1. Эфиоп кадынның ызыгууртан дүжүмеди чүге сугга суктурарын күзей берген?

 «КӨРЕМ, суг бо-дур. Мээң сугга суктуруп аарымга чүү шаптыктап турарыл?» — деп, бо айтырыгны I-ги векте чурттап чораан эфиоп кадынның ызыгууртан дүжүмеди салган. Иисус аазаттынган Мессия деп, христиан суртаалчы Филипп аңаа тайылбырлап берген. Ыдыктыг Бижилгеден  сөстер ол кижиниң чүрээнге дээптерге, ол сугга суктурарын күзей берген! (Ажыл-чорудулга 8:26—36).

2. Сугга суктурарының дугайында чүге шыңгыы боданыры чугула?

² Бир эвес бо номнуң эрткен эгелерин Иегованың Херечилериниң кайы-бирээзи-биле кичээнгейлиг өөренген болзуңза, бодуңга ол-ла айтырыгны салырынга белен апарган боор сен: «Мээң сугга суктуруп аарымга чүү шаптыктап турарыл?» Кичээлдер үезинде Библия Дываажаңга мөңге чуртталганы аазап турар деп, билип алган сен (Ажыдыышкын 21:3, 4). Оон ыңай диргизиишкин болур идегел дугайында база чок апарган кижилерниң байдалының дугайында билип алган сен (Екклесиаст 9:5; Иоанның 5:28, 29). Христиан хуралдарже кээп эгелээш, Иегованың Херечилериниң шажыны алыс шын деп, көрген боор сен (Иоанның 13:35). А эң-не кол чүүл дээрге, Иегова-биле таныжып, ооң-биле чоок харылзааны сайзырадып эгелээн сен.

3. а) Иисус бодунуң өөреникчилеринге чүнү дагзып каан? б) Сугга суктурарын кандыг арга-биле кылыр?

³ Бурганга бараалгаар күзелин канчаар илередирил? Иисус өөреникчилеринге дагзып каан: «Ынчангаш барыңар... бүгү чоннарны сугга суп, оларны Мээң өөреникчилерим кылдыр ээлдириңер» (Матфейниң 28:19). Иисус боду сугга суктургаш, үлегер арттырып каан. Сугга суктуруп турар үезинде олче сугну бызап чаштырбаан база ооң кырынче суг кутпаан, ону долузу-биле сугже киир супкан (Матфейниң 3:16). Ынчангаш сугга суктурарын долузу-биле сугже киир суп тургаш кылыр.

4. Сугга суктурары чүнүң дугайында херечилеп турар?

⁴ Иегова Бурган-биле найыралдажырын күзээн шупту улустарга хамаарышкан чугула негелде — сугга суктурары-дыр. Сугга суктуруп тургаш, Бурганга бараалгаар күзеливисти бүгү улус мурнунга бадыткап турар бис. Ынчангаш сугга суктурганывыс-биле Иегованың күзел-соруун күүседиринге беленивисти херечилеп турар бис (Ырлар 39:8, 9). Ынчалза-даа сугга суктурар негелделерге дүгжүр дизе, чугула базымнар кылыр херек.

5. а) Сугга суктурарынга таарымчалыг болур дизе, кандыг бирги базымны кылыр херек? б) Христиан чыыштарже баары чүге чугула?

⁵ Бирги базымны кылып эгелээн сен. Канчалдыр? Библияны өөренип шинчилээниңниң ачызында, Иегова Бурганның болгаш Иисус Христостуң дугайында билиглерни ап эгелээн сен (Иоанның 17:3). Ынчалза-даа ол чүгле эгези-дир. Христианнар Бурганның «күзел-соруун эң долу [„ылап шын“, ЧД] билип аар» күзелдиг (Колоссчуларга 1:9). Ону чедип алырынга Иегованың Херечилериниң чыыштарынче баары сеңээ дузалаар. Ындыг ужуражылгаларже баары дыка чугула (Еврейлерге 10:24, 25). Чыыштарга үргүлчү турары Бурганның дугайында билиглериңни бедидеринге сеңээ дузалаар.

6. Сугга суктурарынга таарымчалыг болур дизе, кандыг билиглерни билип алыры чугула?

⁶ Сугга суктурар дизе, Библияны долузу-биле шээжилээн херээ чок. Эфиоп кадынның ызыгууртан дүжүмеди кезек билиглерлиг турган-даа болза, Бижилгеден номчаан чүүлдериниң утказын билип алырынга, аңаа дуза херек турган (Ажыл-чорудулга 8:30, 31). Сен база ам-даа дыка хөй чүүлге өөренир апаар сен. Бурган дугайында билиглерни төнчү чок ап болур (Екклесиаст 3:11). Ынчалзажок сугга суктурарының мурнунда Библияның кол өөредиглерин билип алгаш, ону хүлээп алыры чугула (Еврейлерге 5:12). Чижээ, өлген улустуң байдалы кандыг, Бурганның ады кайы-хире чугула база Бурганның Чагыргазы деп чүл.

