OCIPAMA 7
Usoma wa Suku u Lomboloka Nye?
1. Usoma wa Suku u lomboloka nye?
Nye ci lingisa Yesu oku kala Osoma yimue yiwa?—MARKO 1:40-42.
Usoma wa Suku u lomboloka uviali umue wa tumbikiwa kilu. Owo u ka piñainya ovosoma osi omanu kuenda u ka tẽlisa ocipango ca Suku palo posi ndeci ci kasi oku lingiwa kilu. Olondaka evi viatiamẽla Kusoma wa Suku, viwa. Ndopo Usoma wa Suku u ka tẽlisa onjongole yomanu yoku kuata uviali umue uwa. Uviali waco, u ka tokekisa omanu vosi va ka kala palo posi.—Tanga Daniele 2:44; Mateo 6:9, 10; 24:14.
Uviali u sukila oku kuata osoma. Omo liaco, Yehova wa nõla Omõlaye Yesu Kristu oco a linge Osoma Yuviali Waye.—Tanga Esituluilo 11:15.
Tala ovideo Usoma wa Suku u Lomboloka Nye?
2. Momo lie Yesu eye Osoma yiwa?
Omõla a Suku, Ombiali yimue ya sunguluka, momo ukuahenda. (Yoano 1:14) Handi vali, o kuete unene woku kuatisa omanu, momo o ka viala oluali luosi okupisa kilu. Noke yoku pinduiwa, wa enda kilu kuenje wa tumãla kondio ya Yehova loku talamẽla. (Va Heveru 10:12, 13) Noke, Suku wo wĩha omoko yoku viala.—Tanga Daniele 7:13, 14.
3. Velie va ka viala kumue la Yesu?
Ocimunga cimue ci tukuiwa hati ‘olosandu,’ ci ka viala kumue la Yesu kilu. (Daniele 7:27) Ovapostolo va Yesu vakuekolelo, ovo olosandu viatete via nõliwa. Toke cilo, Yehova o kasi oku amamako oku nõla alume lakãi vakuekolelo ndolosandu. Ovo va pinduiwa vetimba liespiritu, ndeci ca pita la Yesu.—Tanga Yoano 14:1-3; 1 Va Korindo 15:42-44.
Vañami va enda kilu? Yesu wa va tukula hati, ‘vakacunda katito.’ (Luka 12:32) Etendelo liavo li soka 144.000 komanu. Ovo va ka viala oluali kumue la Yesu.—Tanga Esituluilo 14:1.
4. Eci Yesu a fetika oku viala kua pita nye?
Usoma wa Suku wa fetika oku viala kunyamo wo 1914. a Yesu noke yoku tumbikiwa komangu yusoma, wa tundisa Satana kumue lolondele viaye kilu kuenje va imbiwa palo posi. Satana omo lionyeño yalua wa fetika oku nena ovitangi palo posi. (Esituluilo 12:7-10, 12) Tunde opo, ovitangi viomanu voluali via fetika oku livokiya calua. Ovoyaki, onjala, ovovei, kuenda ovilemawe, vi lekisa “ondimbukiso” yokuti ndopo Usoma wa Suku u ka nena apongoloko voluali.—Tanga Luka 21:7, 10, 11, 31.
5. Nye Usoma wa Suku u kasi oku linga?
Lekuatiso liupange woku kunda koluali luosi, Usoma wa Suku u kasi ale oku tokekisa owiñi wakahandangala wo kolofeka viosi. Vakuavitima via sunguluka, va kasi oku tava oku linga olonungi viusoma wa Suku una u kasi peka lia Yesu. Usoma waco, u ka va teyuila eci oluali lulo lũvi lu ka kunduiwa. Omo liaco, vosi va yongola oku kuatisiwa Lusoma wa Suku, va sukila oku lilongisa oku pokola ku Yesu.—Tanga Esituluilo 7:9, 14, 16, 17.
Vokuenda kuohulukãi yanyamo, Usoma u ka tẽlisa ocipango catete Suku a kuatelele omanu. Oluali lu ka kala ofeka yeposo. Noke, Yesu o ka eca Usoma ku Isiaye. (1 Va Korindo 15:24-26) Ove hẽ wa kũlĩha umue o yongola oku sapuilako ovina viatiamẽla Kusoma wa Suku?—Tanga Osamo 37:10, 11, 29.
