ЙОМАРА болгаш ооң ийи оол дуңмазы Марсело биле Ивер Гватемаланың бичии суурунда чурттап турар. Иегованың Херечилери-биле Библияны бир дугаарында Йомара өөренип эгелээн. Оон чоорту дуңмалары база өөренип эгелээн. Ынчалза-даа оларның шуптузу караа көрбес база Брайль шрифтизин номчуп шыдавас турган. Ынчангаш оларны өөредип турган акый материалды болгаш библейжи шүлүктерни оларга номчуп бээр турган.

Чыыштарже баары оларга база берге турган. Чоокку Хурал залынче баарда, орукче 40 минут үнер турган. Ынчалза-даа Йомара болгаш ооң дуңмалары шупту ужуражылгаларже баар кылдыр, чыышта ха-дуңма сагыш човаан. А кажан хуралга даалгалар бээрге, ону доктаадып алырынга оларга акы-угбалар дузалажып турган.

2019 чылдың майда оларның суурунга чыыштарны эрттирип эгелээн. Ол үеде ынаар доктаамал эгелекчи ашак-кадай улус көже берген. Ол өг-бүле Брайль шрифтизин номчуп-бижип билбес-даа болза, Йомара, Марсело болгаш Иверни аңаа өөредирин шиитпирлээн. Ынчангаш олар Брайль шрифтизин база өскелерни аңаа өөредир аргаларны билип алыр дээш, библиотекаже чорупканнар.

Каш ай эрткенде, олар үжелээ Брайль шрифтизин номчуп билир апарган. Ооң ачызында олар Бурган-биле харылзаазын быжыктырып алган a. Йомара, Марсело болгаш Ивер амгы үеде доктаамал эгелекчилер бооп бараалгап чоруур. А Марсело — хуралдың дузалакчызы. Олар Бурганның ажыл-херээн идепкейлиг кылып, өскелерниң хей-аъдын көдүрүп турар.

Йомара, Марсело болгаш Ивер чыыштың деткимчези дээш аажок өөрүп четтирип турар. Йомара мынча дээн: «Иегованың Херечилери биске бир дугаар келгеш-ле, ёзулуг ынакшылды көргүскен». Марсело: «Чыышта кайгамчык эштерлиг бис база ынакшыл бүргээн делегей чергелиг ха-дуңмага хамааржыр бис» — деп немээн. Йомара болгаш ооң дуңмалары Иегованың черни дываажаң кылдыр канчаар кылыптарын көөр дээш, четтикпейн манап турар (Ыд. ыр. 36:10, 11; Иса. 35:5).