Христиан Грек Бижилгелерде Варнава биле Павел элчинниң дугайында бижээн черлер каш-даа таваржыр. Олар эргий кезиир хайгааракчылар кылдыр бараалгап, бир дугаар христиан чыыштарны кезип турган. Олар ону чүү дээш кылып турганыл? Олар бүзүрели чаңгыс ха-дуңмазының амыр-мендизи дээш, сеткилиниң ханызындан сагыш човап турганнар. Бир катап Павел Варнавага: «Дедир чоруткаш... ха-дуңмавыска барып чедип, оларның канчаар чурттап олурарын көрээлем» — дээн. Ол бүзүрели чаңгыс ха-дуңмазын быжыктырар дээш, чүс-чүс километрни ажып эртеринге белен турган (Ажыл-чорудулга 15:36). Шак-ла ындыг хөөннү кожуун хайгааракчылары амгы үеде база илередип турар.

Олар бисти быжыктырар дээш кээп турар. Кожуун хайгааракчызы хурал бүрүзү-биле бир неделя эрттирип, чылда ийи катап 20 хире хуралды (чаңгыс кожуун) кезип турар. Ол дуржулгалыг акылардан болгаш оларның кадайларындан хөйнү өөренип ап болур бис. Олар, улуг-биче дивейн, хуралда улустуң шуптузу-биле таныжып алырын кызып, бистиң-биле кады күзелдии-биле бажыңнар кезип, суртаалдап, Библияны өөренип турар улуска барып турар. Кожуун хайгааракчылары удуртукчулар-биле кады «кадарчы ажылын» күүседири-биле ха-дуңмага барып, хуралдарга болгаш шуулганнарга хей-аът көдүрер илеткелдер чугаалап, бисти шуптувусту быжыктырып турар (Ажыл-чорудулга 15:35).

Олар хуралда кижи бүрүзүнге сонуургалдыг. Кожуун хайгааракчыларының сорулгазы — ха-дуңманың Бурган-биле харылзаазын быжыктырарында. Олар удуртукчулар болгаш дузалакчылар-биле чыыштың чедиишкиннерин сайгарып, чүнү экижидеринге хамаарыштыр сүме кадар дээш ужуражып турарлар. Олар эгелекчилерниң бараалгалын экижидеринге дузалап, хуралда чаа келген улустар-биле таныжып, оларның чедиишкиннерин сонуургап турар. Ол акылар биске-ле ажыктыг болзун дээш, күжүн болгаш үезин хайыралавайн, бистиң-биле кады ажылдап турар (2 Коринфичилерге 8:23). Оларның бүзүрелин болгаш Бурганга бердингенин эдерип болур бис (Еврейлерге 13:7).

• Кожуун хайгааракчылары хуралдарны кандыг сорулга-биле кезип турарыл?

• Оларның кээп турары силерге канчаар дузалап болурул?