SOKOLOLA NDU OKUTI: O kasi oku nyula ocitumãlo va siata oku seleka ovina viosimbu. Vialua pokati kavio via kuka omo yotembo yalua. Vimue via kamba olonepa vialua. Pole, cimue pokati kavio ci kasi ciwa kolonepa viosi. Ove o sima okuti oco cokaliye okuti vikuavo vi sule. Omunu o kasi oku ku songuila o popia hati: Eci oco cosimbu okuti vikuavo vi sule kuenda lalimue eteke ca semũluiwile.” Kuenje ove o pula nda ca solekiwile kocitumãlo cimue. Omunu o kasi oku ku songuila o tambulula hati: “Sio. Oco ca pandikisa kombela kuenda kofela yalua. Handi vali, omanu valua va yonguile oku ci nyõla.” Loku komõha citava okuti o lipula ndoco: ‘Ca pangiwa la nye?’

Cimuamue haico okuti, Embimbiliya li sokisiwa locina eci cosimbu ca solekiwa. Olio elivulu liosimbu okuti, akuavo a sule. Ocili okuti kuli alivulu akuavo osimbu. Pole, ndeci ovina viosimbu via kuka, alivulu alua a sonehiwa a siata oku nyõleha vokuenda kuotembo. Ovina via tukuiwamo viatiamẽla kuloño, ka via suilepo poku linga akonomuiso viovina viovoloño. Alungulo aco atiamẽla koku tata uhayele, olonjanja vialua vi koka ohele kuenda ka vi kuatisa. Ovina vimue via sonehiwa ka via suilepo omo okuti olonepa vialua via nyelela ale via nyõleha vokuenda kuotembo.

Pole, Embimbiliya lia litepa lalivulu aco. Tunde eci Embimbiliya lia sonehiwa pa pita ale eci ci pitãhala 3.500 kanyamo, pole, toke cilo lia suapo. Vokuenda kuanyamo olio lia siata oku lambalaliwa calua, oku timihĩwa kuenda oku pembuiwa. Pole, alongiso alio a kasi oku amamako toke cilo. Ndaño okuti ukũlĩhĩso wa livokiya, eci Embimbiliya li popia ci situlula olondunge vi komõhisa.​—⁠Tanga okakasia losapi hati: “Ka li Kuete Esilivilo Ale Handi li Kuete Esilivilo?”

Citava okuti o lipula ndoco: ‘Anga hẽ alongiso Embimbiliya a kuete esilivilo koloneke vietu?’ Oco o sange etambululo, sokolola ndoco: ‘Ovitangi vipi vinene omanu va siata oku liyaka lavio koloneke vilo? Pokati kavio vipi vi yokokisa vali calua?’ Citava okuti o sima ovina viatiamẽla kuyaki, oku vĩhisiwa kuongongo, ungangala ale ovitukiko. Kaliye kũlĩhĩsa ovina vimue Embimbiliya li longisa. Noke lipula ndoco: ‘Nda omanu va kuamẽle eci Embimbiliya li popia, anga hẽ oluali nda lua linga ocitumãlo cimue ciwa?’

OKU SOLA OMBEMBUA

“Va sumũlũha vakuakulinga ombembua, momo va ka tukuiwa hati, omãla va Suku.” (Mateo 5:⁠9) “Nda citava, kali vakuambembua lomanu vosi.”​—⁠Va Roma 12:⁠18.

OKU KALA UKUAHENDA LOKU ECELA

“Va sumũlũha vakuahenda, momo va ka lekisiwa ohenda.” (Mateo 5:⁠7) “Amamiko oku likapako omunu lukuavo, oku liecela pokati lutima wosi, nda umue o kuetele ondaka ukuavo. Ndeci Yehova * o weceli lutima wosi, cimuamue haico vu linga.”​—⁠Va Kolosai 3:⁠13.

OKU YUVULA OLONEPELE

Suku “ lomunu umosi, wa sovola olofeka viosi viomanu, oco va tunge kilu lieve.” (Ovilinga 17:26) “Suku hokuacameko, pole, volofeka viosi omunu una u sumbila loku linga ovina via sunguluka, o taviwa laye.”​—⁠Ovilinga 10:​34, 35.

OKU SUMBILA ONGONGO

“Yehova Suku wa nyañula ulume wo kapa vocumbo ce Edene ha ci limi loku ci tata.” (Efetikilo 2:15) Suku o ka “kundula vana va vĩhisa ilu lieve.”​—⁠Esituluilo 11:⁠18.

