Бистиң организациявыста акша-шалың ап турар шажын башкарыкчылары чок. Ынчалза-даа бирги вектиң христиан чыыжында дег, бисте база «Бурганга бүзүрээннер ниитилелиниң кадарчылары» кылдыр томуйлаттынган дуржулгалыг удуртукчу акыларывыс бар (Ажыл-чорудулга 20:28). Удуртукчулар — библейжи дүрүмнерни эки ажыглап өөренип алган, хурал иштинде удуртулга ап чоруур эр улус-тур. Олар «Бурганның кодан хойларын... албадаткан дег эвес, а эки тура-биле», хуу ажык-кончаа сүрбейн, изиг күзели-биле кадарып чоруурлар (1 Пётр 5:1—3). Бисти менди-чаагай чорзун дээш, олар чүнү кылып турарыл?

Олар чыышты камгалап турар. Удуртукчулар удуртулга берип, хора чедириптер чүүлдерден чыышты камгалап турар. Иегова кайы хире харыысалгалыг даалганы дагзып каанын билип турар болгаш, олар бистиң бүзүреливисти башкарбайн, харын чүгле бистиң өөрүшкүвүс болгаш менди-чаагай чоруувус дээш ажылдап турар (2 Коринфичилерге 1:24). Кодан-хоюн билир, сагыш човангыр кадарчы дег, ол акылар чыыштың кежигүн бүрүзү-биле таныжып алыр дээш кызып турар (Чугаалар 27:23).

Олар бисти Бурганның күзел-соруун күүседирин өөредип турар. Неделя санында удуртукчулар, бистиң бүзүреливисти быжыктырар дээш, чыыштар эрттирип турар (Ажыл-чорудулга 15:32). Оон ыңай ол Бурганга бердинген эр улус суртаал ажылынга удуртулганы ап, бистиң-биле суртаалдың шупту хевирлеринге киржип, суртаалдаарын өөредип турарлар.

Олар биске хууда кичээнгейни салып турар. Удуртукчулар хуралдың кежигүн бүрүзү Бурган-биле чоок харылзаалыг болзун дээш сагыш човап турар. Бисти Ыдыктыг Бижилгениң дузазы-биле быжыктырып, оожургадыр дээш, олар бажыңывыска азы Хурал залынга бистиң-биле ужуражып болур (Иаков 5:14, 15).

Удуртукчулар колдуунда өг-бүлелиг, ынчангаш хуралдың ажыл-херээнден аңгыда, олар ажылдаар база өг-бүле хүлээлгелерин күүседир ужурлуг. Ол кызымак ажылчыннар бистиң ынакшылывыска болгаш хүндүткеливиске төлептиг (1 Фессалоникчилерге 5:12, 13).

• Хуралдың удуртукчулары кандыг ажыл күүседип турарыл?

• Удуртукчулар биске хууда кичээнгейни канчаар салып турарыл?