Ulume ohuasi kuenda Lasaru, omanu vamue va tukuiwa vulandu wa lomboluiwa vohundo yimue Yesu a linga. (Luka 16:19-31) Vulandu owu, alume vaco va lomboloka ovimunga vivali viomanu okuti: (1) asongui va Yudea vakuepela vo koloneke via Yesu kuenda (2) omanu ambombe haivo vakuacili va tava kesapulo lia Yesu.

Vocipama cilo

•  Nye Yesu a popia catiamẽla kulume ohuasi kuenda Lasaru?

•  Kua pita muẽle ulandu waco?

•  Ulandu owu u kuete hẽ elitokeko lelongiso lifelu viondalu?

•  Ulandu wulume ohuasi kuenda wa Lasaru u lomboloka nye?

 Ku Luka ocipama 16, Yesu wa lombolola alume vavali va liyaka lapongoloko anene kekalo liomuenyo wavo.

 Onepa yimue yi teta onimbu yulandu Yesu a tukula, yiti: Ulume umue ohuasi wa kuatele ekalo liwa komuenyo. Ulume umue ukuakupinga osimõla o tukuiwa Lasaru, wa kapiwa pombundi yulume ohuasi; eye wa enda oku kevelela okulia ku kupuka komesa yulume ohuasi. Noke liotembo yimue, Lasaru wa fa kuenje ovangelo vo wambata ponele ya Avirahama. Ulume ohuasi wa favo kuenje wa kendiwa. Vulandu waco, alume vavali va lomboluiwa ndu okuti, va kasi lomuenyo noke liolofa. Ulume ohuasi wa fa, wa kala oku talisiwa ohali vondalu kuenje wa pinga ku Avirahama oku tuma Lasaru oco a talalise elimi liaye letosi liovava lomuine wa Lasaru. Avirahama ka tavele epingilo liulume ohuasi kuenda wa popia okuti, kavali kavo kaliye ekalo liavo lia pongoloka, pokati kavo pali ekungu limue linene lina ka li ecelela okuti umue enda konele yikuavo.

 Sio. Eci olusapo lumue Yesu a ta oco a longise olumapu lumue. Omo okuti eci olusapo lumue, oluo lu taviwa la vana va tanga calua. Ndeci, okasapi kamue Vembimbiliya lia Lutero liunyamo 1912, lia lekisa okuti ulandu owu olusapo lumue. Embimbiliya Católica de Jerusalém ketosi lio pombuelo lia lekisa okuti, eci ndeti “olusapo lumue lua lomboluiwa ndulandu okuti, ka mua kongeliwile omanu va kalako muẽle ocili.”

 Nye Yesu a longisa catiamẽla komuenyo noke liolofa? Eye wa yonguile hẽ oku popia okuti, omanu vamue va talisiwa ohali vifelo viondalu eci va fa kuenda Avirahama la Lasaru va kala kilu? Ovovangi alua a lekisa okuti, hacoko ca pita.

 Ndeci:

•   Nda okuti ulume ohuasi wa kaile muẽle vocitumãlo cifelu viondalu, ondalu yaco nda ka ya takatisile hẽ ovava Lasaru a laikele oku nena komuine?

•   Ndaño ka a takatele, etosi limosi liovava nda lia kavuluisa hẽ ulume ohuasi votembo yalua ohali yi kokiwa londalu?

•   Avirahama nda wa kala ndati kilu lomuenyo omo okuti tunde vepuluvi Yesu a ta olusapo luaco eye wa popia hati, lomue wa endele kilu?—Yoano 3:13.

 Sio. Ndaño okuti eci ndeti hulanduko wocili, vamue va popia okuti, ceca ondimbukiso yokuti omanu vawa va enda kilu, omanu olondingaĩvi va talisiwa ohali vifelu viondalu. a

 Anga hẽ emalusuilo eli lia sunguluka? Sio.

 Elongiso lifelu liondalu, ka li li kuata leci Embimbiliya li popia catiamẽla kekalo liava va fa. Ndeci, olio ka li popi okuti, omanu vosi vawa vana va fa va kasi kilu, ale omanu olondingaĩvi va kasi oku talisiwa ohali vifelu viondalu. Pole, olio li popia hati: “Ava va kasi lomuenyo va kũlĩha okuti, va ka fa, pole, ava va fa ka va kũlĩhĩle lacimue.”—Ukundi 9:5.

 Ulandu u lekisa okuti, ekalo liovimunga vivali viomanu, lia laikele oku pongoloka calua.

 Ulume ohuasi, wa kala ocindekaise casongui va Yudea “vana va solele olombongo.” (Luka 16:14) Ovo va yeva ovina Yesu a popia, pole, ka va tavele kesapulo liaye. Asongui vaco vetavo, ka va kapeleko omanu vaño.—Yoano 7:49.

 Lasaru, wa kala ocindekaise comanu vaño vana va tava kesapulo lia Yesu, haivo ka va kapiwileko lasongui vetavo lia va Yudea.

 Epongoloko liekalo liomuenyo, lia lingiwa vocipikipiki kovimunga vivali.

•   Asongui vetavo lia va Yudea va simĩle okuti, va kala oku kuatisiwa lohenda ya Suku. Pole, ca kala ndu okuti ovo va fa, eci Suku a va likala lonjila yavo yoku fendela, momo ka va tavele kesapulo lia Yesu. Ovo va talisiwa ohali lesapulo Yesu a kunda kumue lolondonge viaye.—Mateo 23:29, 30; Ovilinga 5:29-33.

•   Omanu vaño okuti,—vokuenda kuotembo yalua ka va kapiwileko lasongui vetavo liavo,—kaliye va kala oku tatiwa lohenda. Valua va tava esapulo Liembimbiliya Yesu a longisa kuenda lia va kuatisa. Ovo kaliye, va kuata epuluvi lioku sanjukila ohenda ya Suku otembo ka yi pui.—Yoano 17:3.