ЭСКЕРОН ПОННА 48-ТӤ СТАТЬЯ
97-ТӤ КЫРӞАН Улӥськом Инмарлэн Кылыныз
Иисус паймымон амалэн адямиосты нянен сюдӥз
«Мон луисько улонлэн нянез; Мон доры лыктӥсь муртлэн кӧтыз уз сюма» (ИОАНН 6:35).
МИ ТОДОМЫ
Иоаннлэсь 6-тӥ люкетын вераське, кызьы Иисус туж трос адямиосты вить йыды нянен но кык чорыген сюдӥз. Малы милемыз дышетэ та учыр?
1. Кыӵе инты басьтэ вал нянь вашкала дыръя?
ВАШКАЛА дыръя нянь валтӥсь сиён вал (Ул.-выл. 14:18; Лука 4:4). Куддыръя Библиын «нянь» кыл кутӥське «сиён» кыл интые (Матф. 6:11). Озьы ик нянен герӟаськемын Иисуслэн кык паймымон ужъёсыз (Матф. 16:9, 10). Одӥгез сярысь вераське Иоаннлэсь 6-тӥ люкетын. Ойдолэ эскеромы со учырез но учкомы, малы милям дышетскеммы луэ.
2. Кыӵе учырын кӧня ке сюрс адямиослы сиён кулэ луиз?
2 Трос тодытэмзы бере апостолъёс Иисус доры берытскизы. Соослы шутэтскыны кулэ вал. Соин ик Иисус дышетскисьёсыныз ӵош пыже пуксиз но кошкиз Вифсаида котырысь шыпыт интые, кудӥз Галилей зарезьлэн мукет ярдураз интыяськемын вал (Марк 6:7, 30—32; Лука 9:10). Ӝоген кӧня ке сюрс адямиос со сярысь тодӥзы но отчы мынӥзы. Иисус соосты ӧз улля. Со кутскиз соосты Эксэйлык сярысь дышетыны но бурмытъяны. Ӝыт вуэм бере дышетскисьёс малпаны кутскизы, маин сюдыны сомында калыкез. Куд-огезлэн кыӵе ке сиёнэз вал ке но, тросэзлэн ӧй вал, дыр. Соин ик соослы, матысь гуртъёсы мыныса, асьсэлы сиён басьтоно вал (Матф. 14:15; Иоанн 6:4, 5). Мар кароз Иисус?
ИИСУС ПАЙМЫМОН АМАЛЭН ТРОС АДЯМИОСТЫ НЯНЕН СЮДӤЗ
3. Мар карыны косӥз Иисус апостолъёссэ? (Озьы ик учке суредэз.)
3 Иисус дышетскисьёсызлы шуиз: «Соослы мыныны кулэ ӧвӧл; тӥ соослы сиён сётэлэ» (Матф. 14:16). Нош маин 5 000 пала пиосмуртъёсты сюдод? Эшшо кышномуртъёсты но нылпиосты лыдъяно ке, отын 15 000 адями вал, дыр (Матф. 14:21). Апостол Андрей шуиз: «Татын одӥг пияшлэн вить йыды нянез но кык чорыгез вань, но мар со тамында калык понна?» (Иоанн 6:9). Со вакытэ йыды нянь огшоры сиён вал. Нош чорыг куасьтэмын вал, дыр. Зэм но, пияшлэн няненыз но чорыгеныз сомында калыкез сюдыны уг луы вал. Яке луэ вал?
Иисус адямиосты Инмарлэн Эксэйлыкез сярысь дышетӥз но соосты сюдӥз. (Учке 3-тӥ абзацез.)
4. Малы дышетскыны луэ, Иоаннлэсь 6:11—13 лыдӟыса? (Озьы ик учке суредъёсты.)
4 Иисуслэн адямиосты куно каремез потэ вал. Соин ик со куриз адямиосты «витьтон муртэн, сю муртэн» гуждор вылэ пуксьылыны (Марк 6:39, 40; лыдӟе Иоаннлэсь 6:11—13). Собере Иисус нянь понна но чорыг понна Атаезлы тау шуиз. Озьы со возьматӥз, вань сиёнэз милемлы Инмар сётэ шуыса. Иисус сямен, милемлы но — огнамы-а ми, ӧвӧл-а — котькуд сиськеммы азьын Иеговалы вӧсяськоно. Вӧсяськемез бере Иисус дышетскисьёссэ косӥз нянез но чорыгез адямиослы сётъяны. Ваньзы кӧттырымон сиськизы. Сиён туж трос вал — адямиослэн сиськемзы бере но со кылиз. Иисуслэн уг поты вал, сиён арам мед луоз шуыса. Соин ик со косӥз кылемзэ бичаны, сое берлогес сиыны луоз шуыса, вылды. Иисуслэсь адӟем карыса, милемлы но ваньбурмес визьмо уже кутоно. Анай-атайёс, та учырез нылпиосыныды ӵош лыдӟе. Малпаське, малы кулэ сиськон азьын вӧсяськыны, куно карисесь но шырыт сямоесь луыны, озьы ик ваньбурмес визьмо уже кутыны.
