Библиын гожтэмын, мар луоз «берпум аръёсы» (2 Тимофейлы 3:1). Соя ми валаны быгатӥськомы, ӵапак со вакытэ улӥськомы шуыса (Даниил 8:19; Матфей 24:3).

 Библиын, азьпалзэ ивортыса, азьло ик верамын вал пӧртэм югдуръёс сярысь, кудъёсыз одӥг дыре луозы. Библия соосты берпум аръёслэн тодметсы шуыса нима (Лука 21:7). Учкомы со азьпалзэ ивортонъёс пӧлысь куд-огъёссэ.

 Быдэс дунне вылын ожъёс луозы. Иисус Христос вераз: «Калык калыклы, эксэйлык эксэйлыклы ваче пумит султозы» (Матфей 24:7). Нош Усьтӥськонын 6:4 гожтэмын: «Вал вылын пукисьлы музъем вылысь тупаса улонэз басьтыны... эрик сётэмын». Та кылбурын вал вылын пукись — со ожъёс.

 Сютэм улон луоз. Иисус вераз: «Сютэм аръёс... луозы» (Матфей 24:7). Нош Усьтӥськон книгаын верамын эшшо одӥг вал вылын пукись сярысь. Со лыктэм бере музъемлэн пӧртэм палъёсаз сютэм улон кутскоз (Усьтӥськон 6:5, 6).

 Кужмо музъемзурканъёс луозы. Иисус вераз, пӧртэм интыосын музъем зуркалоз шуыса (Матфей 24:7; Лука 21:11). Музъемзурканъёс туж кужмо луозы. Соос туж трос изъян ваёзы. Соосын сэрен трос адямиос бырыны шедёзы.

 Висёнъёс вӧлмозы. Иисус вераз, висёнъёс вӧлмозы шуыса (Лука 21:11).

 Йыружъёс йылозы. Йыружъёс кемалась ини музъем вылэ вӧлмемын. Но Библиын верамын, берпум аръёсы соос эшшо но трос луозы шуыса. 2 Тимофейлы 3:13 гожтэмын: «Нош кескич адямиос, пӧяськисьёс эшшо но тросгес урод ужъёс лэсьтыны кутскозы».

 Музъемез бырон-куашкан калэ вуттозы. Усьтӥськонын 11:18 верамын, адямиос Музъемез сапталозы шуыса. Пӧртэм ужъёсынызы адямиос Музъемез куашкан калэ вуттозы: лек ужъёс лэсьтозы, пӧяськыса улозы но инкуазез кырсёмытозы.

 Адямиос сӧриськозы. Библиын, 2 Тимофейлы 3:1—4, азьло ик верамын вал: «Адямиос... тау карисьтэмесь, сьӧлыклэсь кышкасьтэмесь... йыркурзэс вунэтӥсьтэмесь, кыл нуллӥсесь, чидасьтэмесь, уродэсь-лекесь, ӟечез-уродэз валасьтэмесь луозы; огзэс огзы вузалозы; возьытэз уз тодэ, вылтӥяськисесь луозы». Адямиос сокем сӧриськозы — берпум аръёсты зэмзэ ик «секыт дыръёс» шуыны луоз.

 Семья кусыпъёс сӧриськозы. 2 Тимофейлы 3:2, 3 верамын вал, одӥг семьяысь адямиос но ог-огзэс уз яратэ но нылпиос «анай-атайлы тэрытскисьтэмесь» луозы шуыса.

 Адямиослэн Инмарез яратонзы сӥялоз. Иисус азьло ик вераз, «тросэзлэн яратонэз сӥялоз» шуыса (Матфей 24:12). Иисуслэн та кылъёсыз возьмато, тросэз адямиос Инмарез ӧжытгес яратыны кутскозы шуыса. 2 Тимофейлы 3:4 верамын, сыӵе адямиос «Инмарез яратон сярысь, золгес каньылэн, эзылыса улонэз яратозы» шуыса.

