Embimbiliya li Kola esapulo limue lia Suku lia sonehiwila etu vosi. Tu sukila oku lilongisa Embimbiliya oco tu kũlĩhe Usovoli walio. (Yoano 17:3; 2 Timoteo 3:16) Vamẽla Embimbiliya, Yehova Suku o situlula ocipango caye catiamẽla komanu kuenda kongongo.​—Efetikilo 3:15; Esituluilo 21:3, 4.

Ka kuli elivulu likuavo li kuete unene walua komuenyo womanu. Embimbiliya li tu kuatisa oku sokolola kovituwa via Yehova ndeci ocisola, ohenda kuenda ocikembe. Olio li eca elavoko, li kuatisa omanu oku pandikisa kohali yalua. Embimbiliya li situlula ovituwa violuali lulo vina ka vi likuata locipango ca lipua ca Suku.​—Osamo 119:105; Va Heveru 4:12; 1 Yoano 2:15-17.

Embimbiliya tete lia sonehiwa ko Heveru, ko Aramaiku kuenda ko Helasi, olio lia pongoluiwa liosi ale onepa yimue kueci ci soka 3.000 kalimi. Embimbiliya olio elivulu li kasi oku pongoluiwa calua kuenda oku eciwa komanu. Ka tua lavokaile ocina cikuavo okuti eci ci sule. Ocitumasuku cimue Cembimbiliya ci popia ndoco: “Olondaka evi viwa Viusoma [okuti esapulo lia velapo Liembimbiliya] vi ka kundilua koluali luosi, ha vi lingi uvangi kolofeka viosi, oco esulilo liya noke.”​—Mateo 24:14.

Poku limbuka esilivilo liesapulo Liembimbiliya, ocimãho cetu poku pongolola hakukakatelako lika kulandu wovisonehua vio kosimbu, pole, oku pongolola lonjila yimue yeca elomboloko liwa haiyo ya leluka poku li tanga. Olosapi vi sangiwa Kalomboluilo ndeci “Olonumbi Vioku Pongolola Embimbiliya,” “Ovina vi Sangiwa Vembimbiliya Lilo” kuenda “Ndomo Embimbiliya Lieya Kokuetu,” vi lombolola olonumbi vimue viatiamẽla koku pongolola okuti, ovio via kuamiwa kuenda alomboluilo amue atiamẽla Kembimbiliya lilo.

Vana va sole Yehova Suku kuenda vo vumba, va yongola oku kuata Embimbiliya limue lia pongoluiwa lonjila yimue ya suapo hailio lia leluka oku kuata elomboloko liaco okuti, Ondaka ya Suku. (1 Timoteo 2:4) Eli olio esunga lieci tua sandekela Embimbiliya lilo Kumbundu, ndomo ci likuata locimãho cetu coku pongolola Embimbiliya li Kola​—Epongoluilo Lioluali Luokaliye kalimi alua. Tu ku likutililako oco wupe esilivilo Kembimbiliya lilo Liovisonehua vi Kola, osimbu o likolisilako oku ‘sanda Suku . . . loku u sanga.’ (Ovilinga 17:27) Eyi oyo onjongole yetu.