“Esanju li tunda koku eca olio lia velapo, li tunda koku tambula li sule.”—Ovilinga 20:35.
“Eci o pongiya ocipito cimue laleka olohukũi, ovihata, ovilema kuenda olomeke; kuenje o sanjuka, omo ovo ka va kuete lacimue oco va ku tiuwile.”—Luka 14:13, 14.
Amãlehe va kapako vakuavo
Kuli amãlehe valua vakapako vakuavo. Tala vamue pokati kavo.
“Olonjanja vimue cosi njongola oku tumãla lika loku tala otelevisão. Pole ndi sokolola yina yange kuenda isiange va kasi oku talavaya kuenda va tiuka tupu konjo, va kava. Ame ñatuka, ndi sukula alonga, ndi komba vonjo kuenda ndi puenya onukuvila kovikuata. Ndi pongiyavo o kafé momo ovo va ka sole calua. Eci yina yange a pĩtila konjo, eye o popia hati: ‘Haka, ovina viosi via yela! Njevite elemba liwa! Nda pandula calua amõlange!’ Ame ndi kuata esanju eci ndi lingila ovina viwa olonjali viange.”—Casey.
“Olonjanja viosi olonjali viange via ñuatisa calua loku nyiha ovina ndi sukila. Omo liaco ulima wa pita, eci ekãlu lia nyolẽha, nda tẽla oku feta ovina viosi lolombongo nda kuatele oco li semũluiwe. Ovo va seteka oku ndi tutuiya pole, ‘sia tavele’ kocisimĩlo caco. Momo olonjali viange vi sukila ekuatiso lia velapo. Nda sanjuka omo lioku va kuatisa lonjila ndeyi.”—Holly.
Wa ci kũlĩha? Amãlehe valua okuti Olombangi Via Yehova va siata oku kuata esanju lioku kuatisa vakuavo poku va longisa Embimbiliya. Vamue va ilukila kolofeka vikuavo kuli etendelo litito liakundi.
“Nda tunda ko Estados Unidos kuenje da ilukila ko México oco ndi kuatise kupange woku longisa Embimbiliya. Olonjanja vialua si tẽla oku eca olombanjaile momo si kuete ovina vialua vioku eca. Pole nda limbuka okuti oku pesela otembo yange kuenda ongusu kupange woku kunda ci kuete vali esilivilo okuti oku kuatisa lolombongo ci sule.”—Evan.
Ndi pondola oku kuatisa ndati vakuetu?
Ove hẽ o yongola oku kuata esanju li tunda koku kuatisa vakuene? Kũlĩhisa olonumbi vi kuãimo.
Oku soneha okokanda kamue koku eca olopandu kolonjali viove.
Oku kuatisa manji yove oku linga ovopange vo tuma kosikola.
Oku kuatisa omanu vakuavo:
Oku tumisa ukanda umue komunu o vela
Oku komba posamua yomunu o lisungue love okuti wa kuka
Oku nyula omunu umue okuti ka citava oku tunda konjo
Oku landela ombanjaile omunu o kasi oku pita locitangi cimue
Onumbi: Sokolola ovina vimue o pondola oku linga. Noke seteka oku kuatisa omunu umue osemana yilo. Citava okuti o ka komõha esanju o ka kuata!
“Eci o kuatisa vakuene ove o yeva esanju. O kũlĩha okuti wa linga ocina cimue ci kuete esilivilo kuenda o limbuka okuti omanu va eca olopandu. Ci sanjuisa calua ndaño okuti kefetikolo ku ci limbuka. Ovina o lingila vakuene ka via luile momo ove o ka tambula eci ca velapo.”—Alana.