 Адямиос Инмарлы оскемъяськозы гинэ. Библиын, 2 Тимофейлы 3:5 гожтэмын, адямиос «вылтуссыя Инмарлы оскись кадесь луозы, нош ужъёсынызы Инмарлы осконлэсь куштӥськозы» шуыса. Инмарлэсь кылзӥськем интые, соос ас мылпотэмзыя улозы.

 Библиысь азьпалзэ ивортонъёсты валан будоз. Данииллэн книгаяз верамын вал, «берпуметӥ дыръёсы» тросэз адямиос Библиысь зэмлыкез умойгес валаны кутскозы шуыса, озьы ик та азьпалзэ ивортонъёсты но (Даниил 12:4).

 Ӟеч ивор быдэс дунне вылын верамын луоз. Иисус вераз: «Эксэйлыклэн та Евангелиез быдэс дунне вылын тодытэмын луоз» (Матфей 24:14).

 Адямиос нокыӵе ик уз кариське, серекъялозы гинэ. Иисус вераз, та дуннелы пум вуэмез адӟыса, адямиос кылэм-адӟем ик уз каре шуыса (Матфей 24:37—39). Нош 2 Пётрлэн 3:3, 4 верамын вал, адямиос со тодметъёсты адӟизы ке но, серекъялозы гинэ шуыса. Соос вералозы, озьы котьку вал шуыса.

 Вань азьпалзэ ивортонъёс быдэсмозы. Иисус вераз: «Ваньзэ тае адӟиды ке» (Матфей 24:33). Та азьпалзэ ивортонъёслэн куд-огезлэн гинэ ӧвӧл, нош ваньмызлэн огдыре быдэсмемзы возьматоз, берпум аръёс вуизы шуыса.

 Бен. Дуннеысь кылдэм югдурез чакласа но азьпалзэ ивортонъёсын верам дырез лыдъяса, асьмеос валаськомы, берпум аръёс 1914-тӥ арын кутскизы шуыса — ӵапак соку, куке кутскиз Нырысетӥ дунневыл ож. Та видеороликез учкыса, тодыны быгатоды, кызьы дуннеын кылдэм югдур возьматэ, ми берпум аръёсы улӥськомы шуыса.

 1914-тӥ арын Инмарлэн Эксэйлыкез инмын кивалтыны кутскиз. Нырысетӥез, мае со лэсьтӥз — Шайтанэз но солэсь периоссэ инмысь музъем вылэ сэрпалтӥз. Со дырысен Шайтан но периос уродзэ лэсьтыны быгато музъем вылын улӥсьёслы гинэ (Усьтӥськон 12:7—12). Адямиослэн урод пала воштӥськемзы но асьсэды туж урод воземзы возьматэ, та дуннеен Шайтан кивалтэ шуыса. Соин ик берпум аръёс «секыт дыръёс» шуыса нимамын (2 Тимофейлы 3:1).

 Дуннеын кылдэм югдур туж сюлмаськытэ. Тросэз сюлмасько, адямиос ог-огенызы огкылэ вуыны уг быгато шуыса. Куд-огъёсыз кышкало, адямиослэн ужъёсынызы сэрен улон быроз шуыса.

 Но вань сыӵе адямиос но, кудъёсыз оско, азьланяз ваньмыз умой луоз шуыса. Соос тодо, ӝоген Инмарлэн Эксэйлыкез музъем вылысь вань курадӟонъёсты быдтоз шуыса (Даниил 2:44; Усьтӥськон 21:3, 4). Нош али, куке со дыр вуэмын ӧвӧл на, соос чидаса возьмало, ку Инмар сётэм кылзэ быдэстоз. Соослы кужым сёто Иисуслэн таӵе кылъёсыз: «Пумозяз чидам мурт утиськоз» (Матфей 24:13; Михей 7:7).