Юалэ асьтэлэсь: «Иисус сиськон азяз вӧсяськиз. Нош мон?» (Учке 4-тӥ абзацез.)
5. Мар каремзы потэ вал адямиослэн, Иисуслэсь паймымон ужъёссэ адӟыса, но мар кариз Иисус?
5 Иисуслэсь дышетэмзэ но паймымон ужъёссэ адӟыса, адямиос туж паймемын вал. Соос тодо на вал, кызьы Моисей шуиз, Инмар аслаз калыкез понна бадӟым пророкез ӝутоз шуыса. Соос малпазы, вылды, Иисус — самой со пророк шуыса (К. Зак. 18:15—18). Соос малпамъя, Иисус туж умой кивалтӥсь луысал, кудӥз быдэс калыкез сюдысал. Соин ик адямиос Иисусэз «эксэй карыны» туртто вал (Иоанн 6:14, 15). Иисус лэзьысал ке ассэ эксэе пуктыны, со политикае пыриськысал. Нош мар со кариз? Со «гурезе кошкиз». Адямиослэн зӥбемзы шоры учкытэк, Иисус политикае ӧз пыриськы. Та пумысен со милемлы туж умой адӟем карон возьматӥз!
6. Кызьы ми Иисуслэсь адӟем карыны быгатӥськомы? (Озьы ик учке суредэз.)
6 Милемыз уз куре, вылды, паймымон амалэн адямиосты сюдыны, соосты бурмытыны яке быдэс калыкен кивалтыны. Но адямиос милемыз косыны быгато кин ке понна куарамес сётыны яке кызьы ке мукет сямен солы дурбасьтыны. Нош Иисус политикае ӧз пыриськы но берлогес шуиз: «Мынам Эксэйлыке та дуннелэсь ӧвӧл» (Иоанн 17:14; 18:36). Ми Христослэн дышетскисьёсыз бере, милям со кадь малпаськеммы но асьмеды воземмы потэ. Соин ик ми Инмарлэн Эксэйлыкез пала кариськиськомы, со сярысь тодытӥськомы но вӧсяськиськомы, со мед лыктоз шуыса (Матф. 6:10). Ойдолэ нош ик саклыкмес висъяломы солы, кызьы Иисус паймымон амалэн адямиосты нянен сюдӥз, но учкомы, малы эшшо дышетскеммы луэ на.
Иисус политикае ӧз пыриськы. Милемлы солэсь адӟем кароно. (Учке 6-тӥ абзацез.)
МАЕ ВОЗЬМАТЭ «НЯНЬ ЛЮКЫЛЫКУ ЛУЭМ ПАЙМЫМОН УЖ»
7. Мар кариз Иисус но мае валазы апостолъёс? (Иоанн 6:16—20).
7 Трос адямиосты сюдэмез бере Иисус дышетскисьёссэ косӥз пыже пуксьыны но Капернауме берытскыны. Нош ачиз, сое эксэе пуктыны турттӥсь адямиослэсь пегӟыса, гурезь йылэ тубиз. (Лыдӟе Иоаннлэсь 6:16—20.) Куке апостолъёс зарезь вылын вал, кужмо сильтӧл ӝутскиз. Пыж борды бадӟым тулкымъёс шуккылӥськизы. Ӵапак соку дышетскисьёс адӟизы, кызьы Иисус соос доры ву вылтӥ лыктэ. Иисус Пётрлы но ӵектӥз ву вылтӥ мыныны (Матф. 14:22—31). Иисус пыже пырем бере тӧл пуксиз. Дышетскисьёс шуизы: «Зэм ик, Тон Инмар Пи» (Матф. 14:33) a. Паймоно кадь, дышетскисьёс тае али гинэ валазы шуыса. Нош куке Иисус трос адямиосты сюдӥз, соос сое ӧз валалэ. Та сярысь Марк шуиз: «Асьсэ куспын соос туж паймыса, абдраса улӥзы. Сюлэмъёссы из кадь чурыт вылэмысь, нянь люкылыку луэм паймымон ужез адӟыса но, соос ӧз валатске» (Марк 6:50—52). Дышетскисьёс ӧз валалэ, та кык паймымон ужъёсты лэсьтыны Иисуслы Иегова кужым сётӥз шуыса. Ӝоген Иисус нош ик нянь сярысь вераны кутскиз, соос но, ми но эшшо малы ке мед дышетскомы шуыса.
8, 9. Малы адямиос Иисусэз утчазы? (Иоанн 6:26, 27).
