АДЯМИ котьма ласянь пумозяз эскеремын луиз ке но солэн оскымон луэмез солы ваньбур ӧз вайы ке, Инмарлы оскымон кылёз-а со? Таӵе юан ӝутэмын но сэрттэмын-пертчемын вал, Иов нимо адями улыку.

Израиль калык Египетын улон дыръя, Авраамлэн ӵыжы-выжыез, Иов, Аравиын улӥз. Одӥг пол кылчинъёс Инмар азе люкаськизы, соосын ӵош Шайтан но лыктӥз. Инмысь кылдытэмъёс азьын Иегова вераз, со аслаз оскымон ужась-тыршисезлы, Иовлы, оске шуыса но музъем вылын со кадь дун-чылкыт адями ӧвӧл ни шуыса. Нош Шайтан шуиз, Иов, пе, Инмарлы ужа-тырше, солэн бакель каремез но утемез понна гинэ. Бугыръяськись кылчин вераз, Иовлэсь ваньзэ, маиз солэн вань, басьтоно ке, со Инмарез каргалоз шуыса.

Инмар лэзиз Шайтанлы Иовез ваньбуртэк но нылпиостэк кельтыны, нош собере со вылэ курадӟытӥсь висён лэзьыны. Иов уг тоды вал, ваньмыз та Шайтан бордысь потэ шуыса, соин солы валантэм вал, малы Инмар сое сыӵе курадӟытэ. Озьы ке но, со Инмарлэсь ӧз палэнтӥськы.

Иов доры куинь ӧрекчи эшъёсыз лыктӥзы. Ортчыт трос кылъёс вераса, соос Иовез оскытыны тыршизы, Инмар сое лушкем сьӧлыкъёсыз понна кыл кутытэ шуыса. Со сяна, соос веразы, Инмарлы аслаз ужась-тыршисьёсыз ноку но уг ярало но со соослы уг оскы шуыса. Иов эшъёсызлэн ӧрекчи веранъёсынызы соглаш ӧз кариськы. Юн оскыса, со вераз, кулытозяз дун-чылкыт кылёз шуыса!

Но Иов янгышаз — со аслаз шонерлыкез сярысь укыр трос малпаськыны кутскиз. Вань ченгешонъёсты кылзыса, вераськонэ пыриськиз Елиуй, кудӥз Иовлэсь но солэн эшъёсызлэсь пиналгес вал. Со Иовез пыкылӥз, кыӵе ке адямиез шонере поттон сярысь, Иеговалэсь вылӥ кивалтонзэ шонере поттон кулэгес луэ шуыса возьматӥз. Ӵапак со сярысь Иов вунэтӥз. Бӧрысь Елиуй Иовлэсь ӧрекчи эшъёссэ юн курлаз.

Собере Иовен вераськиз Иегова, солэсь малпанъёссэ тупатыны тыршыса. Иовлэсь паймымон кылдытэмъёслы саклыксэ висъяса, со адямиез Инмарлэн быдӟымлыкеныз ӵошатӥз но возьматӥз, макем пичи луэ адями. Иов Инмарлэсь визьмамзэ зӥбытэн кылзӥз. Иегова, «ӟеч сюлэмо, ваньзэ гажась-жалясь» луыса, сое бурмытӥз но кык поллы тросгес ваньбур но дас нылпиос сётӥз (Иаков 5:11). Секыт курадӟонъёсын пумиськыса, Иов Инмар азьын дун-чылкыт кылиз но Шайтанэн ӝутэм юанлы валэктон сётӥз.

Пыкиськемын: Иов книга.