“Fatata te hopea!” A faaroo ai i teie mau parau, eaha te fa mai i roto i to oe feruriraa? E mahana anei tera e haere ai te feia maitai i nia i te raˈi e te feia ino i roto i te po auahi? Aore ra e mou te fenua i te tahi ofai rahi no roto mai i te reva teitei? E nehenehe vetahi e haapeapea no teie mau tupuraa, area te tahi atu, eita e tiaturi aore ra e faaooo mai paha.

Te na ôhia ra i roto i te Bibilia: “O te hopea ihora ïa i reira.” (Mataio 24:14) E parau-atoa-hia te “mahana rahi o te Atua” e “Aramagedo.” (Apokalupo 16:14, 16) Mea rahi te mau faataaraa maere e te peapea a te mau haapaoraa. Area i roto i te Bibilia, e taa-maitai-hia eaha te reira. Maoti te Parau a te Atua e ite ai tatou ua fatata mai anei te hopea. Hau atu â, te faaite atoa mai ra nafea tatou ia ora ˈtu. Na mua râ, e hiˈopoa anaˈe vetahi manaˈo hape no nia i te hopea e te auraa o te reira. Eaha te faataaraa a te Bibilia?

1. E HAAMOUHIA TE FENUA E TE AUAHI.

   Te na ô ra râ te Bibilia: “Na [te Atua] i haamau i te tumu o te fenua, ia ore roa ia aueue.” (Salamo 104:5) Te faaite ra teie irava e te tahi atu eita te Atua e haamou i te fenua e eita roa ˈtu e faatia ia na reirahia!—Koheleta 1:4; Isaia 45:18.

2. E TUPU I TE TAIME MANAˈO-ORE-HIA.

   Te faaite ra râ te Bibilia ua faaau te Atua afea te hopea e tae mai ai. Te taio nei tatou: “Area te reira mahana e te reira hora, e ore roa te hoê e ite; e ore hoi te mau melahi o te raˈi, e ore atoa te Tamaiti, maori râ o te Metua anaˈe ra. E haapao maitai, e faaitoito, e e pure, aita hoi outou i ite i taua tau ra.” (Mareko 13:32, 33) Ua faaau ïa te Atua, “te Metua,” hoê mahana taa maitai no te hopea.

3. NA TE TAATA E FAATUPU AORE RA NA TE HOÊ OFAI RAHI NO ROTO MAI I TE REVA TEITEI.

   Na te aha aore ra na vai e faatupu te hopea? Te na ô ra te Apokalupo 19:11: “Ite atura hoi au i te raˈi i te vetearaahia, e inaha, e puaahorofenua teatea, e o tei parahi i nia ihora, ua parauhia oia, e Haapao mau ta ˈna e Te Parau mau.” Te na ô atoa ra te irava 19: “Ua hiˈo atura vau i taua puaa ra, e te mau arii o te ao nei, e ta ratou mau nuu ua putuputu, e aro ia ˈna i te parahi i nia i te puaahorofenua ra e tana ra nuu.” (Apokalupo 19:11-21) Noa ˈtu e faahohoˈaraa tera, te taa ra ia tatou e tono te Atua i ta ˈna nuu melahi no te haamou i to ˈna mau enemi.

1. TE HOPEA O TE MAU FAATERERAA A TE TAATA.

   Te faataa ra te Bibilia: ‘E faatupu te Atua o te raˈi ra i te hoê basileia [faatereraa], o te ore roa ïa e  mou, e ore roa hoi e riro ia vetahi ê; e hope roa hoi taua mau basileia ra i te parari e e pau, e vai tera e a muri noa ˈtu.’ (Daniela 2:44) Mai tei faahitihia i te manaˈo 3, e haamouhia “te mau arii o te ao nei, e ta ratou mau nuu,” o te “putuputu, e aro ia ˈna i te parahi i nia i te puaahorofenua ra e tana ra nuu.”—Apokalupo 19:19.

2. TE HOPEA O TE TAMAˈI, TE INO E TE PARAU-TIA ORE.

   “Ua faaore [te Atua] i te tamaˈi e tae roa aˈenei i te hopea fenua!” (Salamo 46:9) “Na te feia piˈo ore hoi e parahi i te fenua, e te feia parau-tia te haapapuhia i reira; e tâpû-ê-hia ra te paieti ore i te fenua nei, e te feia i rave i te hara ra, e taihitumuhia ïa.” (Maseli 2:21, 22) “Inaha, te faaapî nei au i te mau mea atoa nei.”—Apokalupo 21:4,5.

3. TE HOPEA O TE MAU HAAPAORAA I ORE I HAAPAO I TE ATUA E TE TAATA.

   “Ua tohu haavare te feia peropheta; e ua faaau atoa mai te feia tahuˈa ia ratou . . . e nahea râ outou ia tae i te hopea ra?” (Ieremia 5:31) “E rave rahi te parau mai ia ˈu ia tae i taua mahana ra, E te Fatu, e te Fatu, e ere anei ua haapii matou ma to oe iˈoa, e ua tatai i te mau demoni i to oe iˈoa, e ua rave i te semeio e rave rahi i to oe iˈoa? O ta ˈu ïa e parau atu, Aita roâ vau i ite ia outou. E haere ê atu outou, e te feia rave parau ino.”—Mataio 7:21-23.

4. TE HOPEA O TE FEIA E TURU NOA I TEIE NEI AO.

   Ua parau Iesu: “Teie taua faahapa ra, o te maramarama ua tae mai i te ao nei, e hinaaro aˈenei te taata i te pouri, aore te maramarama, no te mea te ino ra ta ratou parau.” (Ioane 3:19) Te faaite ra te Bibilia ua haamouhia te ao na mua ˈˈe i te tau o te taata taiva ore ra Noa. “Pohe ai te reira fenua i te ninaraahia e te miti: area te raˈi e te fenua e vai nei, te tapeahia nei ïa e taua parau ra no te auahi ia tae i te mahana haavaraa, i te poheraa o te feia paieti ore ra.”—Petero 2, 3:5-7.

A tapao na ua faaauhia “te mahana haavaraa” e fatata maira i te haamouraa o “te ao” i te tau o Noa. O vai tei haamouhia? Te “feia paieti ore,” to te Atua mau enemi, area to tatou fenua, ua vai noa mai ïa. I te “mahana haavaraa” a te Atua e piri maira, e haamouhia te feia i maiti i te patoi i te Atua. Area to ˈNa mau hoa, e faaorahia mai ia Noa e to ˈna utuafare.—Mataio 24:37-42.

A feruri na i te oraraa i nia i te fenua nei ia faaore te Atua i te mau mea atoa e faatupu ra i te ino! E parau apî oaoa ïa te poroi a te Bibilia no nia i te hopea. E ui râ paha oe: ‘Te faaite ra anei te Bibilia afea te hopea e tae mai ai? Ua fatata maira anei? E nafea vau ia ora ˈtu?’