UNGELO o tukuiwa hati Mingeli onduko yaye ka yi molẽha olonjanja vialua Vembimbiliya. Pole, eci a tukuiwa, olonjanja viosi o kasi oku linga cimue. Velivulu lia Daniele, Mingeli o lekisiwa okuti o kasi oku yaka lovangelo olondingaĩvi. Vukanda wa Yuda, o lekisiwa okuti o kasi oku lipatãla la Satana. Kelivulu Liesituluilo o lekisiwa okuti o kasi oku liyaka Leliapu kuenda olondele viaye. Poku yaka lovanyali va Yehova oco a teyuile uviali Waye, Mingeli o kasi oku linga muẽle ndeci ci lomboloka onduko yaye. Onduko yaco yi lomboloka hati, “Helie wa Lisoka la Suku?” Oco hẽ helie Mingeli?

Omanu valua okuti ka va kũlĩhĩwile lika londuko yimosi. Ndeci Yakoba onduko yaye yikuavo Isareli. Upostolo Petulu wa kũlĩhĩwilevo okuti Simono. (Efetikilo 49:1, 2; Mateo 10:2) Embimbiliya li lekisavo okuti Mingeli, onduko yikuavo ya Yesu Kristu. Oyo yatiamẽla kovina eye a linga palo posi eci handi a kala kilu, levi a linga eci eya palo posi. Tu konomuisi ovisonehua vi eca elomboloko eli.

 Ungelo Unene. Embimbiliya li tukula Mingeli “ungelo unene.” (Yuda 9) Ondaka eyi yi lomboloka okuti “usongui wovangelo.” Kũlĩhĩsa okuti Mingeli otukuiwa hati ungelo unene. Eci ci lekisa okuti ungelo waco umosi lika. Embimbiliya li lekisa okuti kuli lika ungelo umosi otukuiwa hati “ungelo unene.” Ocikele ca Yesu ca lisoka leci cungelo unene. Kelivulu 1 lia Va Tesalonike 4:16, catiamẽla ku Yesu Kristu tu tangako hati: ‘Ñala o tunda kilu levilikiyo, londaka yungelo unene.’ Ocisonehua eci ci tukula ondaka ya Yesu hati ondaka yungelo unene. Eci ci lekisa okuti Yesu eye muẽle ungelo unene haeye Mingeli.

Usongui Wovangelo. Embimbiliya li tu sapuila hati ‘Mingeli lovangelo vaye va liyaka locinyõha . . . kuenda va liyakavo lovangelo vaye.’ (Esituluilo 12:7) Eci ci lekisa okuti Mingeli eye usongui wovangelo vakuacili. Momo kelivulu Liesituluilo o tukuiwavo okuti usongui wolohoka viovangelo. (Esituluilo 19:14-16) Upostolo Paulu wa tukulavo “Ñala Yesu lovangelo vaye va pama.” (2 Va  Tesalonike 1:7; Mateo 16:27; 24:31; 1 Petulu 3:22) Embimbiliya li tukula Mingeli “lovangelo vaye” kuenda Yesu “lovangelo vaye.” (Mateo 13:41) Embimbiliya ka lekisa okuti kilu kuli ovando avali olohoka viovangelo, okuti va kasi oku songuiwa la Mingeli kuenda vakuavo va songuiwa la Yesu. Eci ci lomboloka okuti Mingeli eye muẽle Yesu Kristu una o kuete ocikele coku songuila ovangelo. a