8 Мукет нуналаз адямиос лыктӥзы отчы, кытын Иисус соосты сюдӥз вал. Нош Иисус но апостолъёс отын ӧй вал. Соин ик адямиос пуксизы пыжъёсы, кудъёсыз Тивериадаысь вуизы, но, Иисусэз шедьтон понна, Капернауме кошкизы (Иоанн 6:22—24). Потэ вал-а соослэн Эксэйлык сярысь тросгес тодэмзы? Уг. Нырысь ик соослэн потэ вал, Иисус соослы эшшо нянь мед сётоз шуыса. Малы озьы вераны луоз?
9 Учке, мар луиз, куке адямиос Иисусэз Капернаум котырысь шедьтӥзы. Иисус пырак соослы вераз, соос сое сиён понна утчазы шуыса. Со шуиз: «Монэ... нянь сиемды но кӧтты тыр луэм понна утчаськоды». Адямиос туж тыршизы, «сисьмыса быроно сиёнэз» шедьтон понна. Нош соослы тыршоно вал, «быронтэм улонлэсь сиёнзэ» шедьтон понна. (Лыдӟе Иоаннлэсь 6:26, 27.) Иисус вераз, Атаез соослы сыӵе сиён сётоз шуыса. Куке адямиос кылӥзы сиён сярысь, кудӥз пырак улон сётыны быгатэ, соос туж паймизы, дыр. Кыӵе сиён сярысь татын вераське? Мар кароно, сое басьтон понна?
10. Мар кароно вал адямиослы, пырак улон понна?
10 Адямиос Иисуслэсь юазы, мар кароно, сыӵе сиёнэз басьтон понна. Соос малпазы, вылды, Иисус соослы Моисейлэн законысьтыз куд-ог куронъёс сярысь вералоз шуыса. Но Иисус шуиз: «Тӥ мед оскоды Солы, Кинэ Со ыстӥз — та Инмар уж» (Иоанн 6:28, 29). Азьвыл Иисус вераз вал ини, пырак улон понна, солы оскыны кулэ шуыса (Иоанн 3:16—18). Берлогес со нош ик со сярысь вераз (Иоанн 17:3).
11. Кытысь адӟиське, еврейёс сиён сярысь гинэ малпазы шуыса? (Псалтирь 77:24, 25).
11 Иисус еврейёслы валамон вераз, мар соослэсь возьма Инмар. Но адямиос сое ӧз кылзэ. Соос юазы: «Тыныд мед оскомы шуыса, кыӵе тодмет Тон возьматод?» (Иоанн 6:30). Соос веразы, Моисей улон дыръя Инмар паймымон амалэн котькуд нунал калыклы манна сётылӥз шуыса (Неем. 9:15; Иоанн 6:31; лыдӟе Псалтирез 77:24, 25). Соку но, куке Иисус соослы «Инмысь... зэмос нянь» сярысь вераз, кудӥз пырак улон сётэ, соос Иисуслэсь ӧз юалэ, мар сярысь со вераз (Иоанн 6:32). Соос сиён сярысь гинэ малпаськизы, соин ик ӧз кылзэ, малы соосты дышетӥз Иисус. Малы та милемыз дышетэ?
МАР МИ ПОННА ВАЛТӤСЕЗ ЛУЫНЫ КУЛЭ
12. Мар, Иисуслэн верамезъя, адями понна валтӥсез луыны кулэ?
12 Малы милям дышетскеммы потэ, Иоаннлэсь 6-тӥ люкетэз лыдӟыса? Улонамы нырысетӥ интыын Инмарен юн кусыпъёс луыны кулэ. Кылсярысь, куке Шайтан Иисуслэсь визьзэ сына вал, Иисус солы валэктӥз: кӧтэз тырон сярысь, Иеговалэсь кылзӥськон кулэгес (Матф. 4:3, 4). Гурезь йылын тодытыкуз но, Иисус пусйиз, макем кулэ Иеговаен умой кусыпъёс возьыны (Матф. 5:3, ВД). Соин ик юалэ асьтэлэсь: «Мар мынам улонам нырысетӥ интыын: Иеговаен кусыпъёс яке майбыр улон?»
13. а) Малы номыр уродэз ӧвӧл сиён-юонлы шумпотыны? б) Павеллэн кыӵе алонэзлэсь милемлы кылзӥськоно? (1 Коринфъёслы 10:6, 7, 11).
