ИНДОНЕЗИЯДА Санги́хе деп бичии ортулукка каш чыл бурунгаар барган болзуңарза, далай эриинге үш угбавыска таваржыр ийик силер. Библияны эки билип алырынга дузалап турар боорга, ортулуктуң чурттакчылары оларны дыка эки билир. Бо удаада угбаларывыс көңгүс өске ажыл кылып турган.

Баштай далайдан чамдыы футбол мячиги хире улуг даштарны уштуп алгаш, угбаларывыс ыяш сандайларга олуруп алгаш, маска-биле дагаа чуургазы ышкаш бичеледир соктаар. Үүрмектеп алган дажын пластик кочалдарга бажыңынче өрү чадалап үндүргеш, улуг шоодайларга урар. Оон шоодайларны машинаның кузовунче чүдүргеш, орук тудуунга чедирип турган.

Ол угбаларывыстың бирээзи Ху́льда, чүгле өг-бүлезиниң хереглелдеринге өйлеп ажылдаар турган. JW Library^® приложение ажыглаарынга херек планшет садып аар дээш, угбавыс немелде сорулга салып алган. Чүге дизе Хульда ол приложениеде видео болгаш өске материалдар аңаа түңнелдиг суртаалдаарынга, Библияны эки билип алырынга дузалаар деп билир.

Хульда дараазында бир чартык айда эртенниң-не ийи шак немей ажылдап ап турган. Ынчалдыр ол чүък машиназын долдуруптар хире даштарны соктап белеткээш, планшет өртээн чыып алган.

Хульда мынча дээн: «Даштар буза соктаары амыр эвес, ынчангаш бүгү мага-бодум ыстап, шылап турган. А кажан чаа планшедимни холумга тудуп аарымга, шупту аарышкым дыка дүрген уттундура берген! Ооң дузазы-биле суртаалдаары-даа, христиан чыыштарга белеткенири-даа меңээ чиик». Пандемия үезинде шупту чыыштар, суртаал видео дамчыштыр эртип турда, планшет дыка херек болганын угбавыс чугаалаан. Сорулгазын чедип алганы дээш, Хульданың өөрүшкүзүн үлежип тур бис.