Yeremiya 17:1-27
17 “Ekandu lio Yuda lia sonehiwa lopena yutale.
Olio lia ngalavaliwa losungu yondiamande vevaya liutima wavo
Kuenda volombinga viovotala avo,
2 Osimbu omãla vavo va ivaluka ovotala avo lolombueti viavo vi kola*+
Konele yuti umue wa pulika, koviwulu via lepa,+
3 Kolomunda kuenda kovaimbo.
Ovikuata viene lovokuasi ene osi, ndi ka vi eca ndovina via pundiwa,+Ocili, ovitumãlo viene via lepa, omo liekandu wa lingi vovikanjo viene.+
4 Omo lionjongole yove, ove o ka tokoka kocipiñalo nda eca kokuove.+
Kuenje ame ndi ka ku lingisa okuti, ove o vumba ovanyãli vove vofeka yimue kua kũlĩhĩle,+Momo ene wa wenguli onyeño yange ndondalu.*+
Oyo yi ka timĩha otembo yosi.”
5 Ca popia Yehova ceci hati:
“Omunu* una o kolela komanu vaño a siñaliwe,+Una o kolela kongusu yomanu,*+Kuenda una okuti utima waye u tinduka ku Yehova.
6 Eye o ka kala nduti umue u kasi ulika vekalasoko.
Eye ka ka kuata elavoko lioku mola eci ciwa,Pole, o ka tunga vovitumãlo viekango vekalasoko,Vofeka yomongua okuti, lomue o pondola oku kalamo.
7 Wa sumũlũha omunu* una o kolela ku Yehova,Okuti ekolelo liaye li kasi ku Yehova.+
8 Eye o ka kala nduti umue wa kũliwa ocipepi lovava,Okuti u yandisa olombombo vialio toke volui.
Eye ka ka limbuka eci ku iya owuya,Pole, amẽla aye otembo yosi a ka yova.+
Kuenje kunyamo wocitenya eye ka ka sakalala,Ndaño oku liwekapo oku ima apako.
9 Utima wa piãla kelimbi okuti, ocina cikuavo ci sule kuenda owo ũvi calua.*+
Helie o pondola oku u kũlĩha?
10 Ame ndi Yehova, ndi kũlĩhĩsa utima,+Ndi konomuisa ovisimĩlo via longa,*Oco ngece komunu lomunu ndomo ci likuata lovilinga viaye,Ndomo ci likuata lepako liovopange aye.+
11 Ndeci onguali yi kongela asaila ana ka ya mbilile,Haico ci kasi una o lisandela ovokuasi lonjila yimue yuhembi.*+
Ovo va ko sia vokati komuenyo,Kuenje kesulilo eye o ka lekisa okuti, ka kuete olondunge.”
12 Ocalo culamba cina ci kemãlisiwa tunde kefetikilo,Oco ocitumãlo, cocitumãlo cetu ci kola.+
13 A Yehova, alavoko lia Isareli,Vosi vana va ku yanduluka va ka kutisiwa osõi.
Vosi vana va ku* siapo va ka sonehiwa voneketela,+Momo ovo va yanduluka Yehova ono yovava omuenyo.+
14 Ndi kayise, A Yehova kuenje ndi ka kayisiwa.
Ndi popele kuenje ame ndi ka popeliwa,+Momo ove wucikuata cesivayo liange.
15 Tala! Kuli vamue va kasi oku ndi sapuila vati:
“Ondaka ya Yehova yi kasi pi?+
Yi tẽlisiwe cilo!”
16 Pole, catiamẽla kokuange, sia liwekelepo oku ku kuama ndungombo,Ndaño oku livela eteke liohali.
Ove wa kũlĩha ciwa ovina viosi omẽla wange wa popia;Viosi via pita kovaso yove!
17 Ku ka ñokele ocinjoko.
Ove wucitililo cange keteke liohali.
18 Vana va ndi lambalala va kutisiwe osõi,+Pole, ame si ka kutisiwe osõi.
Ovo va kuatiwe lusumba,Pole, ame si ka kuatiwe lusumba.
Va nenela eteke liohali,+Va nyanyõla kuenda va kundula elisi.*
19 Ca ndi sapuila Yehova ceci hati: “Kuende, talama pombundi yomãla vomanu yina olosoma vio Yuda vi iñilila loku tunda lo polombundi viosi vio Yerusalãi.+
20 Va sapuila okuti: ‘Yeveleli ondaka ya Yehova, ene alosoma vio Yuda, amanu vosi vo Yuda kuenda alonungi viosi vio Yerusalãi, vu iñilili polombundi evi.
21 Ca popia Yehova ceci hati: “Lunguki kuenda ko ka ambati ocilemo cimue keteke Liesambata ale oku ci nena poku pita laco polombundi vio Yerusalãi.+
22 Ko ka neni ocilemo lacimue oku upisa kolonjo viene keteke Liesambata; kuenda ko ka lingi upange laumue.+ Amamiko oku kolisa eteke Liesambata ndeci nda handelekele vakukululu yene.+
23 Pole, ovo ka va yevele ale oku vonguila etũi liavo kuenda lesino, va likala* oku pokola ale oku tava kepindiso.”’+
24 “‘“Omo liaco, nda ene vu pokoli kokuange lutima wosi,” oco Yehova a popia, “kuenje ka vu neni ocilemo lacimue poku pita laco polombundi violupale lulo keteke Liesambata kuenda wamamiko oku kolisa eteke Liesambata okuti, ka vu lingi upange laumue keteke liaco,+
25 olosoma kuenda olombuale vina vi tumãla kocalo ca Daviti+ vi ka iñililavo polombundi violupale lulo poku endela vakãlu wuyaki kuenda kolokavalu, ovo kumue lolombuale viavo, alume vo ko Yuda kuenda olonungi vio Yerusalãi;+ kuenje volupale olu mu ka tungiwa otembo yosi.
26 Kuenje omanu va keya oku tunda kalupale o Yuda, kovitumãlo vi kasi ocipepi lo Yerusalãi, kofeka yo Benjamini,+ kofeka yo kombuelo,+ kovaimbo a kasi kolomunda kuenda ko Negeve,* poku nena ovilumba vioku pia elisi,+ ovilumba,+ ovilumba violomema,+ onguendu kuenda ovilumba violopandu vonjo ya Yehova.+
27 “‘“Pole, nda ene ka vu pokola kokuange okuti, ka vu amamako oku kolisa eteke Liesambata kuenda vu ambati ovilemo loku vi nena poku pita lavio polombundi vio Yerusalãi keteke Liesambata, ndi ka kapa ondalu polombundi viaco kuenda oyo yi ka lia muẽle olosapalalo vi kuete oviteyuilo vio Yerusalãi+ kuenje ka yi ka imiwa.”’”+
Atosi Pombuelo
^ Tala Elomboluilo.
^ Ale pamue, “Momo ndondalu yimue, ene wa taimi vonyeño yange.”
^ Lit., “o lingisa ositu okuokuo kuaye.”
^ Ale “omunu wa pama.”
^ Ale “omunu wa pama.”
^ Ale pamue, “ka u kayisiwa.”
^ Ale “ovisimĩlo vio vokati.” Lit., “olongẽla.”
^ Ale “pole, halesungako.”
^ Lit., “va ndi,” citava okuti, ci tiamisiwila ku Yehova.
^ Ale “va kundula olonjanja vivali.”
^ Lit., “ovo va tĩlisa osingo yavo.”
^ Ale “kombuelo.”