13 Номыр уродэз ӧвӧл, куке ми вӧсяськиськомы со сярысь, мар милемлы кулэ, но шумпотӥськомы, куке Иегова милемлы сое сётэ (Лука 11:3). Библиын вераське, адями понна «сиёнлэсь, юонлэсь но сюлмысь ужамезлэсь шумпотон» — со туж умой шуыса, малы ке шуоно со «Инмар киулысь потэ» (Екк. 2:24, ВД; 8:15; Иак. 1:17). Но лэзёно ӧвӧл, майбыр улыны тыршон улонамы валтӥсез мед луоз шуыса. Та сярысь вераз апостол Павел одӥгаз гожтэтаз. Со христианъёслы тодазы вайытӥз, мар луиз израиль калыкен луоё кыр дуннеын, Сӥнай гурезь котырын. Павел христианъёслы вераз: «Ваньмыз таос асьмеды алон понна вал... асьмеос но лулмугорлэн лекесь куронъёсызлы сётскыса медам улэ вал шуыса». (Лыдӟе 1 Коринфъёслы 10:6, 7, 11.) Иегова израиль калыклы паймымон амалэн сиён сётӥз. Но кӧттырмостэм сямзы израиль калыкез урод бервылъёсы вуттӥз (Лыд. 11:4—6, 31—34). Зарни ошпиен учыр но возьматӥз, сиён-юон но шулдыръяськон, Инмарлы йыбыртъян сярысь, израиль калыклы кулэгес вал шуыса (Пот. 32:4—6). Павеллэн гожтэтэз туж дырыз дыръя гожтэмын вал, малы ке шуоно ӝоген, асьме вакытысь 70-тӥ арын, Иерусалим но храм куашкатэмын вал. Ми улӥськомы Шайтан дуннелэн быронэз азьын. Соин ик милемлы Павеллэн кылъёсызлэсь кылзӥськоно но, израиль калык сямен, янгышано ӧвӧл.
14. Мар вера Библия выль дуннеын сиён сярысь?
14 Иисус дышетӥз вӧсяськыны, Инмар «туннэ улымон нянь» мед сётоз но солэн эрикез «музъем вылын но инмын кадь ик» мед быдэсмоз шуыса (Матф. 6:9—11). Кызьы тӥ син азяды пуктӥськоды туж умой азьпал улонэз? Библия верамъя, Инмарлэн потэ, музъем вылын умой сиён мед луоз шуыса. Исаиялэн 25:6—8 вераське, адямиослэн трос пӧртэм ческыт сиёнзы луоз шуыса. Нош Псалтирьын 71:16 гожтэмын: «Музъем вылын, гурезьёс йылын удалтэм нянь... луоз». Пуктэ син азяды, кызьы тӥ пызь басьтӥськоды, яратоно няньдэс пыжон понна яке кыӵе ке выль сиён пӧран понна. Озьы ик тӥ асьтэос быгатоды виноград будэтыны но вина лэсьтыны (Ис. 65:21, 22). Сыӵе умой улон луоз тӥляд но, музъем вылысь вань адямиослэн но.
15. Кыӵе дышетон радъямын луоз улӟытэмъёс понна? (Иоанн 6:35).
15 Лыдӟе Иоаннлэсь 6:35. Ойдолэ эшшо огпол тодамы ваёмы адямиосты, кудъёссэ Иисус нянен но чорыген сюдӥз. Со адямиос Иисуслы ӧз оске ке но, соос улӟытэмъёс пӧлын луыны быгато (Иоанн 5:28, 29). Соку соос валалозы, мае возьмато Иисуслэн таӵе кылъёсыз: «Мон луисько улонлэн нянез; Мон доры лыктӥсь муртлэн кӧтыз уз сюма». Соослы осконо луоз Иисуслэн мозмытӥсь курбонэзлы — осконо луоз, Иисус соос понна аслэсьтыз улонзэ сётӥз шуыса. Со дыре улӟытэмъёс понна но нылпиос понна, кудъёсыз выль дуннеын вордӥськозы, вылды, дышетон программа радъямын луоз. Ми соослы юрттомы Иеговаен но солэн эрикеныз тодматскыны. Сыӵе дышетон, самой ческыт сиён сярысь но, тросгес шумпотон ваёз!
16. Мар сярысь вераськоз вуоно статьяын?
16 Та статьяын ми эскеримы, малы дышетскыны луэ, Иоаннлэсь 6-тӥ люкетэз лыдӟыса. Со сяна, отын вераське, мар кароно, пырак улон понна, Иисуслэн верамезъя. Еврейёс, кудъёссэ Иисус дышетӥз, сое сак кылзыны кулэ вал. Милемлы но озьы ик лэсьтоно. Вуоно статьяын ми азьланьтомы Иоаннлэсь 6-тӥ люкетэз эскерыны.
20-ТӤ КЫРӞАН Тон дуно Пидэ сётӥд
a Та паймымон учыр сярысь тросгес тодон понна, учке «Иисус — сюрес, зэмлык но улон» книгаысь 131-тӥ бамез (ӟуч) но «Соослэсь оскемзэс адӟем каре» книгаысь 185—186-тӥ бамъёсты (ӟуч).
