Rose wa popia hati: “Ndi kuete ocitangi cimue cuhayele ci ñokaila evalo lialua tunde koku citiwa kuange. Uvei waco u nateka oku linga eci ndi yongola.” Ocitangi cimue cinene eye a kuata ceci okuti, ka ponduile oku tiamisila utima waye koku lilongisa ovina viatiamẽla ku Suku. Pole, eye wa kuatisiwa calua lolondaka via Yesu vi sangiwa kelivulu lia Mateo 19:​26, ku popia hati: “Ku Suku ovina viosi vi tẽliwa.” Rose wa limbuka okuti kuli onjila yikuavo yoku lilongisa. Omo lievalo pamue ka cu ecelela oku tanga, omo liaco, wa nõlapo oku yevelela ovipama Viembimbiliya via ngalavaliwa kuenda alivulu a kunamẽla Vembimbiliya. * Eye wa popia hati: “Nda sia kuatele ekuatiso liaco, nda sia tẽlele oku pamisa ukamba wange la Suku.”

Eci Rose a yeva esumuo omo okuti ka pondola oku linga ovina a yonguile, o lembelekiwa lolondaka via popiwa kukanda 2 Va Korindo 8:​12, ku popia hati: “Nda tete kuli onjongole, ca sunguluka okuti omunu eca eci a kuete, haceciko omunu ka kuete.” Olondaka viaco vi ivaluisa Rose okuti Suku o sanjuka leci eye a kasi oku linga, ndomo ci likuata luhayele waye.

Cláudia wa tukuiwa ale, wa lombolola okuti: “Omõlange ufeko wa kuatele 18 kanyamo eci a fa, evalo nda yeva lia luile calua kuenje sia yonguile oku kala vali komuenyo. Cosi ca pongoloka.” Eye wa sanga elembeleko kolondaka Viosamo 94:​19, kuna ukualosamo a sapuila Suku hati: “Eci atatahãi a nduila vutima, Okulemba kuove okuo ku ñolisa.” Eye wa popia hati: “Nda likutilila ku Yehova oco a ñuatise oku linga cimue ci ñuatisa oku tepulula evalo liange.”

Noke eye wa lieca olumue poku tiamisila omuenyo waye kupange umue u sanjuisa calua. Eye wa li sokisa lolapi yomãla yoku pindala okuti, ndaño ya teka, pole, lopo yi pindala. Cimuamue haico, ndaño eye wa liyevele ndu okuti wa teka, wa limbuka okuti handi o pondola oku kuatisa vakuavo. Eye wa lombolola hati: “Eci nda enda oku lembeleka omanu Lovisonehua poku va longisa Embimbiliya, nda limbuka okuti, ya kala onjila Yehova a kuama yoku tepulula evalo loku ndembeleka.” Eye wa sonehavo ulala womanu va tukuiwa Vembimbiliya okuti va pita lesumuo lialua lioku fisa umue. Wa limbuka okuti, “omanu vaco vosi va kuatele ocituwa coku likutilila.” Wa limbukavo okuti, atambululo alua violohutilo vietu a sangiwa Vembimbiliya. Eye wa popia hati: “Tu a sanga lika nda tua tanga Embimbiliya.”

Oku lilongisa Embimbiliya ca kuatisa Cláudia ocina cikuavo okuti, ka tiamisila utima kovina via pita, pole, o luluvalela kovina vi laika oku iya. Wa siata oku lembelekiwa lelavoko lia tukuiwa kelivulu Liovilinga 24:​15, kuna ku popia hati: “Ku laika oku kala epinduko lia vakuesunga lava havakuesungako.” Ekolelo lipi eye a kuete okuti Yehova o ka pindula omõlaye ufeko? Cláudia o tambulula hati: “Ndi lete omõlange kovaso yoloneke. Eteke liaco lioku sanga lia sokiyiwa ale, ci kasi ndu okuti lia sonehiwa vulala wesokiyo lia Yehova. Ndi li sokolola ndu okuti kavali ketu tua tumala kuenda tu kasi oku sapela vonjo yetu. Kokuange ci kasi ndeci keteke eye a citiwa.”