, no taua varua ino ra oia, e taparahi pohe roa ˈtura i to ˈna teina.”—Ioane 1, 3:10-12.

UIRAA: Te faaitoito ra anei tera haapaoraa i to ˈna mau melo ia apiti atu i te tamaˈi?

TA TE BIBILIA E HAAPII RA: I muri aˈe i to ratou iteraa e e nehenehe ta Iesu e faatupu i te mau semeio, ua hinaaro vetahi ia faaô o ˈna i roto i te poritita. Ua aha oia? “E ite aera Iesu e, te opua ra ratou e tii puai mai iana, e hopoi ei faaarii, horo faahou oia i te moua, oia anae ra.”—Ioane 6:15, V.C.J.S.

I to Iesu haruraahia e pari-haavare-raahia ei taata e turai i te nunaa ia patoi i te faatereraa, ua pahono atu oia: “E ere i to teie nei ao to ˈu basileia; ahiri no teie nei ao to ˈu basileia, ua faaitoito ïa tau mau tavini ia ore au ia tuuhia ˈtu i te rima o te ati Iuda; e ere râ to ˈu basileia i to ǒ nei.”—Ioane 18:36.

Ia ˈna i pure i te Atua no ta ˈna mau pǐpǐ, ua na ô Iesu: “Ua tuu atu vau i ta oe parau ia ratou, e te riri nei to te ao nei ia ratou, no te mea e ere ratou i to teie nei ao, mai ia ˈu nei hoi e ere i to teie nei ao ra.”—Ioane 17:14.

UIRAA: Te pee ra anei tera haapaoraa i to Iesu hiˈoraa ma te ore e faaô i roto i te poritita, noa ˈtu e e riri mai te tahi mau tia?

TA TE BIBILIA E HAAPII RA: I to te mau taata peritome-ore-hia matamua e ere i te ati Iuda riroraa mai ei Kerisetiano, ua tapao te aposetolo Petero: “E ore te Atua e haapao mai i te huru o te taata nei; I te mau fenuaˈtoa ra, o tei mataû iana, e o tei rave i te haapaoraa tia mau, e ite maitai hia mai ïa e ana.”—Ohipa 10:34, 35, V.C.J.S.

 I to ˈna papairaa i te mau Kerisetiano o te senekele matamua, ua parau Iakobo: “E au mau taeae ra, eiaha outou e mau i te parau a to tatou Fatu ra a Iesu Mesia, te Fatu o te hanahana ra, ma te haapao i te huru o te taata. Ia haere mai hoi te hoê taata i roto i to outou sunago, ma te tapea auro i te rima e te ahu unauna ra; a tomo atoa mai ai te hoê taata taoˈa ore ma te ahu ino ra: ite atura outou i tei ahu i te ahu unauna ra, e ua parau atura ia ˈna e, E parahi oe i ǒ nei i te vahi maitai; a parau atu ai i te taata taoˈa ore ra, Tia noa ˈtu oe i ǒ atu, e aore ïa, E parahi i ǒ nei i tau tiroaroaraa avae nei; e ere anei ua faahuru ê outou, e ua riro ei feruri manaˈo ino ra?”—Iakobo 2:1-4.

UIRAA: Te haapii ra anei tera haapaoraa e mea aifaito te taata atoa i te aro o te Atua e eiaha to ˈna mau melo ia hiˈo ino atu ia vetahi ê no to ratou iri e tiaraa totiare?