“Poku likutilila ko ka tukole ovina vimuamue olonjanja viosi”—Mateo 6:7.

Yehova ka yongola okuti tu pitolola olohutililo tua patekela, ale tua tanga velivulu limue liolohutililo. Eye o yongola okuti tu vangula eci ci kasi vutima. Sokolola ndomo nda wa liyeva nda ekamba liove li pitolola olondaka vimuamue kokuove eteke leteke. Akamba vawa va lianja kuenda va vangula ocili. Eci tu likutilila volondaka vietu muẽle, tu sapuila ovisimĩlo vietu ku Isietu wo kilu.

“Vu pinga kuenje ka vu tambula, momo vu kasi oku pinga locimãho cĩvi.”—Tiago 4:3.

Etu ka tu lavoka okuti Suku o tambulula olohutililo vietu nda tua pinga ovina tua kũlĩha okuti, ka yongola okuti tu vi linga ale tu vi kuata. Ndeci, nda omunu umue o linga omapalo yoku imba osande o likutilila ku Suku oco a nganyale olombongo, anga hẽ Yehova o tambulula ohutililo yaco? (Isaya 65:11; Luka 12:15) Ka tu lavoka okuti Yehova o tambulula olohutililo viaco! Oco Suku a tambulule eci tu likutilila kokuaye, tu sukila oku kũlĩhĩsa nda apingilo etu a likuata leci eye a popia Vembimbiliya.

 “U o tindula etũi liaye kovihandeleko, elombelo liaye li linga ocinyuañi.”—Olosapo 28:9.

Kosimbu Suku ka tambuluile olohutililo via vana va likala ovihandeleko viaye. (Isaya 1:15, 16) Suku ka pongolokele. (Malakiya 3:6) Nda tu yongola okuti Suku o tambulula olohutililo vietu, tu sukila oku likolisilako oku kapako ovihandeleko viaye. Nye ci pita nda kosimbu tua lingile ovina ka via sungulukile? Anga ci lomboloka okuti Yehova lalimue eteke a ka tu yevelela? Hacoko! Suku o ka tu ecela nda tua pongolola ekalo lietu kuenda tu likolisilako oku u sanjuisa.—Ovilinga 3:19.