7. Библияны өөренири сеңээ кандыг салдарлыг болур ужурлуг?

⁷ Ынчалза-даа чүгле билиглерлиг болуру чедишпес. Оон аңгыда, бүзүрелди илередири чугула, чүге дээрге «бүзүрел чок болза, Бурганның сеткилинге кирери» болдунмас (Еврейлерге 11:6). Коринф деп бурунгу хоорайның чурттакчылары Христос дугайында медээни дыңнааш, «бүзүрээш, сугга суктуруп алганнар» деп Библияда чугаалаан (Ажыл-чорудулга 18:8). Библия — Бурганның хей-аът киирген ному деп, бүзүрелди сайзырадырынга сеңээ ону өөренири дузалаар. Оон ыңай Бурганның аазаашкыннары  шын база Христостуң өргүлү, шынап-ла, камгалал эккээр деп, шынзыгар сен (Иисус Навин 23:14; Ажыл-чорудулга 4:12; 2 Тимофейге 3:16, 17).

8. Өскелерге билип алган билиглериңни чугаалаарынче сени чүү оттурар-дыр?

⁸ Чүрээңде бүзүрелиң өскен тудум, билип алган билиглериңни тудары сеңээ берге болур (Иеремия 20:9). Бурганның болгаш ооң күзел-соруунуң дугайында өскелерге чугаалаар дыка улуг күзел сеңээ тыптып кээр (2 Коринфичилерге 4:13).

9, 10. а) Эге дээрезинде библейжи алыс шын-биле кымның-биле үлежип болур сен? б) Иегованың Херечилериниң чорудуп турар суртаал ажылынга киржир күзелдиг болзуңза, чүнү канчаар болза эки?

⁹ Эге дээрезинде Бурганның дугайында библейжи алыс шын-биле төрелдериң, эш-өөрүң, кожаларың болгаш кады ажылдап турар өөрүң-биле эптиг-чымчак үлежип болур сен. Чоорту Иегованың Херечилериниң организастыг суртаал ажылынга киржирин күзей бээр сен. Ол күзелиң дугайында сээң-биле Библияны өөренип турар кижиге чугаала. Бир эвес негелделерге дүгжүп турар болзуңза, ийи христиан удуртукчу ол айтырыгны шиитпирлээр дээш, силер-биле ужуражып болур.

¹⁰ Ындыг ужуражылга Бурганның «кодан хоюн хайгаарап көрүп» турар, хуралдың удуртукчулары-биле эки таныжып алырыңга дузалап болур (Ажыл-чорудулга 20:28; 1 Пётрнуң 5:2, 3). Бир эвес Библияның кол өөредиглерин билип база аңаа бүзүреп турар болзуңза, ол ышкаш Бурганның дүрүмнерин чуртталгаңда сагып, херек кырында Иегованың Херечизи болур күзелдиг болзуңза, ынчан буянныг медээни тарадыр, сугга суктурбаан бараалгакчы бооп болуруңну удуртукчулар сеңээ чугаалаар.

11. Суртаал ажылынга киржир негелделерге дүгжүр дизе, кандыг өскерлиишкиннерни кылыр херек?

¹¹ Ынчалза-даа суртаал ажылынга киржир негелделерге дүгжүр дизе, бодуңнуң чуртталгаңда бир-ле өскерлиишкин  кылыр апаар чадавас сен. Чижээ, аңаа өске улуска эскертинмес арыг эвес чаңчылдар хамааржып турар. Ынчангаш сугга суктурбаан бараалгакчы болур күзелиңни чугаалаар бетинде самыын садар чоруктан, арагалаашкындан болгаш наркотиктиг бүдүмелдер ажыглаарындан, ол ышкаш өске аар бачыттардан адырлып алыры чугула (1 Коринфичилерге 6:9, 10; Галатчыларга 5:19—21).

12. Бачыттарын миннири чүге чугула?

