Oco. Eliapu li kasiko muẽle. Olio “ombiali yoluali,” ociluvo cimue cespiritu ca linga ondingãivi kuenda ca sinĩla Suku. (Yoano 14:30; Va Efeso 6:11, 12) Embimbiliya li lombolola ovituwa Vieliapu poku tukula olonduko vi kuãimo ndeci:

•   Satana, ci lomboloka “Unyãli.”—Yovi 1:6.

•   Eliapu, ci lomboloka “Ukualundi.”—Esituluilo 12:9.

•   Onyõha, okuti Vembimbiliya yi lomboloka “Ukuakuyapuisa.”—2 Va Korindo 11:3.

•   Uyonji.—Mateo 4:3.

•   Ohembi.—Yoano 8:44.

Efetikiloko lievĩho

 Komanu vamue, Satana Eliapu efetikilo lievĩho li kasi vokati ketu. Pole, Embimbiliya litukula ombangulo ya kala pokati ka Suku la Satana. Omo okuti Suku wa lipua, eye nda ka kaile vali oku vangula lonepa yimue yĩvi yaye muẽle. (Esinumuĩlo 32:4; Yovi 2:1-6) Cimuamue haico okuti, Satana wa seteka Yesu una ka kuatele ekandu. (Mateo 4:8-10; 1 Yoano 3:5) Omo liaco, Embimbiliya li lekisa okuti Eliapu omunu muẽle, hacina cimueko cĩvi ci kasi vokati ketu.

 Anga hẽ tu komõha omo okuti omanu valua ka va tava okuti kuli muẽle Eliapu? Sio, momo Embimbiliya li popia okuti, Satana o kuama olonjila viuhembi oco a tẽlise ovimãho viaye. (2 Va Tesalonike 2:9, 10) Yimue pokati kolonjanjo via velapo a siata oku kuama oco a yapuise omanu, oku va vetiya oku tava okuti eye keliko.—2 Va Korindo 4:4.

Uhembi: Lúcifer, onduko yikuavo ya eciwa Keliapu.

 Ocili: Kelimi lio Heveru okuti Vambimbiliya amue, ondaka ya pongoluiwa okuti, “Lúcifer” yi lomboloka “oku nina.” (Isaya 14:12) Ulandu waco u lekisa okuti ondaka yaco, yi tiamisiwila kocikoti colosoma vio ko Bavuluno okuti via kala vakuakulitunula kuenje via laikele oku kutisiwa osõi la Suku. (Isaya 14:4, 13-20) Ondaka “oku nina,” ya tukuiwa oco ku kutisiwe osõi ocikoti ca va Bavuluno noke yoku kunduiwa.

Uhembi: Satana o talavaya kumue la Suku “ndonganji yoku pindika.”

 Ocili: Eliapu unyãli wa Suku, hanalavayi yayeko. Satana Eliapu, o lambalala kuenda o lundila vana va vumba Suku.—1 Petulu 5:8; Esituluilo 12:10.