Osimbu Yesu a kala vo Yudea kuenda vo Yerusalãi, wa longisa omanu loku va sakula. Cilo eye o yoka Olui Yordão oco a ka longise volupale lolupale voluvumba luo Perea. Pole, ndopo o ka tiukila ko Yerusalãi.

Vo Perea, ulume umue wa pula Yesu hati: “A Ñala, anga vatito va kasi oku popeliwa?” Citava okuti ulume waco wa enda oku yeva oku lihoya kuasongui vetavo, nda omanu valua va laikele oku popeliwa ale vatito lika. Yesu ka tambuluile nda omanu vañami va ka popeliwa, pole, o pongolola ombangulo yaye. Kuenje o lombolola eci ci sukiliwa oco omunu a popeliwe poku popia hati: “Likolisili oku iñila vombundi ya sukatela.” Ocili okuti ci sukila oku likolisilako. Momo lie? Yesu o lombolola hati: “Ndu sapuili siti, valua va sandiliya oku iñilamo, pole ka va ci tẽla.”—Luka 13:23,, 24.

Yesu poku lekisa esilivilo lioku likolisilako, o popia hati: “Eci muẽlianjo a votoka kuenje o yika epito, ene vu talama posamua loku totola epito hati, ‘A Ñala tu yuluileko.’. . . Pole, eye o vu sapuili hati, ‘Sia kũlĩhĩle oku wa tundi. Nundi, vosi yene alondingaĩvi!’”—cLuka 13:25-27.

Olusapo olu lu lekisa eci ci pondola oku pita lomunu umue wa cilua okuti, o pitĩla keliva a yongola kuenje o sanga okuti epito lia yikiwa losapi. Eye wa sukilile oku pitĩla selo ndaño ka lia kaile epuluvi liwa kokuaye. Eci ci pondola oku pita lomanu valua va laikele oku kuatisiwa lalongiso a Yesu. Ovo ka va kapeleko esilivilo lioku kuama efendelo liocili ndocimãho ca velapo komuenyo wavo. Onepa yalua yomanu Yesu a tumiwila, ka va tava keliangiliyo lia Suku lioku popeliwa. Yesu o popia okuti va ka ‘lila loku likeleketa ovayo’ eci va imbiwa posamua. Ndaño ndoco, omanu va tunda kolofeka viosi okuti “kutundilo lo kutakelo kuenda konano lo kombuelo,” va ka “tumãla komesa Vusoma wa Suku.”—Luka 13:28, 29.

Yesu o popia hati: ‘Kuli vana va sulako [okuti va Yudea lava Havayudeako vana va talisiwa ohali] ovo va ka livanga kuenda valua va livanga, [okuti asongui vetavo vana va lipanda omo lioku kala ovitumbulukila via Avirahama] ovo va ka sulako.’ (Luka 13:30) Poku vangula kuava va ka “sulako,” eye o yongola oku popia okuti omanu vaco vakualutukãi ka va ka kala Vusoma wa Suku.

Kuenje vamue va Fariseo va enda ku Yesu kuenda vo lungula vati: “Tunda kulo, kuende lonjila yove, momo Herode [Antipasi] o yongola oku ku ponda.” Citava okuti soma Herode eye wa sovola ondaka yaco oco Yesu a tunde vocikanjo. Pamue Herode o kuete ohele yoku panga onepa kolofa viuprofeto ukuavo ndeci ca pita kolofa via Yoano Upapatisi. Pole Yesu o sapuila va Fariseo hati: “Kuendi, ka sapuili ombulu yaco okuti, ‘Ñasi oku tundisa olondele loku sakula omanu etaili la  hẽla kuenda keteke liatatu ndi mãla.’” (Luka 13:31, 32) Yesu poku tukula Herode hati, “ombulu,” pamue wa tiamisila ondaka yaco katutu olombulu. Pole, Yesu ka tava oku yapuisiwa latutu a Herode ndaño muẽle omunu ukuavo. Yesu o tẽlisa ocikele Isiaye o wĩha ndomo ci likuata lesokiyo liotembo ya Suku okuti, liomanu halioko.

Yesu amamako lungende waye toke ko Yerusalãi, momo eye wa popia okuti, “ka ca sungulukile okuti uprofeto o pondiwa kuiñi, te ko Yerusalãi.” (Luka 13:33) Momo lie Yesu a popela olondaka evi nda ka kuli ocitumasuku cimue Cembimbiliya ci popia hati, Mesia te o pondiwa volupale luaco? Momo o Yerusalãi oyo ombala mu kasi 71 komanu va panga onepa Kekanga Linene lia va Yudea kuenda omo va enda oku sombisila vana va lundiliwa okuti ovaprofeto vesanda. Handi vali, omo va enda oku ecela ovilumba viovinyama. Omo liaco, Yesu o limbuka okuti ka ca sungulukile okuti eye o pondiwila kocitumãlo cikuavo.

Yesu o liyeya hati: “A Yerusalãi, a Yerusalãi, ukuakuponda ovaprofeto loku sosola vana va tumiwa kokuove—nda yonguile calua oku ongolola omãla vove ndeci osanji yi vundisa omãla vaye vemehi liavava ayo! Pole, ene ka wa ci yonguili. Kuenje onjo yene yu siali upolokoso.” (Luka 13:34, 35) Ofeka yi likala Omõla a Suku kuenje yi ka talisiwa ohali!

Osimbu Yesu ka pitĩlile vo Yerusalãi, usongui umue wa va Fariseo u laleka oku ka lia konjo yaye keteke Liesambata. Omanu va lalekiwa, va lavulula eci Yesu a linga lulume o kuetiwe luvei wongunge (okuti ovava alua vetimba, olonjanja vimue wa siata kovolu ale kolomãhi). Yesu o pula va Fariseo kuenda alongisi Vocihandeleko hati: “Ca sunguluka hẽ oku sakula Kesambata, ale sio?”—Luka 14:3.

Lomue o tambulula. Kuenje Yesu o sakula ulume loku pula hati: “Helie pokati kene okuti nda omõlaye ale omeme yaye ya kupukila vocitunu keteke Liesambata ka yupimo lonjanga?” (Luka 14:5) Ka va tambulula cimue omo liovisimĩlo via sunguluka via Yesu.