Esekiele 41:1-26
41 Eye wa ngambata konepa yo kosamua yonembele* kuenda wa seteka olonele violongunji; konele yimue kua kala epandu kovikeya* vupati kuenda konele yikuavo kua kala ovikeya epandu vupati.
2 Upati wo puvelo wa sokele ovikeya ekũi kuenda ovikeya violonele viovimano* vio puvelo, via sokele vitãlo okuti, onele yikuavo ya sokelevo ovikeya vitãlo. Eye wa seteka oku lepa kualio okuti kua sokele 40 kovikeya kuenda upati walio wa sokele 20 kovikeya.
3 Noke eye wa iñila vokati* kuenda wa seteka olonjongo vio puvelo kuenje via sokele ovikeya vivali kuenda upati wo puvelo wa sokele ovikeya epandu. Ovikeya violonele viovimano vio puvelo, via sokele* epanduvali.
4 Noke eye wa seteka ohondo ya imba ovaso kocitumãlo ci kola kuenda oku lepa kualio, kua sokele 20 kovikeya kuenda vupati 20 kovikeya.+ Kuenje eye wa ndi sapuila hati: “Eyi oyo Ohondo yi Kola Koku Kola.”+
5 Eye wa seteka ocimano conembele kuenje ca soka ovikeya epandu koku pama. Olohondo via ñualele konembele via kuata ovikeya epandu vupati.+
6 Olohondo vio kolonele, via kala olosapalalo vitatu via lepa, ohondo lohondo ya kala kilu liohondo yikuavo okuti, via kuata 30 kolohondo kosapalalo losapalalo. Ovimano vionembele via tungiwa lonjila yimue okuti kolonele violohondo kua kala ovitumãlo vioku puyukila, oco okuti oviyekelo viaco, ka vi kapiwa vovimano vionembele yaco.+
7 Kolonele vivali vionembele kua kala onjila* yimue ya sanjavalele okuti yecelela oku londa kolohondo vio konano.+ Oku sanjavala kuaco, kua livokiyile oku upisa kosapalalo toke kosapalalo yikuavo poku londa kosapalalo yo kombuelo toke kosapalalo yo konano oku pita vosapalalo yo vokati.
8 Nda mola okuti kolonele viosi vionembele kua kala embumbua limue lia lepa kuenda oseteko yoviseveto vionele yolohondo, ya sokele olundeya lumue luovikeya epandu toke kevindi.
9 Upati wonele yocimano wa kuata ovikeya vitãlo. Kua kala onepa yimue ya sanjavala* kolonele vionembele okuti kolonele violohondo vina via tiamẽlele konembele.
10 Pokati konembele lolohondo vioku lilamo,+ pa kala onepa yimue okuti konele lonele ya kuata 20 kovikeya vupati.
11 Kua kala uvelo umue pokati kolonele violohondo kuenda onepa yimue ya sanjavala kolonele vionano kuenda uvelo ukuavo konele yo kombuelo. Upati wonepa ya sanjavala wa sokele ovikeya vitãlo okuti, kolonele viosi.
12 Onepa ya tungiwa yokonele yutakelo ya imba ovaso konepa ya sanjavala ya sokele 70 kovikeya vupati kuenda 90 kovikeya vusõvi; ocimano ca tungiwa, ca kuata ovikeya vitãlo kolonele viosi koku pama.
13 Eye wa seteka onembele kuenje oyo ya kuata 100 kovikeya vusõvi. Onepa ya sanjavala okuti, onepa ya tungiwa* lovimano vialio, via kuatavo 100 kovikeya vusõvi.
14 Ukeya wo kovaso yonembele ya imba ovaso kutundilo kuenda onepa ya sanjavala ya kuata 100 kovikeya.
15 Eye wa seteka oku lepa kuocimano ca tungiwa ca imba ovaso konepa ya sanjavala konyima, oku kongelamo ovimano vio kolonele viosi kuenda ovio via kuata 100 kovikeya.
Eye wa setekavo onepa yo posamua yohondo yi kola, onepa yo vokati yohondo yi kola+ kuenda ovindumba viocitali,
16 oku kongelamo ovivelo, olonjanela lapito a likupika+ lovimano via kala kolonepa vitatu. Ocipepi luvelo, kua kala alukuki avaya+ oku upisa posi toke kolonjanela; kuenje olonjanela via sitikiwile.
17 Kuopiwa oloseteko konepa yo kilu yuvelo, konepa yo vokati konembele, konepa yo kosamua kuenda kolonepa viosi viocimano via ñualako.
18 Mua kala va keruvi+ va sokotuiwa kuenda oviluvialuvia viuti weva+ okuti uti luti, wa kala pokati ka va keruvi kuenda u keruvi lu keruvi wa kuata ovipala vivali.
19 Ocipala comunu ca imba ovaso kuti weva wa kala konele yimue kuenda ocipala cohosi* ca imba ovaso kuti weva konele yikuavo.+ Ovio via sokotuiwa lonjila eyi konembele yosi.
20 Oku upisa posi toke konano koku iñilila, kua kala va keruvi va sokotuiwa kuenda oviluvialuvia viuti weva via kala vocimano cohondo yi kola.
21 Ovikuli* viohondo yi kola, via kala lolonele vikuãla via lisoka.+ Kovaso yocitumãlo* ci kola kua kala cimue ca setahãla
22 utala umue wevaya+ wa kuata ovikeya vitatu koku lepa kuenda ovikeya vivali vusõvi. Ya kuata oviti kavindi kuenda oviyekelo* vialio lolonele vialio via kala vievaya. Noke eye wa ndi sapuila hati: “Eyi omesa yi kasi kovaso a Yehova.”+
23 Ci kaile osamua yocitali kuenda ocitumãlo ci kola, via kuatele apito avali.+
24 Apito aco a kuata olonele vivali okuti, epito lepito lia kuata olonele vivali.
25 Vapito o vohondo yi kola, mua kala va keruvi va sokotuiwa kuenda oviluvialuvia viuti weva, ndava va kala vovimano.+ Kua kalavo olusoka* luavaya kilu liocindumba konele yosamua.
26 Kua kalavo olonjanela lapito a likupika+ kuenda oviluvialuvia viuti weva kolonele vivali viocindumba oku kongelamo olonele violohondo vionembele kuenda konele lonele.
Atosi Pombuelo
^ Lit., “onembele.” Kovipama 41 kuenda 42 ondaka eyi yi tiamisiwila konepa yo kosamua yonembele (Ohondo yi Kola) ale onembele yaco yosi (onembele oku kongelamo Ohondo yi Kola kuenda Ohondo yi Kola Koku Kola.)
^ Yi tiamisiwila kovikeya via lepa. Tala Alombo. B14.
^ Lit., “olonele.”
^ Okuti, vocitumãlo ci kola ale Ohondo yi Kola Koku Kola.
^ Lit., “Upati wo puvelo wa kala.”
^ Citava okuti yi tiamisiwila kosikata yi kasi ndehotio.
^ Citava okuti okololo yimue ya likupika kolonele vionembele.
^ Okuti, onepa yutakelo ya tungiwa yohondo yi kola.
^ Ale “eyove liohosi.”
^ Lit., “Ocikuli.” Citava okuti ci tiamisiwila koku iñilila Kuohondo yi Kola.
^ Pamue yi tiamisiwila Kohondo yi Kola Koku Kola.
^ Lit., “usõvi.”
^ Ale “ocisikĩlĩlo.”