OKU SUVUKA OCIPULULU LEVĨHO LIUKAHONGA

“[Teyuili] ovaso ene kuenda lilavi kocipululu, momo ndaño omunu o kuete calua, omuenyo waye ka u tundi kovina a kuete.” (Luka 12:15) “Evĩho liukahonga lovina viosi via liña, ale oku livela ka vi ka tukuiwe pokati kene, puãi lingi ndeci ca siata pokati komanu va kola.”​—⁠Va Efeso 5:⁠3.

OKU KALA UKUACILI KUENDA OKU KALA ONGUNJA

“Tu likolisilako oku kala vakuacili kovina viosi.” (Va Heveru 13:18) “U o nyana ka ka nyane vali; puãi a talavaye loku linga upange uwa lovaka aye muẽle.”​—⁠Va Efeso 4:⁠28.

OKU SOKOLOLA NDOMO TU KUATISA VAKUETU

‘Lembeleki vana va sumua, kuatisi vana va hongua kuenda pandikisi la vosi.’ (1 Va Tesalonike 5:14) ‘Tati olosiwe kuenda ovimbumba kohali yavo.’​—⁠Tiago 1:⁠27.

Embimbiliya ka li tukula lika ovina evi, oco li tu kuatise koku mioñolola ekalo liomuenyo wetu. Olio li tu longisa oku velisapo olonumbi viaco kuenda oku vi kapako. Nda omanu valua va kapeleko eci Embimbiliya li popia, anga hẽ voluali nda mua kala ovitangi vialua? Ocili okuti olonumbi Viembimbiliya handi vi kuete esilivilo koloneke vilo! Embimbiliya li pondola oku ku kuatisa ndati cilo?

Ulume umue wa velapo kolondunge wa popia hati: “Olondunge vi teyuila omo lionima yaluo.” (Mateo 11:​19, atosi pombuelo yemẽla) Olondunge vi limbukiwa lika okuti via sunguluka eci o vi kapako. Ove hẽ ku tava kondaka yaco? Omo liaco, pamue o sokolola ndoco: ‘Nda Embimbiliya li kuete muẽle esilivilo, olio te li pongolola omuenyo wange. Pole, li ñuatisa ndati lovitangi vialua ndi kuete cilo?’ Kũlĩhĩsa ulandu umue.

Cláudia, * wa kuatele ekalo liwa kuenda esanju. Vocipikipiki, ovina via pongoloka. Omõlaye ufeko wa fa, ulume waye wo siapo kuenje olombongo via pua, wa siala lolofuka vialua. Eye wa popia hati: “Nda siala lesumuo lialua. Nda fisa omõla, ulume wa ndi sia, kuenda si kuete onjo. Nda liyeva ndu okuti si kuete esilivilo, sia kuatele ongusu kuenda sia yonguile oku kala vali komuenyo.”

Cláudia omo liovitangi a pita lavio wa limbuka ocili colondaka vi sangiwa Kosamo 90:10 viokuti: “Oloneke vietu kulo kilu lieve vi tẽla akui epanduvali kanyamo, pamue, mekonda liongusu, akui ecẽlãla kanyamo. Haimo lumue upami wao upange lika, lesumuo. Momo u nyõleha ndopo kuenje tu taka.”

Cláudia wa sanda ekuatiso Vembimbiliya. Kuenje ekuatiso a sanga Vembimbiliya li komõhisa. Ndomo ci ka lekisiwa vovipama vi kuãimo, omanu vakuavo va limbukavo okuti, oku sanda ekuatiso Vembimbiliya oco va tetulule ovitangi viavo,  ci kuete esilivilo. Ovo va siata oku limbuka okuti Embimbiliya li sokisiwa locitumãlo coku seleka ovina viosimbu ndomo ca lomboluiwa kefetikilo liocipama cilo. Olio lia litepa lalivulu alua osimbu okuti vokuenda kuotembo ka a kuete vali esilivilo. Anga hẽ momo Embimbiliya li kuete ocina cimue ca litepa lalivulu akuavo? Anga hẽ olio Ondaka muẽle ya Suku?​—⁠1 Va Tesalonike 2:⁠13.

Pamue wa limbuka ale okuti omuenyo umbumbulu kuenda weyuka ovitangi. Eci o limbuka okuti ovitangi o kasi oku liyaka lavio vialua, pi o sanga elembeleko, ekuatiso kuenda alungulo?

Tu kũlĩhĩsi olonepa vitatu vi lekisa okuti Embimbiliya li kuete esilivilo komuenyo wove. Olio li ku kuatisa:

1. Oku yuvula ovitangi eci ci sukiliwa.

2. Oku tetulula ovitangi eci ovio viya.

3. Oku liyaka lovitangi vina okuti ku tẽla oku vi pongolola.

Ovipama vi kuãimo vi ka lombolola olonepa evi vitatu.