Omanu ka va tẽla oku nena ombembua, kuenda lalimue eteke va ci linga omo liasunga alua:

•   “Omunu enda ka tẽla eye muẽle oku suñamisa oku enda kuaye.” (Yeremiya 10:23) Omanu ka va lulikiwile lomoko yoku liviala ovo muẽle. Omo liaco, ka va pondola oku nena ombembua ya koka.

•   “Ku ka kolele olosoma. Ku ka kolele omunu ukuasitu omo kokuaye ka kuli ekuatiso. Eci a tula omuenyo o tiukila posi yaye. Eteke liaco hailio olongombo viaye vi nyõleha.” (Osa. 146:3, 4) Olombiali viomanu, ndaño muẽle vina vi kuete ovisimĩlo viwa, ka vi tẽla oku mãlako ovina vi koka uyaki.

•   “Koloneke via sulako kuiya otembo yohali. Momo omanu . . . va linga olongangala, ka va sole eci ciwa, haivo olomakuli, vakuacipango, vakuepela.” (2 Timoteo 3:1-4) Etu tu kasi “koloneke via sulako violuali lulo lua vĩha hailuo lueyuka ovituwa vitateka ombembua.

•   “Ove a ngongo, love a kalunga, ngongo yene! Momo eliapu lia lokila kokuene lonyeño ya lua, omo lia limbuka okuti oloneke vialio vitito.” (Esituluilo 12:12) Eliapu okuti olio unyãli wa Suku, lia lokila ocipepi lilu lieve kuenda lia siata oku vetiya omanu oku kuata ovituwa vĩvi. Osimbu Eliapu li amamako oku ‘viala oluali lulo,’ka tu kuata ombembua.—Yoano 12:31.

•   “Usoma wa Suku u ka nyõla loku lia ovosoma aco osi, [ana a lingila usuanji Suku] haiwo u kala muẽle hũ oloneke ka vi pui.” (Dan. 2:44) Usoma wa Suku, owo lika u ka tẽlisa onjongole yomanu yoku kuata ombembua voluali.—Osamo 145:16.