Пуктэ син азяды, кызьы атай сизьым аресъем пиеныз вераське. Со вера: «Туж кемалась Инмар кылдытӥз музъемез но ваньзэ, мар со вылын вань, озьы ик шундыез, толэзез но кизилиосты». Пияш малпаське но юа: «Атай, нош кин кылдытӥз Инмарез?»

Атаез вера: «Инмарез нокин ӧз кылдыты. Со котьку вал». Али пияшлы та валэктон тырмыт. Но будэмъяз солэн нош ик та юанэз кылдэ. Солы секыт валаны, кызьы кинлэн ке кутсконэз уз луы. Быдэс дуннелэн кутсконэз вань ук. «Соку кытысь Инмар кылдӥз?» — пайме пияш.

Кызьы та юанэз валэктэ Библия? Озьыгес ик, кызьы атай сое пиезлы валэктӥз. Моисей гожтӥз: «Кузё-Инмаре! [...] Гурезьёс вордскемлэсь, музъемез но дуннеез кылдытэмедлэсь азьло, даурысь дауре Тон — Инмар» (Псалтирь 89:2, 3). Нош Исаия пророк вераз: «Тон уд тодӥськы шат? Тон ӧд кылы шат, Инмар, пумтэм вапумъёслэн Инмарзы Кузё-Инмарзы, музъемлэсь пумъёссэ кылдытӥсь» (Исаия 40:28). Озьы ик Иудалэн гожтэтаз вераське, Инмар «вапумъёслэн кутсконысенызы» ик вал ини шуыса (Иуда 25).

Библиысь та кылбуръёс возьмато, Инмар — «Пумтэм вапумъёсысь Эксэй» шуыса (1 Тимофейлы 1:17). Та возьматэ, Инмар азьвыл но котьку вал, азьланяз но котьку луоз шуыса (Усьтӥськон 1:8). Озьыен, Ваньмызлэсь Кужмо Инмарлэн кутсконэз но, пумыз но ӧвӧл.

Малы милемлы та малпанэз валаны туж секыт? Милям улонмы туж вакчи но туж ӝог ортче бере, Инмарен ӵошатыса, дыр шоры ми чылкак мукет сямен учкиськомы. Инмар котьку вал но котьку луоз, соин ик солы сюрс ар одӥг нунал кадь гинэ потэ (2 Пётр 3:8). Кылсярысь, быгатэ-а ӟоз, кудӥз витьтон нунал гинэ улэ, валаны, кызьы ми сизьымдон яке тямыстон ар ӵоже улӥськомы? Уг, дыр. Библия валэктэмъя, Быдӟым Кылдытӥсен ӵошатыса, ми ӟозъёс выллем. Инмарлэсь малпаськон амалзэ милям малпаськон амалэнымы ӵошатыны ик уг луы (Исаия 40:22; 55:8, 9). Соин ик паймонэз ӧвӧл, куддыръя Инмарлэсь кыӵе луэмзэ адямилы валаны туж секыт шуыса.

Инмар котьку вал но котьку луоз шуыса валаны секыт ке но, со озьы ик вань. Инмарез кин ке кылдытысал ке, соку со, кин сое кылдытӥз, ачиз Кылдытӥсь луыны кулэ вал. Но Библия валэктэ, Иегова ваньзэ кылдытӥз шуыса. (Усьтӥськон 4:11). Со сяна, ми тодӥськомы, куке но номыр ӧй вал шуыса (Улон-вылон 1:1, 2). Соку кытысь ваньмыз кылдӥз? Со, кин ваньзэ кылдытӥз, солэсь азьвыл луыны кулэ вал ини. Озьы ик со Пизэ но кылчинъёсты кылдытэмлэсь азьло луыны кулэ вал (Иов 38:4, 7; Колоссыослы 1:15). Валамон, кыӵе ке но дыр ӵоже Инмар чылкак одӥгназ вал шуыса. Но сое нокин кылдытыны ӧз быгаты, малы ке шуоно ӧй вал со, кин сое кылдытыны быгатысал.

Милям улонмы но быдэс дунне возьматэ: вань Инмар, кудӥз котьку вал но котьку луоз. Со, кин ваньзэ кылдытӥз но ваньмызлы катъёс сётӥз, котьку луыны кулэ. Со гинэ ваньмызлы улон сётыны быгатэ (Иов 33:4).