¹² Сугга суктурарының бетинде ийи чугула базымны кылыры база негеттинер. Павел элчин чугаалаан: «Силерниң бачыттарыңар өршээттинзин дээш, бачыттарыңар миннип, Бурганче эглиңер!» (Ажыл-чорудулга 3:19). Бачыттарны миннири — сеткилиниң ханызындан кылган чүүлүнүң дугайында хараадаары-дыр. Ынчалза-даа бачыттарын миннири, чүгле мөзү-шынары куду кижилерге хамаарышпас. Чүге? Чүге дээрге шупту улус бачыт үүлгедип турар, ынчангаш Бурганның өршээлин хереглеп турар (Римчилерге 3:23; 5:12). Библияны өөренириниң мурнунда Бурганның күзел-соруун билбес турган сен. Ынчан ооң негелделеринге долузу-биле дүгжүп болур турган сен бе? Шынап-ла, бачыттарны миннири кижи бүрүзүнге, безин аар бачыт үүлгетпээн кижилерге херек деп көскү-дүр.

13. Бурганче эглири дээрге чүл?

¹³ Бачыттарын миннинген соонда, Бурганче эглири чугула. Кылган чүүл дээш, чүгле хараадаары чедишпес. Биеэги бүдүжүнден ойталааш, моон соңгаар шиитпирлии-биле бодун шын алдынарын кызары чугула. Бачыттарын миннири биле Бурганче эглири — сугга суктуруп аарынга чедирер базымнар-дыр.

14. Сугга суктурарының бетинде кандыг чугула базымны кылыр херек?

¹⁴ Сугга суктурарының бетинде база бир чугула базымны кылыры негеттинер. Иегова Бурганга бердинер херек.

15, 16. Бурганга бердинери деп чүл база ындыг базым кылырынче бисти чүү оттурар ужурлуг-дур?

 ¹⁵ Чүрээниң ханызындан хууда мөргүлге Иеговага бодун бердинери — чүгле чаңгыс аңаа үргүлчү бердинген бооп артарын аазаары-дыр (Хоойлу 6:15). Ындыг болурунга бисти чүү оттурар ужурлуг? Бир аныяк оол кыс уруг-биле таныжарын күзээн дижик. Уруг-биле чоок таныжып тура, ооң эки аажы-чаңын ол эскерип эгелээр, ынчангаш ооң аңаа ынакшылы хүн тудум, өзүп бар-ла чыдар. Удавас ада-иезинден уругну айтырарын шупту улус манап турар. Өг-бүле тудары оолга немелде харыысалга болуру, чугаажок. Ынчалзажок ындыг чугула базым кылырынче ону күштүг ынакшыл оттурар болгай.

¹⁶ Иегованы билген тудум, аңаа ынакшылың өзүп, чүрээңниң ханызындан аңаа бараалгаарын база хажык чокка ооң күзел-соруун күүседирин күзей бээр сен. Бурганның оглун, Иисус Христосту эдерер күзелдиг улус «бодун бүрүнү-биле» өргүүр ужурлуг (Марктың 8:34). Бодун бүрүнү-биле өргүүрү — Бурганга бүгү талаларда дыңнангыр болуру база хууда күзелдерге болгаш сорулгаларга аңаа шаптыктаарын чөпшээревези-дир. Иегованың күзел-соруун күүседири сээң чуртталгаңда сугга суктурарының мурнунда-ла кол чүүл болур ужурлуг (1 Пётрнуң 4:2).

17. Чүге чамдык улус Бурганга бердинеринден дидинмейн турар?

¹⁷ Иеговага бодун бердинеринден чамдык улус дидинмейн турар, чүге дизе ол дыка шыңгыы базым-дыр. Христиан бооп, Бурганга бердинериниң улуг харыысалгазындан олар дидинмейн турар чадавас. Иегованы хомудадырындан болгаш төлептиг эвес апаарындан корткаш, ындыг кижилер Бурганга шуут бердинген херээ чок деп бодап турар.

18. Иеговага бердинер күзел кажан тыптып келир?

¹⁸ Бодуңнуң чүрээңде Иеговага ынакшылды сайзыраткан болзуңза, аңаа бердингеш, бердинген аайың-биле чурттаарын күзей бээр сен (Екклесиаст 5:3). Бурганга бердингеш, Иеговага «төлептиг амыдырап... Ооң сеткили  ханар бүгү чүүлдерни кезээде» кылырынче чүткүүр сен (Колоссчуларга 1:10). Бир эвес Бурганга ынак болзуңза, ооң негелделерин күүседири сеңээ берге эвес болур. «Бурганга ынаавысты Ооң чагыгларын күүсеткенивис-биле көргүзер бис. Ооң чагыгларын күүседири ындыг-ла берге эвес» — деп, Иоанн элчиниң чугаалаан сөстери-биле чөпшээрежир боор сен (1 Иоанның 5:3).

19. Бодунуң чуртталгазын Бурганга бердинеринден чүге кортпас болза эки?

¹⁹ Бурганга бердинер деп бодаар болза, тергиин болуру албан эвес. Иегова сээң шыдаар шааңны эки билип турар, ынчангаш хөйнү сенден негевейн турар (Ырлар 102:14). Ол сеңээ экини күзеп, сени быжыктырарын болгаш деткиирин аазап турар (Исаия 41:10). Бир эвес Бурганга долузу-биле  бүзүрээр болзуңза, ол «сээң орууңну дорттап бээр» деп, идегеп болур сен (Чугаалар 3:5, 6).

20. Чүге Иеговага бердинери өске улуска эскертингир болур ужурлуг?

²⁰ Кырында чугаалаан чүүлдүң дугайында боданып тура, бодуңнуң хууда мөргүлүңге Иеговага бердинерин күзей бээр чадавас сен. Ынчалзажок Бурганга шынап-ла ынак кижи камгалал алыр дээш, бодунуң «бүзүрээнин  ажыы-биле чугаалаар» херек (Римчилерге 10:10). Ону канчаар күүседир?

21, 22. Бүзүрелиңни ажыы-биле канчаар илередип болур сен?

²¹ Сугга суктурар күзелдиг болзуңза, хуралыңның удуртукчуларның башкарыкчызынга ооң дугайында чугаала. Удуртукчулар сээң-биле Библияның кол өөредиглерин катаптаар кылдыр, ол сагыш човаар. Бир эвес сугга суктурарының негелделеринге дүгжүп турар болзуңза, чоокку болур конгресске сугга суктуруп болуруңну удуртукчулар сеңээ чугаалаар. Сугга суктурарынга тураскааткан, ол чугула болуушкуннуң утказының дугайында илеткел болур. Илеткел соонда илеткекчи шупту сугга суктурар дээн кижилерге ийи бөдүүн айтырыг салыр. Ол чүүл бодунуң «бүзүрелин ажыы-биле чугаалаар» арганы оларга бээр.

²² Сугга суктуруп тургаш, Бурганга бердингенивисти улус мурнунга ажыы-биле херечилеп турар бис. Ооң-биле Иегованың Херечилери апарганывысты көргүзүп турар бис. Сугга суктурар кижини, Иеговага бердинериниң демдээ кылдыр, сугже бүгү бодун киир суптар.

23. «Аданың, Оглунуң болгаш Ыдыктыг Сүлдениң ады-биле» сугга суктурары дээрге, чүү дээни ол?

²³ «Аданың, Оглунуң болгаш Ыдыктыг Сүлдениң ады-биле» ооң өөреникчилери сугга суктурар деп, Иисус чугаалаан (Матфейниң 28:19). Ол дээрге сугга суктуруп турар кижи, Иегова Бурганның база Иисус Христостуң эрге-чагыргазын хүлээп турарын көргүзүп турар (Ырлар 82:19, ЧД; Матфейниң 28:18). Ол ышкаш ыдыктыг сүлде, азы Бурганның хөделдирикчи күжү, чүнү кылып турарын ол билип турар ужурлуг (Галатчыларга 5:22, 23; 2 Пётрнуң 1:21).

24, 25. а) Сугга суктурары чүнү илередип турар? б) Кандыг айтырыг кичээнгей негеп турар?

²⁴ Ынчалзажок сугга суктуры — чүгле анаа-ла сугже кирери эвес-тир. Сугга суктурары чугула ханы уткалыг. Сугже долузу-биле кирип турары дээрге, христиан кижи биеэги  амыдырал-чуртталгазынга «өлгенин», азы моон соңгаар биеэгизи дег, амыдырап-чурттавас дээн уткалыг. А сугдан үнүп ора, Бурганның күзел-соруун күүседир дээш, «дирлип» турарын илередип турар. Сен бодуңну кандыг-бир херекке, кижиге азы организацияга эвес, а Иегова Бурганга бердинерин шиитпирлээниңни утпас болзуңза эки. Сээң бердингениң база сугга суктурганың — Бурган-биле чоок хамаарылганың база ёзулуг быжыг найыралдың чүгле эгези-дир (Иаковтуң 4:8).

²⁵ Ынчалзажок сугга суктурганы камгалалдыг болуру дивээни ол. «Боттарыңарның камгалалыңарны коргуп-иргип база Бурганга бүрүн хүндүткел-биле боттандырарын уламчылаңар-ла» — деп, Павел элчин бижээн (Филиппийжилерге 2:12). Сугга суктурары дээрге, христиан оруктуң чүгле эгези-дир. Ындыг болза, Бурганның ынакшылынга бодувусту канчаар кадагалап болур бис? Ооң дугайында сөөлгү эгеден билип алыр сен.